- 2022-01-03 06:44:00
- ព័ត៌មាន
សម្ដេចតេជោ ហ៊ុន សែន៖ ពលរដ្ឋគាត់ទៅចាក់វ៉ាក់សាំង ហេតុអីពេទ្យមិនឲ្យចាក់?
- 2022-01-03 06:44:00
- ចំនួនមតិ 0 | ចំនួនចែករំលែក 0
សម្ដេចតេជោ ហ៊ុន សែន៖ ពលរដ្ឋគាត់ទៅចាក់វ៉ាក់សាំង ហេតុអីពេទ្យមិនឲ្យចាក់?
ចន្លោះមិនឃើញ
ប្រទេសកម្ពុជាជាប្រទេសនាំមុខមួយក្នុងតំបន់អាស៊ាននាមជាប្រទេសដែលមានអត្រាចាក់វ៉ាក់សាំងលើប្រជាពលរដ្ឋបានច្រើនជាងគេ។ ប៉ុន្តែនៅក្នុងនេះ គេបានរកឃើញថា មានប្រជាពលរដ្ឋជាច្រើនម៉ឺននាក់ មិនបានចាក់នោះទេ ដែលសម្ដេចតេជោ ហ៊ុន សែន បានលើកឡើងនៅព្រឹកថ្ងៃទី ៣ មករា ២០២២នេះ។
ថ្លែងនៅក្នុងអញ្ជើញបើកការដ្ឋានគម្រោងសាងសង់លើកកម្រិតគុណភាពផ្លូវជាតិលេខ៤៨ ប្រវែងសរុប ១៤៨គ.ម ពីអូរជ្រៅដល់ក្រុងខេមរភូមិន្ទ ខេត្តកោះកុង។ តាមសម្ដេចតេជោ គិតត្រឹមថ្ងៃនេះ សម្ដេចបានរកឃើញតួលេខប្រជាពលរដ្ឋដែលមិនបានចាក់វ៉ាក់សាំងមានចំនួន ៧ម៉ឺននាក់។ តួលេខលេខនេះ មានអ្នកមិនបានចាក់ដោយសារ កត្តាផ្ទាល់ខ្លួន ដូចជាសម្រាលកូនចំពេលគេបើកយុទ្ធនាការចាក់វ៉ាក់សាំងជាដើម។
ក្រៅពីនេះ មានហេតុផលមួយចំនួនដែលគ្រូពេទ្យមិនអនុញ្ញាតិឲ្យចាក់ បើទោះពលរដ្ឋបានទៅដល់ទីកន្លែងចាក់ហើយក៏ដោយ។ "ពលរដ្ឋគាត់ទៅចាក់វ៉ាក់សាំង ហេតុអីពេទ្យមិនឲ្យចាក់? អីចឹងខ្ញុំឲ្យជំទាវឱ វណ្ណឌីន បញ្ជាទៅគ្រប់ទីកន្លែងឲ្យពិនិត្យមើលឡើងវិញ!”៊។
នៅមុនកម្ពុជាបើកយុទ្ធនាការចាក់វ៉ាក់សាំងកូវីដ១៩ជាផ្លូវការ ក្រសួងសុខាភិបាលបានជូនដំណឹងអំពីប្រភេទបុគ្គលដែលមិនអាចទទួលយកការចាក់វ៉ាក់សាំងកូវីដ១៩បាន ក្នុងនោះមានដូចជា៖ អ្នកដែលមានបញ្ហាផ្លូវដង្ហើម បុគ្គលដែលពិបាកដកដង្ហើម ឬក៏បុគ្គលដែលមានការហើម រលាកសរសៃឈាម ឬក៏អ្នកដែលចេញបន្ទាលតាអាកក៏មិនអាចចាក់បានដែរ ។ ក្រៅពីនេះ ស្ត្រីមានផ្ទៃពោះ ឬស្ត្រីបំបៅទឹកដោះ ឬស្ត្រីមានផែនការពពោះក្នុងរយៈពេល ៣ ខែ ជាដើម។
យ៉ាងណា គេមិនទាន់ដឹងថា ក្នុងចំណោមប្រជាពលរដ្ឋប្រមាណ ៧ម៉ឺននាក់ដែលពេទ្យមិនអនុញ្ញាតិឲ្យចាក់នោះ ស្ថិតក្នុងចំណោមបុគ្គលដែលត្រូវហាមឃាត់តាមក្បួនវេជ្ជសាស្ត្រនៃការប្រើប្រាស់វ៉ាក់សាំងកូវីដ១៩ ឬយ៉ាងណា។ ដូច្នេះហើយ សម្ដេចតេជោ បានស្នើឲ្យមន្ត្រីទទួលបន្ទុក សើរើ និងពិនិត្យករណីនេះឡើងវិញ ក្នុងនោះ សម្ដេចលើកឡើងថា អ្នកកើតហឺត មិនឲ្យចាក់តែអំឡុងពេលកំពុងតែកើតជំងឺ មិនមែនជាអ្នកដែលមានប្រវត្តិកើតជំងឺនោះទេ។
ការចាក់វ៉ាក់សាំងនៅកម្ពុជា គិតត្រឹមថ្ងៃទី០២ ខែមករា ឆ្នាំ២០២២ - អាយុ ១៨ឆ្នាំ ឡើងទៅ = 101.51% - អាយុ ១២-១៧ឆ្នាំ = 99.12% - អាយុ ០៦-១១ឆ្នាំ = 105.23%៕