- 2021-03-28 03:35:36
- ព័ត៌មាន
ទេវធីតាឆ្នាំថ្មី យាងមកថែរក្សាជម្ពូទ្វីប ជាបុត្រីទី ៤នៃកបិលមហាព្រហ្ម ព្រះនាងមណ្ឌាទេវី
- 2021-03-28 03:35:36
- ចំនួនមតិ 0 | ចំនួនចែករំលែក 0
ទេវធីតាឆ្នាំថ្មី យាងមកថែរក្សាជម្ពូទ្វីប ជាបុត្រីទី ៤នៃកបិលមហាព្រហ្ម ព្រះនាងមណ្ឌាទេវី
ចន្លោះមិនឃើញ
ព្រះពុទ្ធសករាជព្រះសាសនា អតិក្កន្តាកន្លងទៅហើយបាន ២៥៦៤ ត្រឹមថ្ងៃចន្ទ ១៥កើត ខែពិសាខ លុះដល់ថ្ងៃអង្គារ ១ រោច ខែពិសាខ ឆ្នាំឆ្លូវត្រីស័ក តទៅចូលពុទ្ធសករាជ ២៥៦៥ ។ មហាសង្ក្រាន្តឆ្នាំថ្មី ឆ្នាំឆ្លូវ នឹងចូលមកដល់នៅថ្ងៃពុធ ៣ កើត ខែពិសាខ ត្រូវនឹងថ្ងៃទី ១៤ ខែមេសា គ.ស ២០២១ នៅវេលាម៉ោង ៤ និង ០០នាទី ។
តាមសៀវភៅមហាសង្ក្រាន្តឆ្នាំឆ្លូវ ត្រីស័ក រៀបរៀងដោយឯកឧត្ដម អ៊ឹម បុរិន្ទ អ្នកស្រាវជ្រាវវិជ្ជាហោរាសាស្ត្រខ្មែរ ចិន សកល ទេពធីតាឆ្នាំថ្មី ដែលនឹងយាងមកគ្រប់គ្រងថែរក្សាជម្ពូទ្វីបមនុស្សលោកចាប់ពេលនេះតទៅ ជាទេវធីតាមួយព្រះអង្គ ជាអគ្គនាយិកាព្រះនាម មណ្ឌាទេវី ជាបុត្រីទី៤ នៃកបិលមហាព្រហ្ម គង់នៅចាតុម្មហារាជិកា ទ្រង់អម្ពរពណ៌អន (ខៀវខ្ចី) លម្អនៅព្រះកាណ៌ដោយសៀតផ្កាចម្ប៉ា អភរណៈកែវពិទូរ្យ ភក្សាហារទ្រង់សប្បិ (ទឹកដោះ) ព្រហស្ថស្ដាំទ្រង់ម្ជុល ព្រហស្ថឆ្វេងទ្រង់ឈើច្រត់ ទ្រង់គង់ផ្ទំបិទព្រះនេត្រនៅលើខ្នង គទ្រភៈ (សត្វលា) ជាយានពាហនៈ ។ ទើបនាំអស់ទេវបុត្រទេវធីតាទាំងមួយសែនកោដិហោះទៅកាន់គុហាកែវធម្មមាលីនាទីភ្នំកៃលាសខេត្តហិមពាន្ត ជាទីតំកល់នូវព្រះសិរសា កបិលមហាព្រហ្ម ដែលតំកល់លើពានមាស នាំមកដង្ហែប្រទក្សិណភ្នំព្រះសុមេរុរាជ តាមផ្លូវព្រះអាទិត្យចរចំនួន ៦០នាទី ។
ក្រោយដង្ហែប្រទក្សិណរួច ទើបនាំទុកនូវកន្លែងដើមវិញ ហើយប្រជុំទេវបុត្រទេវធីតាទាំងមួយសែនកោដិចូលទៅស្រង់ទឹក អនោត្តមហាស្រះ ដែលមានទឹកហូរចេញពីបំពង់ថ្មកែវដែលជាមាត់គោឧសភរាជទាំង ត ត្រជាក់ក្សេមក្សាន្តព្រះរាជហឫទ័យគ្រប់ៗព្រះអង្គ ក្នុងភគវតីសភាសាលាដែលព្រះវិស្សកម្ម ទេវបុត្រនិមិត្តថ្វាយ ដើម្បីបន្ទោបង់អពមង្គលឱ្យជ្រះស្រឡះ ហើយចម្រើននូវសិរីសួស្ដីជ័យមង្គលជន្មាយុយឺនយូរដល់ទេវតា និងមនុស្សសត្វផងទាំងឡាយ តាំងពីឆ្នាំថ្មីចូលមកនេះ បានទូលំទូលាយសុខក្សេមក្សាន្តតរៀងទៅ ៕