សាយ៖ ទិញអាវយឺត Run with Sai បានទាំងអាវស្អាត បានទាំងបរិច្ចាគ បានទាំងពាក់រត់ជាមួយខ្ញុំ

2021-01-08 00:56:20
ព័ត៌មាន

2021-01-08 00:56:20
ចំនួនមតិ 0 | ចំនួនចែករំលែក 0

ចន្លោះមិនឃើញ

សាយ បានរត់មកដល់ក្រុងតាខ្មៅ ខេត្តកណ្ដាលហើយ កាលពីថ្ងៃទី៧ ខែមករាម្សិលមិញនេះ មុនបន្តរត់មកកាន់រាជធានីភ្នំពេញ នាថ្ងៃទី១០ ខែមករា ដើម្បីបញ្ចប់កម្មវិធី "រត់ដើម្បីសប្បុរសធម៌ជាមួយសាយ"។ មុនបន្តដំណើរមកកាន់រាជធានីភ្នំពេញ សាយបានផ្សាយផ្ទាល់និយាយជាមួយអ្នកគាំទ្រ ដោយបានរៀបរាប់ប្រាប់ពីរឿងរ៉ាវផ្សេងៗពីការរត់ ក៏ដូចជាប្រាប់ពីដំណឹងនៃការលក់អាវយឺត "Run with Sai" ដែល Sabay បានផលិតឡើង ដើម្បីលក់យកថវិកាទាំងអស់ បរិច្ចាគជូនមន្ទីរពេទ្យកុមារអង្គរ។

សាយក៏បានស្នើឲ្យអ្នកគាំទ្រ ចូលរួមកុម្ម៉ង់ទិញអាវយឺតថ្មីនេះទាំងអស់គ្នា ដើម្បីជាអនុស្សាវរីយ៍ជាមួយកម្មវិធី Run with Sai ហើយក៏ដើម្បីពាក់រត់ជុំគ្នា នាថ្ងៃចុងក្រោយ ពីក្រុងតាខ្មៅ មកកាន់រាជធានីភ្នំពេញនាថ្ងៃអាទិត្យខាងមុខនេះផងដែរ។ កាន់តែពិសេសទៀតនោះ គឺការទិញអាវនេះ ក៏ស្មើនឹងការបរិច្ចាគផងដែរ ដោយសារថវិកា ១០០% ដែលបានពីការលក់ នឹងត្រូវប្រគល់ជូនមន្ទីរពេទ្យកុមារអង្គរ។

សាយ នឹងចេញដំណើរពីក្រុងតាខ្មៅ នាព្រឹកថ្ងៃអាទិត្យ ទី១០ ខែមករា តាមផ្លូវជាតិលេខ២ (ចាក់អង្រែ) ឆ្ពោះមកផ្លូវ ៦០ម៉ែត្រ រួចបន្តទៅក្បាលថ្នល់ មុនបន្តរត់តាមផ្លូវ ២៧១ រហូតដល់សាកលវិទ្យាល័យភូមិន្ទភ្នំពេញ។ កម្មវិធីបញ្ចប់ នឹងត្រូវធ្វើនៅក្នុងបរិវេណសាកលវិទ្យាល័យតែម្ដង។ សម្រាប់តម្រាយផ្លូវលម្អិត សាយបង្ហាញនៅលើផេករបស់ខ្លួន មុនថ្ងៃរត់មកដល់ ដើម្បីឲ្យអ្នកទាំងអស់គ្នា បានចូលរួមរត់ ពីតាខ្មៅ ឬពីចំណុចណាមួយនៃតម្រាយផ្លូវ។

សូមបញ្ជាក់ថា ដើម្បីកុម្ម៉ង់អាវយឺត Run with Sai អ្នកអាចកុម្ម៉ង់បានតាម Ecamshopping។ សូមកុម្ម៉ង់ឲ្យបានរួសរាន់ ព្រោះចំនួនអាវមានកំណត់ ពោលគឺអាវយឺតធម្មតា ដែលមានតម្លៃ ៨ដុល្លារ គឺមានចំនួន ២០០អាវ និងអាវយឺត Limited Edition ដែលមានហត្ថលេខារបស់សាយ (តម្លៃ ១៥ដុល្លារ) មានចំនួន ៥០អាវ។