កំពុងក្ដៅ! ស្នងការដ្ឋាននគរបាលរាជធានីភ្នំពេញ រង់ចាំម្ចាស់គណនីឈ្មោះ Sambath Viriya ចូលបំភ្លឺ ក្រោយធ្លាយរឿងបូលីសពិន័យ ១៥០ដុល្លារព្រោះបត់ស្ដាំ

2022-05-20 05:09:36
ព័ត៌មាន

2022-05-20 05:09:36
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញនៅព្រឹកនេះ បានចេញសេចក្ដីជូនដំណឹងបន្ទាន់មួយ ឲ្យម្ចាស់គណនីហ្វេសប៊ុកឈ្មោះ Sambath Viriya ចូលមកសហការបំភ្លឺ ក្រោយធ្លាយរឿងសមត្ថកិច្ចពិន័យ ១៥០ដុល្លារព្រោះបត់ស្ដាំ។

ការជូនដំណឹងរបស់ ក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ ក្រោយពីម្ចាស់គណនីហ្វេសប៊ុកខាងលើ បើកបង្ហាញពីករណីផ្ទាល់ខ្លួនរបស់គេ ដែលត្រូវសមត្ថកិច្ចចាប់ផាកពិន័យទី១រឿងជិះរថយន្តបត់ស្ដាំ និងទី២រឿងបើកបរមិនមានកាតគ្រី សរុបទឹកប្រាក់ ២៥០ ដុល្លារ បូកនឹង ១៥ម៉ឺនរៀលទៀត ប៉ុន្តែតម្លៃផ្ដល់ជូនពិន័យជាក់ស្ដែង ១៥០ដុល្លារជាតម្លៃសម្រួល និងព្រមព្រៀងគ្នា។

មិនត្រឹមប៉ុណ្ណឹង សមត្ថកិច្ចនៅបានប្រើពាក្យមិនសមរម្យលើរូបនាងទៀត។ នេះបើតាមការបង្ហោះនៅលើបណ្ដាញសង្គមរបស់ម្ចាស់គណនីឈ្មោះ Sambath Viriya។ ក្រោយឃើញករណីនេះ ក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញ បានព្យាយាមទំនាក់ទំនងទៅម្ចាស់គណនីដើម្បីរកការស្រាយបំភ្លឺបន្ថែម។

ប៉ុន្តែការព្យាយាមរយៈពេល ៣ថ្ងៃនេះរបស់ក្រុមការងារស្នងការដ្ឋាននគរបាលរាជធានីភ្នំពេញ មិនបានជោគជ័យ ដោយសារមិនទទួលបានការឆ្លើយតប។ ដូច្នេះហើយ ស្នងការដ្ឋាននគរបាលរាជធានី ស្នើ បងប្អូនប្រជាពលរដ្ឋដែលស្គាល់ម្ចាស់គណនីនេះ សូមជួយប្រាប់ ក៏ដូចជាផ្តល់ដំណឹងដល់គាត់ដេីម្បីមកបំភ្លឺការពិតដល់សមត្ថកិច្ច។

"បេីនៅតែមិនមានការឆ្លេីយតប ហេីយផុសព័ត៌មានដូច្នេះទៀត ក្រុមការងារ នឹងបំភ្លឺបញ្ចប់ថាជា គណនីក្លែងក្លាយ ផុសព័ត៌មានមិនពិត ដែលធ្វេីឱ្យប៉ះដល់កិត្តិយសរបស់មន្ត្រីអនុវត្តច្បាប់"។ ការបញ្ជាក់របស់ ក្រុមការងារព័ត៌មាន និងប្រតិកម្មរហ័សនៃស្នងការដ្ឋាននគរបាលរាជធានីភ្នំពេញលើបណ្ដាញសង្គមព្រឹកនេះ។

តាមការបង្ហោះនៅលើបណ្ដាញសង្គមរបស់ម្ចាស់គណនី Sambath Viriya បានឲ្យដឹងថា ករណីខាងលើ បានកើតលើនាងកាលពីព្រឹកថ្ងៃទី ១៨ ឧសភា ២០២២ វេលាម៉ោង ៩ៈ១៣នាទីព្រឹកនៅស្តុបបូកគោ ដែលហៅករណីនេះថា ជារឿងហួសចិត្តបំផុតដែលនាងបានជួប។ សូមអានលម្អិតសាច់រឿងរបស់ Sambath Viriya ខាងក្រោម៖

ឧត្ដមសេនីយ៍ឯក ស ថេត អគ្គស្នងការរងនគរបាលជាតិ កាលពីដើមឆ្នាំ ២០១៩ បានបញ្ជាក់ថា ត្រូវកែជាបន្ទាន់នៅពេលពលរដ្ឋបត់ស្ដាំទោះភ្លើងស្តុបពណ៌ក្រហមក៏ដោយ ក៏មិនត្រូវផាកពិន័យដែរ។

តាមច្បាប់ស្តីពីចរាចរណ៍ផ្លូវគោកត្រង់មាត្រា១១ ចែងថាភ្លើងសញ្ញាចរាចរណ៍បញ្ចេញពណ៌ក្រហមជាសញ្ញាឃាត់ឲ្យឈប់ អ្នកបើកបរត្រូវឈប់នៅបន្ទាត់គំនូសពណ៌ស កាត់ទទឹងទ្រូងផ្លូវឬមុខគំនូសសម្រាប់ថ្មើរជើងឆ្លងកាត់។ បើគ្មានឧបសគ្គនៅខាងមុខយាន្តជំននិះនៅខាងស្តាំបំផុតអាចបត់ស្តាំបានដោយប្រុងប្រយ័ត្ន លើកលែងតែមានភ្លើងសញ្ញាព្រួញក្រហមហាមបត់ស្តាំ៕

អត្ថបទ៖ ទារិកា