មិនថាផ្ទះធំ-តូច ឬផ្ទះចាស់ក្ដី ឬ​ទើប​ចូល​ទៅរស់នៅក្ដី រឿងមួយ​ដែល​ប្រិយមិត្ត​ត្រូវ​ធ្វើ​ បើ​មិន​ចង់​ឲ្យ​បាត់​លាភ ទ្រព្យ​ គឺ​មិនត្រូវ​ធ្វើ​ឲ្យ​ធុងអង្ករ​ក្នុងផ្ទះ​ទទេរស្អាត​នោះឡើយ។ ទម្លាប់​ទុក​ឲ្យ​ធុងអង្ករ​ទទេរស្អាត​ រួចបានទៅផ្សារ​ទិញបំពេញ​បន្ថែម ជាទម្លាប់​មិន​ល្អ​នោះទេ វាជាសញ្ញា​នៃការ​ខ្វះខាត ឬធ្វើ​ឲ្យ​បាត់​បង់​ទ្រព្យ​ជាដើម។

អ្នកស្រី សុភ័ក្រ វ័យ៤៥ឆ្នាំ រស់នៅម្ដុំចំការដូង ដោយបានចេះចាំចំណាំពីចាស់ៗថា «មិនថាផ្ទះចាស់ ឬថ្មីទេ យើងកុំទម្លាប់ឲ្យធុងអង្ករទំនេរស្អាត វានាំសំណាងមិនល្អនោះទេ វាជាប្រផ្នូលនៃការខ្វះខាតហូបចុកក្នុងផ្ទះ»។

អ្នកស្រី សុភ័ក្រ ដែលជាប់សែស្រឡាយចិនបានចែករំលែករឿងហ៊ុងស៊ុយធុងអង្ករទទេស្អាត ដែលមានបម្រាមមិនល្អដូចខាងក្រោម៖

• ១. ហាមធុងអង្ករទទេ៖ ការទុកធុង ឬពាងអង្ករឲ្យទទេស្អាត គឺមិនខុសពីការបង្ហាញថាគ្រួសារកំពុងតែបាត់បង់ទ្រព្យសម្បត្តិ ភាពរុងរឿង និងការខ្វះហូបចុកជាដើម។ តាមចាស់ៗថា ធុង ឬពាងអង្ករ តំណាងឲ្យសំណាង លាភ ដូច្នេះយើងមិនគួរទុកឲ្យនៅទទេស្អាតនោះទេ។

• ២. ហាមធុងអង្ករ មានធ្លុះធ្លាយ៖ ការណ៍បើធុងអង្ករ ឬពាងអង្ករធ្លុះធ្លាយ គឺជាប្រផ្នូលនៃការរបូតចេញនូវទ្រព្យសម្បត្តិ ឬហូរចេញនូវលាភសំណាង ដូច្នេះយើងមិនគួរទុកឲ្យធុង ឬពាងអង្ករធ្លុះធ្លាយនោះទេ គប្បីជួសជុលឲ្យបានស្អាត។

តើការទុកដាក់ធុងអង្ករ ឬពាងអង្ករ ឲ្យបានត្រឹមត្រូវនាំលាភសំណាង?

មនុស្សមួយចំនួនពុំសូវបានដឹងទេ អំពីបញ្ហាខាងលើនេះ ប៉ុន្ដែអ្នកដែលជឿលើហ៊ុងស៊ុយ រមែងប្រកាន់ខ្ជាប់នូវទម្លាប់ ការទុកដាក់ធុង ឬពាងអង្ករឲ្យបានត្រឹមត្រូវ និងការដាក់ក្រដាសក្រហម ដែលមានលុយពិតប្រាកដ ឬ ៣ កាក់ នៅក្រោមបាតអង្ករ តំណាងឲ្យការនាំលាភសំណាងដល់ក្រុមគ្រួសារ។ ទន្ទឹមនឹងនេះ ត្រូវរៀបចំតុបតែងធុង ឬពាងអង្ករ ឲ្យបានស្អាត ភ្ជាប់រូបភាព ឬនិមិត្តសញ្ញា នៃលាភសំណាង នឹងធ្វើឲ្យគ្រួសាររុងរឿងមិនចេះខ្វះហូប។

អ្វីដែលបានលើកឡើងខាងលើនេះ អ្នកស្រី សុភ័ក្រ បានលើកឡើងថា គឺចេះតៗគ្នាពីចាស់ៗធ្លាប់និយាយប្រាប់កាលពីនៅតូច ហើយអ្នកស្រីក៏ធ្វើតាមទម្លាប់នេះ ប៉ុន្ដែការជឿឬមិនជឿ អាស្រ័យលើការយល់ឃើញរៀងៗខ្លួន ប៉ុន្ដែបើនិយាយអំពីការពិតវិញ ប្រសិនបើយើងទុកដាក់ធុងអង្ករឲ្យបានល្អ ដាក់នៅទីខ្ពស់បន្ដិចពីដី គ្របឲ្យជិត ស្មើនឹងការគ្រប់គ្រងស្បៀងអាហារបានត្រឹមត្រូវ ចៀសផុតពីសត្វល្អិតចង្រៃដូចជា កណ្ដុរ កន្លាត ឬផ្សិតជាដើម ដែលបំផ្លាញដល់អង្កររបស់យើង និងប៉ះពាល់ដល់សុខភាពជាដើម៕