ពលរដ្ឋហុងកុង ចាប់ផ្ដើមផ្លាស់ចេញទៅតៃវ៉ាន់ ក្រោយបញ្ហាចម្រូងចម្រាសរឿងបត្យាប័ន

2019-06-19 06:27:55
ព័ត៌មាន

2019-06-19 06:27:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ពលរដ្ឋហុងកុងជាច្រើននាក់ ត្រូវបានរាយការណ៍ថានាំគ្នាផ្លាស់ចេញទៅកាន់តៃវ៉ាន់ជាបន្ដបន្ទាប់ក្នុងរយៈពេលប៉ុន្មានឆ្នាំចុងក្រោយនេះដើម្បីទៅស្វែងរកប្រជាធិបតេយ្យពេញលេញសម្រាប់ពួកគេ។

យោងតាមទិន្នន័យផ្លូវការបង្ហាញថា ចំនួនប្រជាជនពីទីក្រុងហុងកុង ដែលទទួលបានសិទ្ធិស្របច្បាប់ក្នុងការស្នាក់នៅតៃវ៉ាន់ បានកើនឡើងទ្វេដងក្នុងរយៈពេល ១០ឆ្នាំចុងក្រោយ។ ប្រជាជនបានផ្លាស់ប្ដូរទៅតៃវ៉ាន់ច្រើនបំផុត ចាប់តាំងពីបាតុកម្មចលនាឆត្រកាលពីឆ្នាំ ២០១៤។ មកទល់ពេលនេះ អ្នកជំនាញជាច្រើនជឿថា ការផ្លាស់ទៅកាន់តៃវ៉ាន់កាន់តែច្រើនឡើងៗក្រោយពេលដែលមេដឹកនាំហុងកុងស្នើធ្វើច្បាប់បត្យាប័នថ្មីបណ្ដាលមានការតវ៉ាពីប្រជាជនរហូតដល់ជាង ២លាននាក់។

យោងតាមស្ត្រី Yung Xiu Kwan វ័យ ៦៧ឆ្នាំឲ្យដឹងថា សំណើធ្វើបត្យាប័ន គឺជាបញ្ហាចុងក្រោយដែលធ្វើឱ្យលោកយាយសំរេចចិត្តចាកចេញពីហុងកុងទៅកាន់តៃវ៉ាន់។ ស្ត្រីរូបនេះបន្ដថា "ប្រសិនបើគ្មានសេរីភាព និងប្រជាធិបតេយ្យទេ យើងប្រៀបដូចជារស់ក្នុងគុកអ៊ីចឹង ហើយបើគ្មានសេរីភាព ខ្ញុំសុខចិត្តស្លាប់ល្អជាង។ ប៉ុន្តែតៃវ៉ាន់អាចផ្តល់ឱ្យយើងបាន ដោយសារតែតៃវ៉ាន់មានការបោះឆ្នោតតាមបែបប្រជាធិបតេយ្យ និងរដ្ឋធម្មនុញ្ញដែលការពារលទ្ធិប្រជាធិបតេយ្យ។”

គួរឲ្យដឹងថា ការតវ៉ានៅហុងកុង ត្រូវបានធ្វើឡើងក្រោយពេលដែលមានការស្នើសុំបង្កើតច្បាប់បត្យាប័នថ្មីដែលអនុញ្ញាតឲ្យជនល្មើសត្រូវបញ្ជូនទៅកាន់ចិនដីគោកដើម្បីកាត់ក្ដី ដោយសារពួកគេមិនទុកចិត្តលើការគោរពសិទ្ធិមនុស្ស និងប្រព័ន្ធច្បាប់របស់ចិនដីគោក។ យ៉ាងណាមិញ កាលពីថ្ងៃសៅរ៍កន្លងទៅ មេដឹកនាំហុងកុងលោកស្រី Carrie Lam បានប្រកាសពន្យារពេលអនុម័តសេចក្តីព្រាងច្បាប់បត្យាប័ន ក្រោយមានការតវ៉ាពីបាតុកររហូតដល់ជាង ១លាននាក់អស់រយៈពេលជាច្រើនថ្ងៃ៕