អន់ចិត្តស្ដូក! នារីខ្មែរនៅកូរ៉េម្នាក់ ប្រថុយមកធ្វើធ្មេញនៅកម្ពុជា លទ្ធផលចូលដើម១០ដង

2022-06-10 00:45:00
ព័ត៌មាន

2022-06-10 00:45:00
ចំនួនមតិ 0 | ចំនួនចែករំលែក 0

ចន្លោះមិនឃើញ

មកលេងប្រទេសកំណើតផង ក៏ដើម្បីសន្សំសំចៃផង នារីខ្មែររស់នៅកូរ៉េម្នាក់ បានចេញមកចែករំលែកបទពិសោធន៍ផ្ទាល់ខ្លួនដែលនាងជួបពេលប្រថុយមកធ្វើធ្មេញនៅកម្ពុជា ដែលលទ្ធផលធ្វើឲ្យនាងខកចិត្ត ខាតបង់ប្រាក់លើសដើមដល់ទៅ១០ដង។

ស្ត្រីខ្មែរម្នាក់នេះ មិនបានស្គាល់ឈ្មោះច្បាស់ទេ តែនាងបានចេញមុខតាមរយៈយូធូបមួយដែលមានឈ្មោះថា "Khmer Korean TV" ដើម្បីចែករំលែកបទពិសោធន៍មួយនេះ ចៀសវាងមានពលរដ្ឋខ្មែរផ្សេងទៀតជួបរឿងដូចនាង។ ស្ត្រីវ័យប្រមាណ៣០រូបនេះ រៀបរាប់ថា កាលពីប្រមាណ ៣-៤ឆ្នាំមុន នាងបានមកលេងកម្ពុជា អំឡុងពេលនោះ ដោយគិតថាចង់សន្សំសំចៃផង នាងបានទៅទទួលយកសេវាព្យាបាលធ្មេញនៅមន្ទីរពេទ្យធ្មេញមួយនៅភ្នំពេញ។

នាងបញ្ជាក់ថា ដើមឡើយ ធ្មេញរបស់នាង គ្រាន់តែមានស្នាមតែបន្តិច ដែលនាងយល់ថា ជាអាការតិចតួចប៉ុណ្ណោះ។ "ប៉ុន្តែយល់ថា ធ្វើឲ្យវាស្អាតទៅ កុំឲ្យវាថា...ធ្មេញវាពុកបន្តទៀតអីចឹង យើងធ្វើការពារឲ្យហើយទៅ!”។ ស្ត្រីរូបនេះថ្លែង។

បែបនេះ នាងក៏បានទៅព្យាបាលនៅមន្ទីរពេទ្យមួយនោះតាមការណែនាំរបស់បងស្រីនាង។ ការព្យាបាលប្រព្រឹត្តិទៅតែប្រមាណ ១០នាទី អ្វីៗក៏រួចរាល់។ ស្ត្រីយើងមិនបានបញ្ចេញតួលេខនៃការចំណាយលើការទទួលសេវាពីពេទ្យធ្មេញក្នុងស្រុកទេ។ ក្រោយមកនាងបានត្រឡប់មកប្រទេសកូរ៉េវិញ ទើបបញ្ហាបានលេចឡើង។

“ខ្ញុំគិតថា គេធ្វើស្អាតហើយ តែមានណា ពេលមកដល់កូរ៉េវិញ មិនបានប៉ុន្មានផង ៣-៤-៥ថ្ងៃ ម៉េចទេ ធ្មេញវាដូចម៉េចទេ វាដូចទើសៗអ្ហាស...ដល់តែពេលមើលកញ្ចក់ទៅ បានដឹងថា ធ្មេញវាប្រហោង…!”។

ស្ត្រីវ័យក្មេង បន្តថា ធ្មេញនាង មានបញ្ហាតិចតួចនៅលើធ្មេញមួយ ប៉ុន្តែពេទ្យបានរ៉ចុះធ្មេងនាងដល់ទៅ២ដើម្បីញាត់របស់ម្យ៉ាងចូល។ "ធ្មេញខ្ញុំវានេះហ្នឹងតែ១តើ អាមួយទៀតវាមានអី តែគាត់លេងខួងទាំងពីរដើម្បីញាត់អាអីនោះចូល…ហើយមានបានប៉ុន្មាន វាលេងជ្រុះមកវិញ!”។

នាងបន្តថា ក្រោយមកនាងបានទៅពេទ្យធ្មេញនៅកូរ៉េ ហើយត្រូវគេប្រាប់ថា ធ្មេងនាងទាំងពីរត្រូវខូចហើយ។ ដូច្នេះហើយចុងក្រោយនាងត្រូវប្ដូរធ្មេងទាំងពីរចេញ ដែលធ្វើឲ្យនាងចំណាយច្រើនជាងមុនដល់ទៅ ១០ដង។

ស្ត្រីខ្មែរលើកពីរឿងផ្ទាល់ខ្លួននេះដើម្បីជាបទពិសោធន៍ដល់បងប្អូនខ្មែរផ្សេងទៀតដែលមានតម្រូវការទទួលសេវាពីពេទ្យធ្មេង។ នាងថា ពេទ្យខ្មែរ ពេទ្យកូរ៉េ គឺមានល្អ និងមិនល្អដូចគ្នា ដែលពេលខ្លះលុយបាំងមុខពួកគេ។

ដូច្នេះហើយជាការលើកទឹកចិត្ត នាងស្នើឲ្យបងប្អូនដែលមានតម្រូវការព្យាបាលធ្មេញនៅពេទ្យក្នុងស្រុកក្ដី ក្រៅស្រុកក្ដី ត្រូវសួរគេឲ្យច្បាស់ជាមុនពីអាការ និងការព្យាបាល ថាកម្រិតណា តម្លៃសេវាប៉ុន្មាន ដើម្បី ចៀសវាងមានការខាតបង់ប្រាក់ ហើយអាចឈានដល់ប៉ះពាល់សុខភាពទៀតផងក៏ថាបាន៕

អត្ថបទ៖ ទារិកា