កម្ពុជា ជាប្រទេសដែលសំបូរទៅដោយធនធានធម្មជាតិ ព្រៃព្រឹក្សា សមុទ្រ ភ្នំ ទឹកធ្លាក់ជាច្រើនកន្លែង ដែលមិនត្រឹមតែអាចទៅលេងកំសាន្តបាន តែក៏អាចធ្វើការស្រាវជ្រាវ ដើម្បីចងក្រងជាឯកសារនៅក្នុងការសិក្សាបានផងដែរ។ មិនត្រឹមតែប៉ុណ្ណោះ ការផ្តិតយករូបភាពពីទីកន្លែងទាំងនោះ ហើយយកមកចែកចាយបន្តនៅបណ្តាញសង្គមហ្វេសប៊ុកពិតជាបានផ្តល់អត្ថប្រយោជន៍យ៉ាងច្រើនរាប់មិនអស់ ព្រោះទាំងនេះបានទាំងជួយផ្សព្វផ្សាយកន្លែងទេសចរណ៍ស្អាតៗ នៅក្នុងស្រុក ហើយក៏បានជួយដោយប្រយោល ក្នុងរកចំនូលចូលប្រទេសជាតិផងដែរ។ ថាមើលហ៍ ល្អប៉ុណ្ណាទៅ?

តោះ ឥលូវមកស្គាល់ឈ្មោះ និងទីតាំងទឹកធ្លាក់ចំនួន ៥កន្លែង នៅកម្ពុជា ដែលមានសម្រស់ស្រស់ស្អាត មិនចាញ់គ្នា

១. ទឹកធ្លាក់ បរឡាង

ជាតំបន់ទេសចរណ៍ធម្មជាតិ ដែលមានទេសភាពស្រស់ស្អាត ជាមួយនឹងរុក្ខជាតិខៀវស្រងាត់ ព្រៃភ្នំព័ទ្ធជុំជិត ជាទឹកធ្លាក់ពីលើភ្នំ ដែលបង្កើតបានជាទស្សនីយភាព សម្រាប់អ្នកទេសចរដែលចូលចិត្តធម្មជាតិ ស្តាប់សំលេងទឹកធ្លាក់មកពីលើកំពូលភ្នំ និងងូតទឹកលេងកម្សាន្ត។​ ទឹកធ្លាក់បរឡាង មានចម្ងាយប្រហែល ៨៣គីឡូម៉ែត្រ ពីទីរួមខេត្ដបាត់ដំបង ដោយធ្វើដំណើរចេញពីទីរួមខេត្តបាត់ដំបង ទៅតាមផ្លូវលេខ ៥៧ ឆ្ពោះទៅកាន់ស្រុកសំឡុត បត់ខាងឆ្វេងតាមផ្សារត្រែង ដើម្បីទៅដល់រមណីយដ្ឋាននេះ។

២. ទឹកធ្លាក់ ចាក់អង្រែក្រោម (ទឹកធ្លាក់អន្លង់ស្វាយ)

ជាតំបន់ទេសចរណ៍ធម្មជាតិ ដែលលាក់ខ្លួនពួនអាត្មានៅលើភ្នំត្បែង និយាយពីសម្រស់វិញ ស្រស់ស្អាតមិនចាញ់ទឹកជ្រោះកន្លែងផ្សេងៗ ដែលមានលើភ្នំត្បែងនោះទេ។ ជាតំបន់ទឹកធ្លាក់ បែបកំដៅសាច់ដុំ គឺថាបើចង់ទៅទឹកធ្លាក់មួយកន្លែងហ្នឹង ត្រូវធ្វើដំណើរឡើងភ្នំចុះភ្នំ និយាយពីស្ថានភាពផ្លូវឡើងវិញ មិនសូវជាស្រួល តែស៊ូបន្តិចទៅបើចង់ទៅកន្លែងស្អាតមួយហ្នឹង។ ទឹកធ្លាក់ចាក់អង្រែក្រោម ស្ថិតនៅលើ ភ្នំត្បែងមានជ័យ ខេត្តព្រះវិហារ។

៣. ទឹកធ្លាក់ ជ្រោះភ្នំ៥៣

គ្រាន់តែលឺឈ្មោះក៏ចង់ទៅបាត់ហើយ តែថាទីនោះមានអ្វីដែលទាក់ទាញខ្លះទៅ? មិនត្រឹមតែជាតំបន់ដែលមានទឹកធ្លាក់ជាប់នឹងជញ្ជាំងភ្នំ តែជាតំបន់រមនីយដ្ឋានដែលមានកន្លែងអង្គុយញ៉ាំអាហារជួបជុំគ្រួសារ អង្គុយមើលទេសភាព ហើយលឺមកថា មានរូងភ្នំ ជម្រៅជ្រៅ ដែលធ្លាប់មានអ្នកសច្ចំ ចូលទៅតាំងសម្មាធិថែមទៀតផង។ ក្បែរៗនេះទេ គឺស្ថិតនៅលើភ្នំព្រឹក ស្រុកភ្នំព្រឹក ខេត្តបាត់ដំបង ជាប់និងព្រំដែនកម្ពុជា- ថៃ។

៤. ទឹកធ្លាក់ លែងអង លែងឃិន

មាន​ទី​តាំង​ស្ថិត​​ក្នុង​​ភូមិ​​ពូ​ហ្យា​ម​​ ឃុំ​​សែន​​មនោ​រម្យ​ ស្រុក​​អូរ​​រាំ​ង​​ ចម្ងាយ​​២៦ ​គីឡូ​ម៉ែត្រ​​ពី​​ក្រុង​​សែន​​ម​នោ​រម្យ ​​ខេត្ត​មណ្ឌល​គីរី។ ​លែង​​អង​ ​និង​​លែង​​ឃិន​ ជាតំបន់​ទឹកធ្លា​ក់​​ធម្ម​ជាតិ​ ដែលហ៊ុមព័ទ្ធ​ដោយ​​ព្រៃព្រឹក្សាចម្រុះតូចធំ ជាមួយទឹក​ត្រជា​ក់​​ល្ហឹម​ ​អំណោយផលដល់អ្នកទេសចរ​ ងូត​ទឹ​ក​ក​ម្សាន្ត ​ល​ម្ហែកាយ​​ស្រស់​​ស្រាយ​​ចុងសប្តាហ៍​​ ។

៥. ទឹកធ្លាក់ បុស្ស​ស្បូវ

ជា​រមណីយដ្ឋាន​ទេសចរណ៍​ដ៏​ទាក់ទាញ​មួយ ដែល​លាក់ខ្លួន​នៅ​ជើងភ្នំ​ដងរែក ខេត្តព្រះវិហារ​។ ទឹកធ្លាក់​ដែលមាន​ធម្មជាតិ​ស្រស់បំព្រង អម​ព្រៃឈើ​តូចធំ លាយឡំ​ជាមួយនឹង​ផ្ទាំង​ថ្ម តូច​-​ធំ នេះ មាន​ទីតាំងនៅ​ភូមិ​តេ​ជោ​បុស្ស​ស្បូវ ឃុំ​ស្រអែម ស្រុក​ជាំ​ក្សាន្ត ខេត្តព្រះវិហារ​ ៕

តោះ ដាក់ម៉ាទ្រីប ងូតទឹកជុំគ្នា ឱ្យណាណីមើលហ៍