យុវវ័យមួយចំនួនអាចភ្លេច ឬមិនចេះធ្វើនំខ្មែរមួយចំនួន?

2019-09-17 04:15:32
ព័ត៌មាន

2019-09-17 04:15:32
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅប៉ុន្មានឆ្នាំចុងក្រោយនេះ ប្រជាពលរដ្ឋខ្មែរមួយចំនួនចាប់ផ្ដើមលែងធ្វើនំខ្មែរដោយខ្លួនឯង ជាពិសេសការវេចនំអន្សមជាដើម។ តើអ្វីជាមូលហេតុនាំឲ្យប្រជាពលរដ្ឋខ្មែរលែងធ្វើនំខ្មែរ ជាពិសេសរដូវភ្ជុំបិណ្ឌនេះ?

កត្តារវល់នឹងការងារ រវល់នឹងជីវភាព និងកត្តាមានលុយអាចទិញស្រាប់ងាយស្រួលជាងធ្វើខ្លួនឯង គឺជាមូលហេតុចម្បងៗ ដែលប្រជាពលរដ្ឋខ្មែរកាត់បន្ថយការធ្វើនំទៅវត្តប្រគេនព្រះសង្ឃ។ ទាំងអស់នេះជាការលើកឡើងរបស់ប្រជាពលរដ្ឋខ្មែរមួយចំនួនប្រាប់ Sabay អំឡុងពេលទៅធ្វើបុណ្យដាក់បិណ្ឌកាលពីពេលថ្មីៗនេះ។

ពុទ្ធបរិស័ទម្នាក់ឈ្មោះ ណូយ អាយុ៥៥ឆ្នាំ រស់នៅសង្កាត់សង្កាត់ ខណ្ឌដង្កោ រាជធានីភ្នំពេញ បានប្រាប់ Sabay ថា កាលពី១០-២០ឆ្នាំមុន មិនថាអ្នកនៅជនបទ ឬអ្នកនៅក្រុងចាស់ៗនៅពេលបុណ្យទានជាពិសេសរដូវភ្ជុំរមែងវេចនំអន្សមទៅវត្តប្រគេនព្រះសង្ឃ។ «ក្មួយអើយ! ឥលូវមានពេលឯណានឹងវេច ណាមួយមានលុយតិចតួចយើងទិញនៅផ្សារឲ្យសមល្មមទៅវត្ត ហើយសល់តិចតួចយើងទុកញុំា មិនសូវជាចំណាយច្រើនផង»។

អ៊ុំស្រី នឹម វ័យ ៦៥ឆ្នាំ រស់នៅស្រុកខ្សាច់កណ្ដាល ខេត្តកណ្ដាល បានប្រាប់ Sabay ដែរថា កាលជំនាន់អ៊ុំនៅមានកម្លាំងតែងតែជុំគ្នាវេចនំទៅវត្ត ឥលូវមិនសូវដែរ បើវេចក៏វេចតិចតួច ព្រោះថា វេចច្រើនក៏មិនសូវមានអ្នកញុំា ឯក្មេងៗបបួលវេចនំគេមិនធ្វើទេ សល់ពេលគេជុំគ្នាសប្បាយរីករាយនឹងការហូបចុកផ្សេងៗ ហើយក្មេងឥលូវរវល់ការងារច្រើន ម៉្លោះហើយគ្មានពេលនឹងមកជួយវេចទេ។ អ្វីដែលសំខាន់ឥលូវមានអ្នកវេចលក់ យើងទិញល្មមៗយកទៅវត្តខ្លះ និងញុំាខ្លះគ្រប់គ្រាន់ហើយ។

ព្រះគ្រូគន្ធធុតង្គ សឿ ហេង ចៅអធិការវត្តធុតង្គចំការដូង បានសង្ឃដីកាថា ប៉ុន្មានឆ្នាំចុងក្រោយនេះ ជាពិសេសរដូវភ្ជុំមិនសូវឃើញមាននំនែកខ្មែរ ដែលធ្វើផ្ទាល់ដោយពុទ្ធបរិស័ទនោះទេ។ «ចឹងផ្ដាំទៅពុទ្ធបរិស័ទជាចាស់ជាទុំ ជួយបង្រៀនក្មេងៗផង ជាពិសេសក្មេងៗខ្លះ ឥលូវប្រហែលអត់ចេះវេចអន្សមទេមើលទៅ អត់ចេះធ្វើនំបត់ នំគមទេ មើលទៅ»។