ហ្វីលីពីនបញ្ជាឲ្យពលរដ្ឋរាប់លាននាក់នៅផ្ទះ ខណៈជំងឺកូវីដ កើនឡើងរហ័សលើពិភពលោក

2020-08-05 01:44:32
ព័ត៌មាន

2020-08-05 01:44:32
ចំនួនមតិ 0 | ចំនួនចែករំលែក 0

ចន្លោះមិនឃើញ

មនុស្សរាប់លាននាក់នៅប្រទេសហ្វីលីពីនត្រូវបានបញ្ជាឱ្យស្ថិតនៅផ្ទះចាប់ពីថ្ងៃអង្គារទី០៤ខែសីហា ខណៈដែលការឆ្លងជំងឺកូវីដ១៩ជាសកល បានបន្តកើនឡើងឆាប់រហ័សដោយអង្គការសុខភាពពិភពលោកបានព្រមានចំពោះការពឹងផ្អែកលើថ្នាំវ៉ាក់សាំងដែល”ជាក្តីសង្ឃឹមចុងក្រោយ”ដើម្បីបញ្ចប់ជំងឺឆ្លងរាតត្បាតនេះ។

ប្រជាជនជាង២៧លាននាក់នៅហ្វីលីពីនដោយរួមទាំងនៅទីក្រុងម៉ានីលត្រូវបានដាក់នៅក្រោមវិធានការបិទចេញចូលជាថ្មី (រូបថត៖ AFP)

មនុស្សជាង១៨លាននាក់ បានឆ្លងវីរុសនិងមនុស្សជិត ៧សែនបានស្លាប់ដោយវីរុសនេះ នៅទូទាំងពិភពលោកចាប់តាំងពីវីរុសនេះបានលេចចេញជាលើកដំបូងនៅប្រទេសចិនកាលពីចុងឆ្នាំមុនហើយវាមិនបានបង្ហាញសញ្ញានៃការធ្លាក់ចុះឡើយ។

ប្រទេសប្រេស៊ីលកំពុងប្រឈមការកើនឡើងនៃករណីឆ្លងខ្លាំងជាងគេនៅអាមេរិកឡាទីននិងតំបន់ការ៉ាអ៊ីប ដែលការឆ្លងវីរុសបានកើនឡើងដល់៥លាននាក់។

ប្រទេសធំបំផុតនៅអាមេរិកខាងត្បូងនេះមានករណីឆ្លងកើតឡើងដល់២,៧៥ លាន និងមានអ្នកស្លាប់ជិតពាក់កណ្តាលនៃចំនួនអ្នកស្លាប់សរុបជាង ២សែន ២ពាន់នាក់ នៅតំបន់នេះ។មានតែសហរដ្ឋអាម៉េរិកទេដែលរងផលប៉ះពាល់អាក្រក់ជាងគេ។

ដោយមិនមានសង្ឃឹមច្រើនក្នុងការទប់ស្កាត់ការឆ្លងរាលដាលនិងការបន្ធូរបន្ថយសម្ពាធនៅតាមមន្ទីរពេទ្យពេញទៅដោយអ្នកជំងឺនោះប្រទេសមួយចំនួន ដូចជាហ្វីលីពីនបានចាប់ផ្តើមអនុវត្តវិធានការរឹតត្បិតដែលប៉ះពាល់ទៅលើការធ្វើដំណើរនិងអាជីវកម្មឡើងវិញ។

ប្រជាជនជាង ២៧លាននាក់នៅលើកោះលូហ្សុន ដោយរួមទាំង ទីក្រុងម៉ានីល ស្ថិតនៅក្រោមវិធានការបិទជាថ្មីរយៈពេលជាច្រើនសប្តាហ៍ ចាប់ពីថ្ងៃអង្គារនេះតទៅ។ ប្រជាជនត្រូវបានប្រាប់ឱ្យស្នាក់ នៅក្នុងផ្ទះលើកលែងតែពួកគេត្រូវចេញទៅទិញទំនិញចាំបាច់និងទៅហាត់ប្រាណឬទៅធ្វើការបន្ទាប់ពីចំនួននៃការឆ្លងវីរុសនៅក្នុងប្រទេសនេះបានកើនឡើងលើស ១សែននាក់៕

ប្រភព៖ រស្មីកម្ពុជា ប្រែសម្រួល៖សុខា/s