• 2020-04-27 08:01:40
  • ព័ត៌មាន

នរណានឹងឡើងដឹកនាំកូរ៉េខាងជើង បើគីម ជុងអ៊ុន ពិតជាស្លាប់ដូចពាក្យចចាមអារាមមែន?

  • 2020-04-27 08:01:40
  • ចំនួនមតិ 0 | ចំនួនចែករំលែក 0

ចន្លោះមិនឃើញ

ពាក្យ​ចចាមអារាម​ពី​ការ​ស្លាប់​របស់​លោក​គីម ជុង​អ៊ុន ត្រូវ​បាន​ផ្ទុះ​ឡើង​ក្រោយ​ពេល​ដែល​សារព័ត៌មាន CNN ផ្សាយ​ថា​លោក​ទទួល​បរាជ័យ​ក្នុង​ការ​វះ​កាត់​បេះ​ដូង។

យោង​តាម​អ្នក​វិភាគ​មាន​មូលដ្ឋាន​នៅ​ទីក្រុង​ញូវយ៉ក ​លោក Sean King ឲ្យ​ដឹង​ថា ​ក្នុង​ករណី​ដែល​លោក​គីម ជុងអ៊ុន​ស្លាប់ នោះ​អ្នក​ឡើង​បន្ដ​តំណែង​ត្រូវ​តែ​ជាប់​សាច់​ឈាម​ត្រកូល​គីម។ ប៉ុន្តែ​ដោយ​សារ​តែ​បង​ប្រុស​របស់​លោក​គីមជុងអ៊ុន គឺ​លោក គីម ជុងណាម ត្រូវ​បាន​ធ្វើ​ឃាត​កាល​ពី​ឆ្នាំ ២០១៧ មិនមានអ្នកស្នងតំណែងជាក់ស្តែងជាបុរសភ្លាមៗក្នុងចំនោមកូនៗរបស់គីមជុងអ៊ីល​ទេ។ យ៉ាងណា​មិញ គេ​សង្កេត​ឃើញ​ថា​បេក្ខភាព​ដ៏​មាន​សក្ដានុពល​ក្នុង​ការ​ឡើង​កាន់​តំណែង​បន្ដ គឺ​អ្នក​ស្រី គីម យ៉ូជុង ដែល​ជា​ប្អូន​ស្រី​បង្កើត​របស់​គីម ជុងអ៊ុន។ អ្នក​ស្រី គីម យ៉ូជុង ត្រូវ​បាន​គេ​មើល​ឃើញ​ជា​រឿយ​ៗ​ក្រោយ​ការ​បង្ហាញ​ខ្លួន​ជាមួយ​បង​ប្រុស​ ក្នុង​ជំនួប​កំពូល​ផ្សេង​ៗ​ដូច​ជា​ជាមួយ​ប្រធានាធិបតី​អាមេរិក ដូណាល់ ត្រាំ និង​ប្រធានាធិបតី​ចិន​ស៊ី ជីងពីង។

លោក King បាននិយាយថា “អ្នកស្នងតំណែង ត្រូវតែជាសមាជិកគ្រួសារគីម ដែល​មាន​ចែង​ក្នុង​ រដ្ឋធម្មនុញ្ញរបស់កូរ៉េខាងជើង ជាពិសេសស្ដីអំពីគីមអ៊ីលស៊ុង និងគីមជុងអ៊ីល។" មនោគមវិជ្ជារបស់ប្រទេសនេះកំណត់ថាប្រទេសកូរ៉េខាងជើង គឺជារដ្ឋបដិវត្តមួយដែលមេដឹកនាំដ៏អស្ចារ្យដើរតួជាឪពុកសម្រាប់ប្រទេសជាតិ ដែល​មាន​ន័យ​ថា​អ្នក​ដឹកនាំ​ត្រូវ​តែ​ជា​បុរស។

ចំណែក​ឯ​អ្នក​វិភាគ​មួយ​រូប​ទៀត​មក​ពី​ប្រទេស​អូស្ត្រាលី គឺ​លោក Malcolm Davis ​ឲ្យ​ដឹង​ថា "ច្បាស់​ណាស់​ថា​អ្នក​ស្រី គីម​យ៉ូជុង នឹង​ឡើង​កាន់​តំណែង​បន្ដ ប៉ុន្តែ​ថា​តើ​បក្ស​ពួក​កូរ៉េខាងជើង​នឹង​ព្រម​ទទួល​យក​មេ​ដឹកនាំ​ជា​ស្ត្រី​ឬ​អត់​នោះ នៅ​មិន​ទាន់​ដឹង​ច្បាស់​នៅ​ឡើយ​ទេ៕”

ប្រភព៖ ABC.net ប្រែ​សម្រួល៖ រ័ត្ន

មតិយោបល់
អត្ថបទពេញនិយម