រដ្ឋាភិបាល​តៃវ៉ាន់ បាន​ធ្វើ​ការ​ប៉ាន់​ប្រមាណ​ថា​ខ្លួន​នឹង​ចំណាយ​រហូត​ដល់ ៣៥​ប៊ីលាន​ដុល្លារ​ដើម្បី​ដោះ​ស្រាយ​បញ្ហា​ដែល​បណ្ដាល​មក​ពី​ការ​វាយលុក​នៃ​ជំងឺ Covid-19។

យោង​តាម​ប្រធានាធិបតី​តៃ​វ៉ាន់​អ្នក​ស្រី Tsai Ing-Wen ឲ្យ​ដឹង​ថា​រដ្ឋាភិបាល​បាន​ត្រៀម​ខ្លួន​រួច​ជា​ស្រេច​ដើម្បី​បញ្ចេញ​កញ្ចប់​ថវិកា ៣៥​ប៊ីលាន​ដុល្លារ។ ធនាគារកណ្តាលកាលពីខែមុន បានកាត់បន្ថយចក្ខុវិស័យកំណើនសេដ្ឋកិច្ចពេញមួយឆ្នាំរបស់ខ្លួនពីចំនួន ២,៥៧% មកត្រឹម ១,៩២%​ ដែលបានព្យាករណ៍កាលពីខែធ្នូ។ប៉ុន្តែការប្រយុទ្ធប្រឆាំងនឹងវីរុសក៏បានឆ្លុះបញ្ចាំងពីលក្ខណៈការទូតមួយសម្រាប់កោះតៃវ៉ាន់ដែលភាគច្រើនត្រូវបាន​ផ្ដាច់​ចេញពីសហគមន៍អន្តរជាតិដោយសារតែសម្ពាធពីប្រទេសចិន។

លើស​ពី​នេះ​ទៀត តៃវ៉ាន់​ក៏​បាន​ព្រមព្រៀង​ធ្វើ​ការ​ជាមួយ​សហរដ្ឋអាមេរិក​ដើម្បី​អភិវឌ្ឍ​វ៉ាក់សាំង និង​ការ​ការ​ពារ​វីរុសផង​ដែរ។ ក្រសួងការបរទេសបាននិយាយថាម៉ាស់ចំនួន ៧ លាននឹងត្រូវបញ្ជូនទៅអឺរ៉ុបរួមមានអេស្ប៉ាញ, អ៊ីតាលី និងអង់គ្លេស ខណៈ ២ លានទៀតនឹងទៅសហរដ្ឋអាមេរិក ហើយនៅសល់សម្រាប់បណ្តាប្រទេសតូចៗដែលរក្សាចំណងការទូតជាផ្លូវការជាមួយកោះតៃវ៉ាន់៕