ធ្លាប់ដឹងអត់? នៅក្នុងព្រៃអាម៉ាហ្សូន មានទន្លេទឹកពុះ អាចសម្លាប់មនុស្សសត្វ ដែលធ្លាក់ចូល

2020-06-29 13:04:41
ព័ត៌មាន

2020-06-29 13:04:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ទន្លេប្រវែងជាង៦ គីឡូម៉ែត្រ ស្ថិតនៅក្នុងទីជ្រៅនៃព្រៃអាម៉ាហ្សូន ក្លាយជាកន្លែងធ្វើឲ្យមនុស្សជាច្រើនចាប់អារម្មណ៍ចង់ដឹង ដោយសារតែកម្ដៅក្ដៅរបស់វា ធ្វើឲ្យទឹកទន្លេពុះ។

ទន្លេ Mayantuyacu ដែលមានកម្ដៅក្ដៅដូចទឹកពុះខាងលើ ស្ថិតនៅក្នុងប្រទេសប៉េរូ ត្រូវបានគេនិយាយរៀបរាប់តៗគ្នារយៈពេលយូរមកហើយ។ ក្រោយមក អ្នកភូគព្ភសាស្ត្រម្នាក់(សិក្សាពីផែនដី) មកពីសាកលវិទ្យាល័យ Southern Methodist សហរដ្ឋអាមេរិក ឈ្មោះ Andrés Ruzo ដែលបានឮពីរឿងនោះ បានគិតថា វាគឺជាបាតុភូត ដែលមិនអាចកើតឡើងបាន។

Ruzo ជឿថា វាត្រូវការថាមពលកម្ដៅខ្លាំងក្នុងផែនដីទើបអាចកម្ដៅទឹកទន្លេតូចមួយឲ្យពុះបាន ជាមួយគ្នានោះ ប្រភពទឹកនៅព្រៃអាម៉ាហ្សូន គឺនៅឆ្ងាយពីភ្នំភ្លើងសកម្ម។

យ៉ាងណាក្ដី ក្នុងឆ្នាំ២០១១ Ruzo បានឃើញទឹកទន្លេពុះក្ដៅហ៊ុយៗដោយផ្ទាល់ភ្នែក និងបានចំណាយពេលសិក្សាពី ទន្លេនោះ។ Ruzo បានឲ្យដឹងថា គាត់បានរលាកដោយបានប៉ះទឹកទន្លេ និងអាចស្លាប់តែម្ដងប្រសិនបើធ្លាក់ចូលទឹកទន្លេនោះ។ វាមានកម្ដៅក្ដៅអាចឆុងតែបាន ហើយទឹកទន្លេមានកម្តៅក្តៅផ្សេងពីគ្នាតាមកន្លែង។ Ruzo ក៏បានសង្កេតឃើញថា មានសត្វដែលធ្លាក់ទន្លេ Mayantuyacu គឺត្រូវងាប់និងស្រុះសាច់ឆ្អិនតែម្ដង។

ក្រោយមក Ruzo ក៏បានសរសេរសៀវភៅមួយក្បាលរៀបរាប់អំពី ទន្លេ Mayantuyacu ដែលមានចំណងជើងថា "The Boiling River"។ យោងទៅតាមការស្រាវជ្រាវក្នុងសៀវភៅនោះបានសរសេរពីដំណើរនៃការធ្វើឲ្យទឹកទន្លេ Mayantuyacu ក្ដៅពុះ គឺដោយសារកម្ដៅសំបកផែនដី ធ្វើឲ្យទឹកផុសក្នុងដីក្ដៅ។ នៅពេលភ្លៀងធ្លាក់ នៅតំបន់នោះ ទឹកបានជ្រាបផ្ដុំគ្នាក្នុងគន្លាក់រន្ធថ្ម ពេលទឹកហូរចេញមក ផ្សំនឹងកម្ដៅផែនដី ធ្វើឲ្យក្ដៅបែកស្រទាប់ថ្ម ក្លាយជាទឹកទន្លេក្ដៅ៕