• 2021-06-14 08:37:08
  • ព័ត៌មាន

ក្រៅពីប្រាសាទទៅដល់សៀមរាបហើយ កុំភ្លេចទៅលេង ៥កន្លែងនេះ ទេសភាព ស្រស់ស្រាយខ្លាំងណាស់

  • 2021-06-14 08:37:08
  • ចំនួនមតិ 0 | ចំនួនចែករំលែក 0

ចន្លោះមិនឃើញ

នៅពេលដែលអ្នកសម្រេចចិត្តធ្វើដំណើរកម្សាន្តទៅកាន់ទឹកដីខេត្តសៀមរាប អ្នកប្រាកដជានឹកដល់ការទស្សនាប្រាង្គប្រាសាទបុរាណដ៏អច្ឆរិយរបស់កម្ពុជា ប៉ុន្តែក្រៅពីនេះដែនដីមួយនេះមានតំបន់ទេសចរណ៍ជាច្រើនបែបធម្មជាតិស្អាតៗ ដែលអ្នកទាំងអស់គ្នាអាចមិនធ្លាប់ដឹង ។ ថ្ងៃនេះ Sabay នឹងបង្ហាញតំបន់ទេសចរណ៍ស្អាតៗ ៥ កន្លែងនៅស្រុកបន្ទាយស្រី ភ្ញៀវទេសចរគួរតែទៅទស្សនាឱ្យបានស្គាល់នៅពេលដែលបានទៅដល់សៀមរាប ។ ក្នុងនោះមានដូចជា៖

១.ម្លប់ក្រូចម៉ាឡេ

ជារមណីយដ្ឋានថ្មីមួយកន្លែងទៀតហើយរបស់ស្រុកបន្ទាយស្រី ខេត្តសៀមរាប ស្ថិតនៅជើងភ្នំហប់ ហើយហុំព័ទ្ធជុំវិញទៅដោយទេសភាពខៀវស្រងាត់ អមជាមួយសួនផ្កា ចំរុះពណ៌ដ៏ស្រស់បំព្រង។នៅពេលដែលទេសចរធ្វើដំណើរទៅដល់ទីកន្លែងនេះ ពិតណាស់គឺមិនខកបំណងឡើយ ព្រោះថាម្លប់ក្រូចម៉ាឡេមានទេសភាពត្រជាក់ភ្នែក ត្រជាក់កាយ សប្បាយក្រោមដើមឫស្សីដ៏ស្រស់ស្អាតពណ៌ខៀវស្រងាត់ អង្គុយពិសារអាហារនៅផ្ទៃទឹក ខ្យល់បក់ល្ហៀក លាយឡំនិងខ្លឹនស្លឹកឈើ វល្លិ៍ផ្កាព្រៃ ក្រអូបសាយ ហើយអាចគយគន់ទេសភាពព្រៃព្រឹក្សានៅកន្លែងដែលខ្ពស់ក៏បានព្រោះអាចមើលឃើញទិដ្ឋភាពភ្នំជុំវិញខ្លួនពិតជាស្រស់ស្អាតក្រៃឡែង។

ប្រភពរូបភាព៖ ទៅលេងបន្ទាយស្រី ម្លប់ក្រូចម៉ាឡេ

២.រមណីយដ្ឋានទេសចរណ៍បឹងឈូកបន្ទាយស្រី

ទេសភាពដ៏ស្រស់បំព្រងនៃរមណីយដ្ឋានទេសចរណ៍បឹងឈូកបន្ទាយស្រី ផ្កាចម្រុះពណ៌រីកស្គុះស្គាយនៅមុខបឹងប្រឹងបង្អួតសម្រស់ អមជាមួយការកែលម្អនូវស្ពានឈើថ្មី ដែលជាកន្លែងកំសាន្តមួយបែប លក្ខណៈធម្មជាតិលើផ្ទៃទឹក ក្បែរជើងភ្នំ។ រមណីយដ្ឋានទេសចរណ៍បឹងឈូកបន្ទាយស្រីមានទីតាំង ស្ថិតនៅ ភូមិបន្ទាយស្រី ឃុំខ្នារសណ្តាយ ស្រុកបន្ទាយស្រី ខេត្តសៀមរាប នៅផ្លូវចូលទល់មុខ វត្តបន្ទាយស្រី ចំងាយ ២គីឡូម៉ែត្រ។ ទេសចរមកកម្សាន្តទីនេះគឺអាចជិះទូកលំហែរអារម្មណ៏ លាយឡំនឹងបរិយាកាសក៏ល្អ ខ្យល់ក៏បរិសុទ្ធ ជាឳកាសល្អសម្រាប់ជួបជុំគ្រួសារ មិត្តភ័ក្តិ បងប្អូន សម្រាកទទួលទានអាហារឆ្ងាញ់ៗ បន្ទូរអារម្មណ៍ សោយសុខសម្រស់ព្រៃភ្នំយ៉ាងត្រជាក់ចិត្តបំផុត។

ប្រភពរូបភាព៖ ទៅលេងបន្ទាយស្រី រមណីយដ្ឋានទេសចរណ៍បឹងឈូក

៣.បងធំហូមស្តេ (Bong Thom Homestay )

ប្តូរបរិកាសមកកំសាន្តអារម្មណ៏លក្ខណៈបុរាណជាមួយសំលៀកបំពាក់ និងផ្ទះអាយុកាលជាង១០០ឆ្នាំ ហើយក៏មានផ្ទះស្នាក់ផងដែរក្នុងការមកសំរាកតាមបែបធម្មជាតិព្រៃព្រឹក្សា ត្រជាក់កាយ សប្បាយភ្នែក រំលែកនូវទុកកង្វល់ បន្សល់នូវរូបភាពល្អៗ ជាមួយនិងធម្មជាតិបៃតងដ៏ស្រស់បំព្រង នៅហូមស្តេមួយកន្លែង ក្នុងស្រុកបន្ទាយស្រី។

ប្រភពរូបភាព៖ ទៅលេងបន្ទាយស្រី បងធំហូមស្តេ

៤. ធម្មជាតិស្រះខ្វាវ

តំបន់ធម្មជាតិនេះទេសចរនឹងរីករាយជាមួយទេសភាពវាលស្រែវាលស្រូវ ផ្លូវដើរស្ពានឈើ មើលនាយមើលអាយ ស្រស់ស្រាយសប្បាយចិត្ត ស្រូបយកខ្យល់ដ៏បរិសុទ្ធនាពេលព្រឹកព្រលឹម ជិះទោង ថតរូបកម្សាន្ត សប្បាយជួបជុំគ្រួសារ មិត្តភក្តិ បងប្អូន ក្នុងថ្ងៃចុងសបា្តហ៍ ញាំអាហារដ៏ឈ្ងុយឆ្ងាញ់ ។

ប្រភពរូបភាព៖ ទៅលេងបន្ទាយស្រី ធម្មជាតិស្រះខ្វាវ

៥. សួនក្រអូបឃុនរាម

សំរាកចុងសប្តាហ៏ទៅលេងបុប្ផា ក្នុងសួនផ្ការីកស្គុះស្គាយ តាមជើងភ្នំ លាយលំជាមួយខ្យល់ធម្មជាតិដ៏ស្រស់ត្រកាល ដែលមានផ្កាច្រើនប្រភេទ ច្រើនពណ៌ចំរុះបណ្តុះជាជួររៀបរយ។ ទីនេះផងដែរក៏មានទទួល ការរៀបចំបោះតង់ និងអាហាររដ្ឋានដែលមានរសជាតិឈ្ងុយឆ្ងាញ់ តំលៃសមរម្យ រសជាតិប្រចាំអ្នកភូមិឃុនរាមនេះតែម្តង។ ទីតាំងស្ថិតនៅ ឃុំឃុនរាម ស្រុកបន្ទាយស្រី ខេត្តសៀមរាប (ច្រកចូលជាប់របងមណ្ឌលសុខភាពឃុនរាម) ហើយម្នាក់ចំណាយតំលៃត្រឹមតែ៤ពាន់រៀល សម្រាប់ការកំសាន្តក្នុងសួននេះ ៕

ប្រភពរូបភាព៖ ទៅលេងបន្ទាយស្រី សួនក្រអូបឃុនរាម

ប្រភព៖តោះទៅលេងបន្ទាយស្រី និងលោកអភិបាលស្រុក ឃឹម ហ្វីណង់

អត្ថបទដោយ ៖ Su In

មតិយោបល់
អត្ថបទពេញនិយម