- 2019-09-25 08:51:44
- ព័ត៌មាន
វិចិត្រករផ្តុំគ្នាគូររូបសៀវភៅរឿងកុមារទាក់ទងនឹងអាជីពទាំង ១១ នៅខេត្តបាត់ដំបង
- 2019-09-25 08:51:44
- ចំនួនមតិ 0 | ចំនួនចែករំលែក 0
វិចិត្រករផ្តុំគ្នាគូររូបសៀវភៅរឿងកុមារទាក់ទងនឹងអាជីពទាំង ១១ នៅខេត្តបាត់ដំបង
ចន្លោះមិនឃើញ
កាលពីពេលកន្លងទៅនេះ អង្គការមូលនិធិអាស៊ីប្រចាំកម្ពុជា បានរៀបចំកម្មវិធីបង្កើតសៀវភៅរឿងសម្រាប់កុមារ (BookLab) ក្រោមគម្រោងរបស់ Let’s Read ដែលមានរយៈពេលពីរថ្ងៃ នៅឯខេត្តបាត់ដំបង ដោយមានការចូលរួមពី វិចិត្រករ នាយកសិល្បៈ និងអ្នកដឹកនាំសិក្ខាសាលា។
ក្នុងកំឡុងពេលពីរថ្ងៃនៅខេត្តបាត់ដំបង សៀវភៅរឿងកុមារទាក់ទងនឹងអាជីពទាំង ១១ ត្រូវបានវិចិត្រករ ដែលប្រកបទៅដោយទេពកោសល្យយ៉ាងល្អឯក ព្យាយាមគូររូបផ្សេងៗ ទាក់ទងនឹងអាជីពទាំង ១១ ឲ្យត្រូវទៅនឹងបរិបទរបស់កុមារ មុននឹងដាក់ឲ្យប្រើប្រាស់ជាផ្លូវការនៅលើបណ្ណាល័យឌីជីថល Let’s Read ។
កម្មវិធីសៀវភៅរឿងកុមារ ដែលធ្វើឡើងនៅ ហ្វារពន្លឺសិល្បៈខេត្តបាត់ដំបងជាលើកដំបូងនេះ មានការចូលរួមពី លោកយី សុងគី ប្រធានមន្ទីរអប់រំខេត្តបាត់ដំបង លោក Kyle Barker នាយករងកម្មវិធីសៀវភៅសម្រាប់អាស៊ី នៃអង្គការមូលនិធិអាស៊ី DJ Nana ទូតសុឆន្ទៈ (CSR Ambassador) នៃក្រុមហ៊ុន Smart Axiata និង លោក ពៅ កាំង ប្រធានផ្នែកទីផ្សារនៃក្រុមហ៊ុន Starbucks Cambodia។
ក្នុងនោះ លោក Kyle Barker បានឲ្យដឹងថា ក្រុមការងារលោកបង្កើតគម្រោងនេះឡើង គឺដើម្បីឲ្យស្របទៅនឹងបរិបទនៃប្រទេសកម្ពុជា ដែលកំពុងស្ថិតក្នុងយុគសម័យបដិវត្តឧស្សាហកម្មលើកទី ៤។
លោកថា ៖«ហើយសៀវភៅទាំងនេះនឹងជួយកុមារបង្កើតចំណាប់អារម្មណ៍ក្នុងការស្វែងរកអាជីពនៅក្នុងវិស័យស្ទែម ដែលរួមមាន វិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា»។
បញ្ជាក់ដែរថា គម្រោង Let’s Read គឺជាកិច្ចផ្ដួចផ្ដើមឡើងដោយអង្គការមូលនិធិអាស៊ី ហើយក៏ជាគម្រោងដែលកំពុងរីកដុះដាលយ៉ាងលឿន ដោយពឹងផ្អែកទៅលើទំនាក់ទំនងយ៉ាងជិតស្និទ្ធរវាងមូលនិធិអាស៊ី ដែលមានការិយាល័យនៅក្នុង ១៨ ប្រទេសជាមួយនឹងសហគមន៍កសាងបណ្ណាល័យឌីជីថល ជាភាសាក្នុងតំបន់។
ចំណែកសៀវភៅផលិតនៅក្នុងកម្មវិធីនេះ និងសៀវភៅផ្សេងៗ ដែលមានស្រាប់ នៅលើបណ្ណាល័យឌីជីថល សាធារណជនអាចរកអាន ទាញយក ព្រីន និងចែកចាយបានដោយសេរីតាមរយៈ www.letsreadasia.org ៕