សហរដ្ឋអាមេរិកថាឥឡូវនេះមិនមានគម្រោងការណ៍ផ្តល់ វ៉ាក់សាំងបង្ការជំងឺជំងឺកូវីដ ១៩ទៅឲ្យប្រទេស កូរ៉េខាងជើងនោះឡើយ ក្រោយលោក Kim Jong-unប្រកាសរកឃើញករណីឆ្លងជំងឺនេះជា លើកដំបូងនិង ប្រជាជនជាច្រើននាក់ទៀតកំពុងតែព្រួយបារម្ភថាឆ្លងមេរោគដ៏កាចសាសហាវមួយនេះជាបន្តបន្ទាប់។ នេះបើយោងតាមការ ចេញផ្សាយដោយ សារព័ត៌មាន Reuters នៅថ្ងៃសុក្រ ទី១៣ ខែឧសភា ឆ្នាំ២០២២។

លោកស្រី Jen Psaki អ្នកនាំពាក្យ សេតវិមានរបស់អាមេរិកបានឲ្យដឹងថា «កន្លងមកប្រទេសផ្តាច់ការមួយនេះ បានបដិសេធម្តងហើយម្តងទៀត ដោយមិនព្រមទទួលយកជំនួយវ៉ាក់សាំងពី កូវ៉ាក់ (COVAX)នោះឡើយ។»

លោកស្រីបានបន្តថា បច្ចុប្បន្ន អាមេរិកមិនមានគម្រោងផ្តល់វ៉ាក់សាំងដល់កូរ៉េខាងជើងទេ ប៉ុន្តែយ៉ាងណាអាមេរិកនឹង បន្តគាំទ្រកិច្ចខិតខំប្រឹងប្រែងអន្តរជាតិ ដើម្បីផ្តល់ជំនួយមនុស្សធម៌ ដល់ប្រជាជនកូរ៉េខាងជើងដែលកំពុងតែរងគ្រោះ។

សូមជម្រាបថា តាំងពីពិភពលោកបានវាយលុកដោយសារតែជំងឺកូវីដ១៩អស់រយ:ពេលជាង២ឆ្នាំមក នេះជាលើកដំបូងហើយដែលកូរ៉េខាងជើង ប្រកាសរកឃើញអ្នកឆ្លង និងស្លាប់ជាបន្តបន្ទាប់ ខណ: មានមនុស្ស ១៨៧ ០០០ នាក់ដែលមានអាការៈគ្រុនក្តៅកំពុងត្រូវបានដាក់ឱ្យនៅដាច់ដោយឡែក និងបាន បិទប្រទេសមិនឲ្យមានភ្ញៀវទេសចរ ឬការនាំទំនិញចេញចូលនោះឡើយ៕