- 2019-05-17 04:10:00
- ព័ត៌មាន
មុនទៅលេងសួនអូទ្រីសមណ្ឌលគិរី ដឹងរឿងសំខាន់នេះ កុំឲ្យជិះរាប់រយគីទ្បូហើយខកចិត្ត
- 2019-05-17 04:10:00
- ចំនួនមតិ 0 | ចំនួនចែករំលែក 0
មុនទៅលេងសួនអូទ្រីសមណ្ឌលគិរី ដឹងរឿងសំខាន់នេះ កុំឲ្យជិះរាប់រយគីទ្បូហើយខកចិត្ត
ចន្លោះមិនឃើញ
វត្តមានសួនសត្វអូទ្រីសដ៏កម្រ និងថ្មីសន្លាង ដែលបានបង្ហាញខ្លួននៅលើទឹកដីនៃខេត្តមណ្ឌលគិរី កំពុងអង្រួនបេះដូងអ្នកចង់ទៅទស្សនាពីគ្រប់ទិសទី។
ដោយសារតែកំណើនអ្នកចង់ទៅលេង និងថតរូបពិតៗ ផ្លួកទឹកផ្លួកដី ប្រភពពីប្រជាពលរដ្ឋរស់នៅខេត្តមណ្ឌលគិរី បានបញ្ជាក់ថា សម្រាប់អ្នកធ្វើដំណើរផ្លូវឆ្ងាយដែលគ្រោងទៅលេងសួនអូទ្រីស សូមដឹងរឿងសំខាន់១នេះ សិន កុំឲ្យជិះរាប់រយគីឡូតែជួបរឿងខកចិត្ត។
លោក ងិន សុភ័ក្ត ប្រជាពលរដ្ឋរស់នៅខេត្តមណ្ឌលគិរី បានប្រាប់ Sabay តាមទូរសព្ទថា មកទល់ពេលនេះ ខាងភ្នាក់ងារថែទាំសត្វអូទ្រីស បានសុំផ្អាកលែងឲ្យមនុស្សចូលសួនសត្វអូទ្រីសមួយរយៈសិន។
លោក ងិន សុភ័ក្ត បានបញ្ជាក់មូលហេតុថា បើតាមអ្វីដែលលោកដឹង គឺដោយសារខាងមន្ត្រីសួនបារម្ភខ្លាចសត្វអូទ្រីសមានបញ្ហាសុខភាពខ្លាំង ឬប្រឈមនឹងស្លាប់ ព្រោះវាជាសត្វកម្រ។
ទោះយ៉ាងនេះក្ដី លោកបានបន្តថា ការបិទនេះ គឺបិទតែផ្នែកខាងក្នុងបរិវេណសួនសត្វ តែអ្នកទស្សនា នៅតែអាចទៅមើល ឬថតសត្វអូទ្រីសពីខាងក្រៅៗមកបាន គ្រាន់តែមិនអាចប៉ះវាបានផ្ទាល់។
សួននេះមានទីតាំងនៅក្នុងឃុំដាក់ដាំ នៃស្រុកអូររាំង ធ្វើដំណើរចេញពីក្រុងសែនមនោរម្យ និងបត់ចុះតាមផ្លូវក្រាលគ្រោះក្រហមទៅប្រហែល ៧គីឡូម៉ែត្រ។
ក្រុមការងារ Sabay មិនអាចសុំការពន្យល់បន្ថែមពីការផ្អាក ឬបើឲ្យទស្សនាវិញ តាមទូរស័ព្ទពីមន្ត្រីនៃរដ្ឋបាលខេត្តមណ្ឌលគិរីទេ ដោយសារទូរសព្ទហៅចូល តែគ្មានអ្នកលើក។
សូមបញ្ជាក់ថា ខេត្តមណ្ឌលគិរី ជាខេត្តមួយសម្បូរសត្វព្រៃគ្រប់ប្រភេទរស់នៅច្រើន។ ថ្មីៗនេះ វិស័យឯកជនបានបង្កើតសួនសត្វ ដើម្បីចិញ្ចឹមអំបូរសត្វព្រៃមួយចំនួនបន្ថែមទៀត ដើម្បីងាយស្រួលក្នុងការទស្សនាក៏ដូចជាចូលរួមអភិរក្សអំបូរសត្វព្រៃនៅសល់តិចតួច ក្នុងដែនព្រៃការពារនោះ។
ខេត្តមណ្ឌលគិរីមានចម្ងាយប្រមាណ ៣៨១គីឡូម៉ែត្រ បើគិតពីរាជធានីភ្នំពេញ និងត្រូវធ្វើដំណើរតាមផ្លូវជាតិលេខ ៦, ៧ និងជាតិលេខ ៧៦។
ក្រៅពីសួនសត្វអូទ្រីស ខេត្តមណ្ឌលគិរីនៅមានកន្លែងកម្សាន្តជាច្រើនទៀត ដូចជា សួនសត្វក្ដាន់ ប្រើស ទឹកជ្រោះស្អាតៗ ជាច្រើនកន្លែង និងរមណីយដ្ឋានធម្មជាតិនានាផងដែរ។