រដ្ឋបាលរាជធានីភ្នំពេញ ជូនដំណឹងពីការវាស់វែង និងការកំណត់ព្រំដីក្នុងបឹងជើងឯក

2019-07-15 09:32:24
ព័ត៌មាន

2019-07-15 09:32:24
ចំនួនមតិ 0 | ចំនួនចែករំលែក 0

ចន្លោះមិនឃើញ

រដ្ឋបាលរាជធានីភ្នំពេញ បានជូនដំណឹងស្ដីពីការវាស់វែង និងការកំណត់ព្រំដីក្នុងបឹងជើងឯក ស្ថិតនៅខណ្ឌមានជ័យ និងខណ្ឌដង្កោ។ សេចក្ដីជូនដំណឹងនេះ បានចុះហត្ថលេខាដោយ ឯកឧត្តម ឃួងស្រេង អភិបាល នៃគណៈអភិបាលរាជធានីភ្នំពេញ ចុះថ្ងៃទី ១៥ ខែកក្កដា ឆ្នាំ ២០១៩។

រូបតំណាង

សេចក្ដីជូនដំណឹងដដែលបានប្រាប់ដល់សាធារណជន និងអង្គភាពនានា ដែលមានការពាក់ព័ន្ធនឹងក្បាលដីដែលស្ថិតនៅក្នុងផ្ទៃបឹងជើងឯក ក្នុងភូមិសាស្រ្តខណ្ឌមានជ័យ និងខណ្ឌដង្កោ រាជធានីភ្នំពេញ ដោយថា ក្រុមការងារបច្ចេកទេសចុះវាស់វែង និងកំណត់ព្រំដីក្នុងផ្ទៃបឹងជើងឯក នៃគណៈកម្មការដឹកនាំអនុវត្តលិខិតលេខ ៧៤៩ សជណ ចុះថ្ងៃទី៣០ ខែឧសភា ឆ្នាំ ២០១៩របស់ទីស្ដីការគណៈរដ្ឋមន្ត្រីបាននិងកំពុងចុះវាស់វែង និងកំណត់ព្រំដីក្នុងផ្ទៃបឹងជើងឯកចាប់តាំងពីថ្ងៃទី ១០ ខែមិថុនា ឆ្នាំ ២០១៩ ដោយទទួលបានលទ្ធផលដូចខាងក្រោម៖

១. ចុះស្វែងរកចំណុចព្រំដីទំហំ ១៩០ហិកតា ដែលត្រូវបម្រុងទុកសម្រាប់អភិវឌ្ឍ និងស្វែងរកចំណុចព្រំដី អ្នកកាន់កាប់នៅលើផ្ទៃដីទំហំ ១៩០ហិកតា ដែលត្រូវបម្រុងទុកសម្រាប់អភិវឌ្ឍ
២. ចុះស្វែងរកចំណុចព្រំដីផ្ទៃបឹងជើងឯកទំហំ ១៨១ហិកតា ដែលត្រូវរក្សាទុកជាសម្បត្តិសាធារណៈរបស់រដ្ឋ។
៣. ចុះសិក្សា និងវាស់វែងកំណត់និយាមកាបណ្ដាញហេដ្ឋារចនាសម្ព័ន្ធទៅកាន់ទីតាំងបឹងជើងឯក។

មកទល់នឹងបច្ចុប្បន្ននេះ ការងារចុះវាស់វែង និងកំណត់ព្រំដីក្នុងផ្ទៃបឹងជើងឯកខាងលើស្ទើរតែបញ្ចប់ទាំងស្រុង ប៉ុន្តែដោយពិនិត្យឃើញថាម្ចាស់ក្បាលដីពាក់ព័ន្ធមួយចំនួននៅមិនទាន់បានផ្ដល់កិច្ចសហការនោះ ក្រុមការងារនឹងទុករយៈពេល ៣០ថ្ងៃទៀត គិតចាប់ពីថ្ងៃទី ១៥ ខែកក្កដា ឆ្នាំ ២០១៩ រហូតដល់ដល់ថ្ងៃទី ១៥ ខែសីហា ឆ្នាំ ២០១៩ ជាកំហិត។

សូមអានសេចក្ដីប្រកាសព័ត៌មានទាំងស្រុងខាងក្រោមនេះ