- 2014-11-25 17:28:29
- ព័ត៌មាន
ភ្នំពេញនៅវិលវល់ជុំវិញប្រធានបទបាញ់សម្លាប់កណ្ដាលរាជធានី
- 2014-11-25 17:28:29
- ចំនួនមតិ 0 | ចំនួនចែករំលែក 0
ភ្នំពេញនៅវិលវល់ជុំវិញប្រធានបទបាញ់សម្លាប់កណ្ដាលរាជធានី
ចន្លោះមិនឃើញ
-សមត្ថកិច្ច និងអ្នកនាំពាក្យបិទទូរសព្ទ ទាក់ទងលែងចូល
-អ្នកលេងហ្វេសប៊ុករឹតតែដាក់ទម្ងន់ការសង្ស័យទោះបីសមត្ថកិច្ចបានបដិសេធ
-លោកខៃ ប្រសិទ្ធ បានសម្រេចចិត្តចាកចេញពីរាជធានីភ្នំពេញភ្លាមៗក្រោយឃាតកម្មមិនដល់១៥ម៉ោង
-វិនិយោគិនព្រួយបារម្ភពីបញ្ហាសុវត្ថិភាពកណ្ដាលក្រុងភ្នំពេញ
-ឯកឧត្តម ខៀវ កាញារីទ្ធ ថាបើជាសីលធម៌ គឺ ខុស បើវិជ្ជាជីវៈរឹតតែខុស
ដំណើរការស៊ើបអង្កេតលើសំណុំរឿងបាញ់សម្លាប់ឧកញ៉ាកណ្ដាលរាជធានីភ្នំពេញកំពុងប្រព្រឹត្តិទៅ ឯព្យុះចចាមអារាម នៅតែបន្តលេបត្របាក់ភាពស្ងប់សុខរបស់រាជធានីនេះ ទោះបីហេតុការណ៍អកុសលបាញ់សម្លាប់បុរសអ្នកមានទ្រព្យធន បានរំលងទៅ ជិត៧២ម៉ោងហើយក៏ដោយ។
នៅចំពេលដែល ការជជែកនៅតែបន្តមិនដាច់ស្រេចក្នុងចំណោមមហាជន អំពីមូលហេតុនៅពីក្រោយការបាញ់ប្រហារ? អំពីអ្នកណាទៅជាជនដៃដល់ ?ហើយថា តើសមត្ថកិច្ចអាចបំបែកករណីនេះបានដែររឺយ៉ាងណា?លេខទូរសព្ទអ្នកនាំពាក្យ នៃអគ្គស្នងការនគរបាលជាតិ ស្នងការដ្ឋាននគរបាលរាជធានីភ្នំពេញ ក៏មិនអាចទំនាក់ទំនងបានទៀតឡើយនៅព្រឹកនេះ។
ទោះបីយ៉ាងណា នៅក្នុងគេហទំព័រផ្លូវការរបស់អគ្គស្នងការដ្ឋាននគរបាលជាតិចេញឡើងនៅ ព្រឹកថ្ងៃអង្គារនេះ អគ្គស្នងការរង និង ជាអ្នកនាំពាក្យអគ្គស្នងការដ្ឋានគរបាលជាតិឧត្ដមសេនីយ៍ឯក គៀត ច័ន្ទថារិទ្ធ ត្រូវបានស្រង់សម្តីមកថា សមត្ថកិច្ចកំពុងតែពន្លឿនការប្រមូលភស្តុតាងនឹងឈានទៅវែកមុខឃាតក ។
គេហទំព័ររបស់អគ្គស្នងការនគរបាលជាតិ
ប្រភពដដែលពណ៌នាថា ក្នុងចំណោមគ្រាប់កាំភ្លើង ដែលបាញ់ស្រោចលើជនរងគ្រោះទាំង ១០ គ្រាប់ ហើយបានផ្ទុះ ចំនួន៦គ្រាប់ អាចនាំសមត្ថកិច្ចទៅដល់ការសន្និដ្ឋានពីការព្យាយាមអាមេ បញ្ចូលគ្រាប់របស់ឃាតក ហើយថា សមត្ថកិច្ច រកបានពន្លឺជាច្រើនទៀត ក្នុងនោះកាមេរ៉ាវីដេអូសុវត្ថិភាពក៏ជាផ្នែកមួយយ៉ាងសំខាន់ ។
ស្លាកស្នាម ធ្វើកោសល្យវិច័យ អ្នករងគ្រោះថ្នាក់គឺត្រូវ ចំខ្នងធ្លាយទៅទ្រូងស្តាំ ត្រូវចំទ្រូងស្តាំ២គ្រាប់ បៀមគ្រាប់ជាប់ដងកាំបិតឆ្វេង បៀមគ្រាប់ជាប់ដៃចំហៀងខាងស្កាំ និង ម្រាមដៃស្ដាំត្រូវបញ្ជិត ។
អ្នកលេងហ្វេសប៊ុកដាក់ការសង្ស័យ
ឃាតកដែលត្រូវបានថតជាប់នូវសកម្មភាពបាញ់ប្រហារមិនទាន់ត្រូវបានគេកំណត់អត្តសញ្ញាណនៅឡើយរហូតដល់ព្រឹកថ្ងៃទី ២៥ ខែ វិច្ឆិកាដែលសរុបទៅប្រមាណជាង ៦០ ម៉ោងក្រោយពេលករណីធ្វើឃាតដ៏គឃ្លើន បានកើតមានឡើងនោះ។
ទោះបីយ៉ាងណាមិនដល់៥ម៉ោងក្រោយពីការបាញ់ប្រហារនោះផងវីដេអូឃ្លីបដែលថតបានពីកាមេរ៉ាសុវត្ថិភាពត្រូវបង្ហោះតាមបណ្ដាញសង្គមភ្ជាប់ដោយទាំងទស្សនៈវាយតម្លៃលើជនគួរអោយសង្ស័យដែលពាក់ឯកសណ្ឋានស៊ីវិល ស្រដៀងនឹងឃាតកតុបតែងខ្លួនពេលធ្វើសកម្មភាព។
ការបង្ហោះនោះបានបង្កនូវការជជែកវែកញែកមិនឈប់ឈរក្នុងចំណោមមហាជនរហូតដល់ ឧត្ដមសេនីយ៍ត្រីជួន ណារិន្ទ ស្នងការរងនគរបាលរាជធានីភ្នំពេញ បានប្រាប់បណ្ដាញផ្សព្វផ្សាយក្នុងស្រុកថាជនដែលត្រូវបានគេបង្ហោះរូបក្នុងហ្វេសបុកនោះគឺមន្ត្រីនគរបាលផ្នែកអន្តរាគមន៍មកពីខណ្ឌចំការមនមានឈ្មោះសុក ម៉ូនីត្រា ដែលចុះបំពេញភារកិច្ចនៅទីកើតហេតុ។
រូបភាពដកចេញពី Facebook
សន្តិសុខសង្គមស្ថិតនៅជាចំណុចស៊ីប
ការបាញ់សម្លាប់ចុងក្រោយនេះ បានបន្តធ្វើអោយមានការរំជើបរំជួលក្នុងមជ្ឈដ្ឋានអ្នកមានប្រាក់ នឹងទេសចរបរទេសជាច្រើនផងដែរ។ ក្នុងចំណោមនោះ តារាភាពយន្តខ្មែរដ៏ល្បីឈ្មោះ លោកខៃ ប្រសិទ្ធ បានសម្រេចចិត្តចាកចេញពីរាជធានីភ្នំពេញភ្លាមៗ មិនដល់១៥ម៉ោងក្រោយអំពើឃាតកម្មនេះកើតឡើង។ «នេះជាការចាកចេញមុនកាលកំណត់របស់គាត់! គាត់ប្រាប់ថា សន្តិសុខសង្គមបានធ្វើ អោយប៉ះពាល់ជាខ្លាំងដល់ដំណើរត្រឡប់មកលេងស្រុកកំណើតនិងកិច្ចការមនុស្សធម៌មួយចំនួននៅទីនេះ!»ប្រភពនិយាយប្រាប់Sabay។
អ្នករងគ្រោះជាអ្នកមានទ្រព្យធនក្នុងវ័យ ៥៧ ឆ្នាំ
ឧកញ៉ា អ៊ឹង ម៉េងជឺ មានមុខរបរជាថៅកែស៊ីម៉ង់ត៍ ហាងពេជ្រ និង ដីធ្លីមួយចំនួន។ មុនពេលរងគ្រោះ សាក្សីបានឃើញលោកជិះរថយន្តឡិចស៊ីស Lexus 570 ពណ៌ឈាមជ្រូក មកកាន់ហាងលក់ផ្លែឈើក្បែរអាងទឹកអូឡាំពិក។ ពេលអ្នករងគ្រោះបើកទ្វារថយន្តចុះ មនុស្សពីរនាក់ជិះម៉ូតូសេ១២៥ ពណ៌ខ្មៅ ស៊េរីឆ្នាំ២០១៤ បានលេចមុខហើយអ្នកជិះខាងក្រោយពាក់អាវពណ៌ពងមាន់ ពាក់មួកកន្ទិប បានចុះពីលើម៉ូតូហើយដកកាំភ្លើងខ្លីដេញបាញ់លោកឧកញ៉ា អ៊ឹងម៉េងជឺ ទោះបីលោកខំរត់ក៏ត្រូវជនដៃដល់ដដែលនេះ បាញ់ប្រហារស្រោចខ្លួនបន្ថែមទៀត រហូតដល់ដេកដួលនៅនឹងកន្លែង៕
វិនិយោគិនព្រួយបារម្ភពីបញ្ហាសុវត្ថិភាពកណ្ដាលក្រុងភ្នំពេញ
លោកឧកញ៉ា ចេង ខេង ប្រធានសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា និងជាអគ្គនាយកក្រុមហ៊ុនអចលនទ្រព្យ CPL Cambodia Properties Limited បានស្ដីបន្ទោសថាឃាតកម្មលើឧកញ៉ាមានទ្រព្យសម្បត្តិដែលនៅតែស្ថិតក្នុងការតាមដានលទ្ធផលពីមហាជន ជាការគំរាមស្រស់ៗលើសុវត្ថិភាព សម្រាប់អ្នកវិនិយោគទុនទាំងក្រៅប្រទេស និងក្នុងប្រទេស។ វារឹតតែជារូបភាពដ៏អាក្រក់សម្រាប់កម្ពុជាដែលកំពុងព្យាយាមទាក់ទាញវិនិយោគិន តែខ្មាន់កាំភ្លើងអាចបាញ់បោះឆៅៗទៅលើជនរងគ្រោះបែបនេះ។ អ្នកវិនិយោគត្រូវការសំខាន់ណាស់នូវសុវត្ថិភាពស្ងប់សុខ។ លោកក៏សម្ដែងការសោកស្ដាយនូវមរណភាពរបស់ឧកញ៉ាមានជំនួញច្រើនមុខ៖ "គាត់មានធនធាន និងមុខជំនួញច្រើន ដែលជួយដល់សង្គម ផ្ដល់ការងារ ជួយឲ្យមានកំណើនវិនិយោគទុន"។
យោបល់ឯកឧត្តមខៀវ កាញារីទ្ធ ជុំវិញការបន្តភាគ របស់បណ្ដាញផ្សព្វផ្សាយលើករណីឃាតកម្មនេះ
ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន មានប្រសាសន៍ថា "បើជាសីលធម៌ គឺ ខុស បើវិជ្ជាជីវៈរឹតតែខុស"។ ការលើកឡើងរបស់ឯកឧត្តម ខៀវ កាញារីទ្ធ បែបនេះ គឺ ឆ្លើយតបទៅនឹងសំណួររបស់ Sabay ថា តើឯកឧត្ដមយល់យ៉ាងណានៅពេលដែលបណ្ដាញផ្សព្វផ្សាយនានានៅតែបន្តទទួលផលចំណេញពីសេចក្តីរាយការណ៍និងវិភាគជុំវិញករណីឃាតកម្មនេះ?
