​កាលពីពេលកន្លងទៅ ក្រុមការងារមន្ទីរវប្បធម៌និងវិចិត្រសិល្បៈខេត្តកំពង់ចាម បានចុះត្រួតពិនិត្យ និងទទួលយកវត្ថុបុរាណចំនួន១ ពីប្រជាពលរដ្ឋនៅក្នុងភូមិស្វាយរ័ក្ស ឃុំសូរ្យសែន ស្រុកព្រៃឈរ ខេត្តកំពង់ចាម។

វត្ថុបុរាណនេះនឹងត្រូវយកទៅរក្សាទុកនៅ​ក្នុងឃ្លាំងមន្ទីរវប្បធម៌និងវិចិត្រសិល្បៈខេត្តកំពង់ចាម ដោយសារតែ​បច្ចុប្បន្ន​ខេត្តកំពង់ចាមមិនទាន់មានសារមន្ទីរសម្រាប់តម្កល់នូវវត្ថុបុរាណ ផ្នែកបេតិកភណ្ឌ និងវប្បធម៌នៅឡើយ ប៉ុន្តែ​អាជ្ញាធរនឹងរៀបចំឲ្យមាននៅថ្ងៃអនាគត។ រូបសំណាកនេះត្បិតកំបុតព្រះសិរ (ក្បាល) ទៅហើយក្ដី តែយើងអាចសន្និដ្ឋានបានថាជារូបសំណាកព្រះនាងទុគ៌ា​ជាមហេសីរបស់ព្រះសិវ:ជាទេពទេវី តំណាងឲ្យសង្គ្រាម ដោយ​សារមានរូបសត្វក្របីនៅពីខាងក្រោម។

នេះមិនមែនជាលើកដំបូងទេ ដែលពលរដ្ឋ​ បានប្រទះឃើញវត្ថុសិល្បៈ របស់បុរាណហើយប្រគល់ឲ្យទៅអាជ្ញាធរ ដែលភាគច្រើនវត្ថុបុរាណទាំងនោះរកឃើញនៅក្នុងដីអំឡុងពួកគេភ្ជួររាស់ ស្រែចម្ការ។ កន្លង​មក​ជារឿងៗប្រជាជនខ្មែរតែងប្រទះឃើញក្អម ក្រឡ ភាជ រូបសំណាក និងបំណែកវត្ថុបុរាណនានា ហើយបានប្រគល់ជូនអាជ្ញាធរមូលដ្ឋាន ដើម្បីបញ្ជូនបន្តទៅសារមន្ទីរខេត្ត ឬសារមន្ទីរជាតិដើម្បីរក្សាទុក ដែលវាជាសកម្មភាពសហការរបស់ពលរដ្ឋ ដ៏គួរឲ្យកោតសរសើរ៕