លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលកម្ពុជា ក្នុងកិច្ចសម្ភាស នាពេលនាំយកអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែនទៅប្រគល់ជូនលោកតា លោកយាយអាយុ១០០ឆ្នាំឡើង ដែលបានចាក់វ៉ាក់សាំងការពារជំងឺកូវីដ-១៩ នៅខេត្តកំពង់ធំ ស្ទឹងត្រែង និងរតនគីរី នាថ្ងៃទី០៧ ខែសីហា ឆ្នាំ២០២១ កន្លងទៅនេះ លោកជំទាវបានបញ្ជាក់ច្បាស់លាស់ថា ប្រសិទ្ធភាពនៃការចាក់វ៉ាក់សាំងអាស្ត្រាហ្សេនីកាដែលជាដូសទី៣គឺ៖

• វ៉ាក់សាំងការពារជំងឺកូវីដ១៩នឹងជួយខ្លួនប្រាណរបស់យើងសាំ និងមេរោគដែលបណ្ដាលឱ្យយើងកើតជំងឺកូវីដ-១៩ ដើម្បីចៀសងវាងកុំឱ្យយើងធ្លាក់ខ្លួនឈឺធ្ងន់

• នៅពេលអ្នកចាក់វ៉ាក់សាំង ប្រព័ន្ធការពារខ្លួនរបស់អ្នកបង្កើតអង្គបដិប្រាណ (អង់ទីគ័រ) និងកោសិកាប្រឆាំង និងមេរោគផ្សេងៗទៀតដែលជួយការពារអ្នកក្នុងគ្រាដែលអ្នកឆ្លងមេរោគ

• ដូសទី៣ នឹងជំរុញឲ្យសរីរាង្គកាន់តែរឹងមាំ

• ធ្វើឲ្យ អង្គបដិប្រាណ (អង់ទីគ័រ) ប្រឆាំងនឹងមេរោគឡើងខ្ពស់

• ប្រសិទ្ធភាពអាចវាយបកប្រឆាំង និងមេរោគកូវីដ១៩ បានខ្លាំងជាងមុន

សូមបញ្ជាក់ថា ដោយសារស្ថានភាពនៃមេរោគកូវីដ១៩ បន្តវិត្តន៍ថ្មីបន្ថែមទៀត និងកាន់តែកាចសាហាវជាងមុនទៀតនោះ ដោយមើលឃើញពីស្ថានភាពនេះ ប្រមុខរាជរដ្ឋាភិបាល ពិសេសក្រសួងសុខាភិបាលកម្ពុជា បានជំរុញកាន់តែខ្លាំង ដោយតម្រូវចាក់វ៉ាក់សាំងប្រឆាំងមេរោគកូវីដ១៩នេះ បន្ថែមចំនួន១ដូសទៀត ដើម្បីបង្កើនប្រសិទ្ធភាព ការពារ ប្រឆាំង និងបង្កើតអង្គបដិប្រាណ ក៏ដូចជាជំរុញសរីរាង្គរបស់យើងកាន់តែខ្លាំងបន្ថែមទៀត ដើម្បីទប់ស្កាត់ការឆ្លងរីករាលដាលនៃមេរោគកូវីដ១៩ គ្រប់ប្រភេទ ៕