- 2019-06-14 09:34:42
- ព័ត៌មាន
ការដាក់ទុនធំរកស៊ីតែម្តងប្រៀបដូចគាស់ដើមឈើធំមួយទៅដាំ វាអាចចេញលទ្ធផល២ គឺងាប់ ឬរស់
- 2019-06-14 09:34:42
- ចំនួនមតិ 0 | ចំនួនចែករំលែក 0
ការដាក់ទុនធំរកស៊ីតែម្តងប្រៀបដូចគាស់ដើមឈើធំមួយទៅដាំ វាអាចចេញលទ្ធផល២ គឺងាប់ ឬរស់
ចន្លោះមិនឃើញ
«ការវិនិយោគប្រៀបដូចជាការដាំដើមឈើពីតូចទៅ ហើយខំប្រឹងថែទាំ ស្រោចទឹកដាក់ជី ទើបដើមឈើនោះនឹងរីកលូតលាស់ឡើង។ យ៉ាងណាមិញការរកស៊ីដាក់ទុនធំតែម្តង ប្រៀបដូចជាការគាស់ដើមឈើធំមួយដើមទៅដាំដូច្នោះដែរ វានឹងមានលទ្ធផល២ ចេញមកវិញ គឺអាចងាប់ និងអាចរស់»។ នេះជាការលើកឡើងចេញពីបទពិសោធន៍ចាប់ផ្តើមអាជីវកម្មរបស់លោក ហួត ជា ម្ចាស់ក្រុមហ៊ុនផ្គត់ផ្គង់សម្ភារៈសំណង់ធំមួយនៅកម្ពុជា ដែលមានប្រវត្តិជាក្មេងកំព្រាឪពុក និងធ្លាប់រស់នៅក្នុងជីវភាពខ្សត់ខ្សោយជាងគេបំផុតនៅក្នុងភូមិកាលពីកុមារភាព។
រំលឹកដល់ឆាកជីវិតដែលធ្លាប់វេទនាកាលពីមុន លោកបានលើកឡើងមានលទ្ធផលដូចថ្ងៃនេះ មិនមែនជាព្រេងសំណាងឡើយ តែវាបានលេចចេញពីការខិតខំប្រឹងប្រែងឥតស្រាកស្រាន្ត ការរៀនសូត្រ និងខំប្រឹងធ្វើការងារដោយភាពឆ្លាតវៃ។
កើតនៅឆ្នាំ ១៩៨០ ខេត្តតាកែវ លោក ហ៊ួត ជា គឺជាកូនពៅ ក្នុងចំណោមបងប្អូន ៤នាក់ ដែលមានម្ដាយជាស្ត្រីមេម៉ាយ ប្រកបរបរជាអ្នកស្រែ និងលក់ដូរតិចតួចដើម្បីចិញ្ចឹមកូន ខណៈលោកឪពុកបាត់បង់ជីវិតដោយសារចោរប្លន់កាលពីអំឡុងឆ្នាំ១៩៨០។
ថ្វីត្បិតកើតក្នុងគ្រួសារក្រីក្រ ប៉ុន្តែឆន្ទៈចំពោះការរៀនសូត្ររបស់លោក មិនថមថយឡើយ ដោយក្រៅពីទៅរៀន លោកថែមទាំងឆ្លៀតពេលជួយអ្នកម្តាយដើរជញ្ជាត់ត្រី និងកំពឹសដើម្បីធ្វើម្ហូប ស៊ីឈ្នួលដកស្ទូង ច្រូតស្រូវ អូសរទេះដឹកទឹកលក់ឱ្យអ្នកជិតខាង គ្រាន់បានប្រាក់ជួយសម្រាលទុក្ខលំបាកគ្រួសារ។
ក្រោយមកដើម្បីត្រៀមប្រលងបាក់ឌុប លោកបានប្តូរមករៀននៅសាលាទូលទំពូងនៅភ្នំពេញ ខណៈពេលនោះម្ដាយលោកប្រកបរបរលក់បន្លែនៅផ្សារបឹងកេងកង និងបានជួលបន្ទប់តូចមួយស្នាក់នៅក្នុងសំណង់អនាធិបតេយ្យចំការមន ក្នុងជីវភាពមួយយ៉ាប់យ៉ឺនណាស់។ លោកត្រូវដើរពីផ្ទះទៅសាលារៀនជារៀងរាលថ្ងៃ ហើយពេលយប់ថែមទាំងទៅធ្វើការងារជាអ្នកយាមសម្ភារសំណង់ទៀតផង។
លុះដល់ឆ្នាំ ១៩៩៨ លោកបានជាប់បាក់ឌុបដោយជោគជ័យ និងបានបន្តការសិក្សានៅវិទ្យាស្ថានជាតិគ្រប់គ្រងលើជំនាញទីផ្សារ។ លោកចាប់យកជំនាញទីផ្សារដោយសារលោកមើលឃើញថាអ្នកជោគជ័យមួយចំនួនផ្តើមចេញពីអ្នកចេះលក់។ ដើម្បីរកប្រាក់បន្តការសិក្សាដល់ចប់ លោកត្រូវរៀនបណ្តើរ ធ្វើការងារបណ្តើរ ដោយកាលនោះលោកបានជាប់ការងារជាអ្នកបើកបរនៅក្រុមហ៊ុនឯកជនមួយ។
ដោយដាក់ចិត្តក្នុងការងារ ជាពិសេសនៅពេលប្រជុំម្តងៗលោកតែងបានឡើងបញ្ចេញមតិកែលម្អស្ថានភាពលក់របស់ក្រុមហ៊ុន រហូតដល់ប្រធានក្រុមហ៊ុនមើលឃើញ និងទទួលស្គាល់ថា លោកជាអ្នកមានសមត្ថភាពម្នាក់ និងមិនសមធ្វើជាអ្នកបើកឡានទៀតឡើយ ទើបបានដំឡើងឋានៈឱ្យក្លាយជាបុគ្គលិកទីផ្សារក្នុងក្រុមហ៊ុននោះតែម្តង ខណៈលោកធ្វើជាអ្នកបើកបរបានប្រហែលមួយខែតែប៉ុណ្ណោះ។
លោកបានបំពេញការងារជាបុគ្គលិកធម្មតា រហូតក្លាយជាអ្នកគ្រប់គ្រងផ្នែកទីផ្សារនៅក្រុមហ៊ុនបន្ទាប់ពីបានបំពេញការងារប្រមាណ ៤ឆ្នាំ។ ក្រោយជោគជ័យក្នុងអាជីពជាអ្នកគ្រប់គ្រងទីផ្សាររបស់ក្រុមហ៊ុនជាច្រើន និងបានដឹងច្បាស់ថាខ្លួនឯងមានបទពិសោធគ្រប់គ្រាន់ក្នុងការដឹកនាំក្រុមហ៊ុនស្របពេលដែលវិស័យ សំណង់ កំពុង មានការរីកចម្រើននៅកម្ពុជា លោកក៏បានសម្លឹងឃើញ ឱកាសជំនួញមួយនេះ។
គឺនៅដើមឆ្នាំ ២០១០ ដែលលោកបានសម្រេចបង្កើតដេប៉ូលក់សម្ភារៈសំណង់ជាមួយនឹងដើមទុនប្រមាណ៥ ០០០ដុល្លារអាមេរិក ដោយមានបុគ្គលិកតែពីរនាក់ប៉ុណ្ណោះ គឺរូបលោក និងប្អូនជីដូនមួយម្នាក់ទៀត។ បច្ចុប្បន្នក្រុមហ៊ុន ហ៊ួត ជា ផ្គត់ផ្គង់សម្ភារៈសំណង់ បាន ឈរជើងរឹងមាំក្នុងទីផ្សារ ដោយបានបង្កើតបាន ២៣សាខាទូទាំងប្រទេស និងបានផ្ដល់ការងារដល់បុគ្គលិកប្រមាណ ៣០០នាក់។
ទទួលបានជោគជ័យឆាប់រហ័សក្នុងជំនួញ លោកហួត ជា បានបង្ហើបឲ្យដឹងពីគន្លឹះសំខាន់ ៣ គឺ ៖
ទី១. គឺ កត្តាអ្នកផ្គត់ផ្គង់ត្រូវមានភាពស្មោះត្រង់ជាមួយគ្នា ។
ទី២. កត្តាបុគ្គលិក គឺមិនត្រឹមស្រលាញ់តែមាត់ទេ គឺយើងត្រូវផ្ដល់អត្ថប្រយោជន៍ និង លក្ខខណ្ឌល្អៗ ផ្ដល់ក្តីសង្ឃឹមដល់ពួកគេសម្រាប់ថ្ងៃអនាគតផង ។
ទី៣. កត្តាអតិថិជន គឺនៅពេលដែលយើងមានផលិតផលគុណភាពល្អ តម្លៃល្អ ហើយមានបុគ្គលិក បម្រើសេវាកម្មបានល្អហើយនោះ នឹងមានការគាំទ្រពីអតិថិជនមិនខាន៕
