• 2022-06-22 04:04:37
  • ព័ត៌មាន

ប្រយ័ត្ន! អាជ្ញាធរជាតិ​អប្សរា ស្នើ​ឲ្យ​ភ្ញៀវ​ទេសចរ​ប្រុង​ប្រយ័ត្ន​ខ្យល់​កន្ត្រាក់​នៅ​​រមណីយដ្ឋាន​អង្គរ

  • 2022-06-22 04:04:37
  • ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់​ពី​បញ្ចេញ​ផែន​ការ ដក​ហូត និង​កាត់​ក្រីមែក​ឈើ​ម្សិលមិញ នៅ​ថ្ងៃ​នេះ អាជ្ញាធរ​ជាតិ​អប្សរា បាន​ចេញ​សេចក្ដី​ជូន​ដំណឹង​ថ្មី​ទៀត​ដោយ​ស្នើ​ឲ្យ​ភ្ញៀវ​​ទេសចរ ក៏​ដូច​ជា​បងប្អូន​ប្រជាពលរដ្ឋ​ត្រូវ​ប្រុង​ប្រយ័ត្ន​ចំពោះ​ខ្យល់​កន្ត្រាក់​ពេល​ទៅ​លេង​នៅ​តំបន់​រមណីយដ្ឋាន​អង្គរ។

ស្ថានភាព​នោះ វា​អាច​បង​ប្អូន​ប្រជាពលរដ្ឋ ក៏​ដូច​ជា​ភ្ញៀវ​ទេសចរ​ជាតិ អន្តរជាតិ គ្រោះ​ថ្នាក់ និង​អាច​ប៉ះពាល់​ដល់​អាយុជីវិត​បាន។ ដូច្នេះ​ហើយ អាជ្ញាធរជាតិអប្សរា បានអំពាវនាវឲ្យ​បង្កើនការ​ប្រុង​ប្រយ័ត្ន​ដើម្បី​សុវត្ថិភាព​ផ្ទាល់​ខ្លួន រួម​ទាំង​បង្កើន​ការ​ប្រុង​ប្រយ័ត្ន​ទ្រព្យសម្បត្តិផ្ទាល់ខ្លួន​ផង។

តាម​ឯកឧត្តម ឡុង កុសល អគ្គនាយករងអាជ្ញាធរជាតិអប្សរា ការ​អំពាវ​នាវ​នេះ ដោយសារតែស្ថានភាពអាកាសធាតុនាពេលបច្ចុប្បន្ន មានការប្រែប្រួល ដែល​ជា​ហេតុ​អាច​បណ្តាលឱ្យមានខ្យល់កន្រ្តាក់ខ្លាំង និង​អាចបង្កនៅគ្រោះថ្នាក់ណាមួយជាយថាហេតុគ្រប់ពេលវេលា។

បង្ការ​ការ​កើត​មាន​គ្រោះ​ជា​យថាហេតុ​បណ្ដាល​មក​ពី​ខ្យល់​កន្ត្រាក់​ដែល​អាច​ឲ្យ​បាក់ ឬ​រលំ​ដើម​ឈើ​ក្នុង​រមណីយដ្ឋាន​អង្គរ​នេះ ម្សិលមិញ អាជ្ញាធរជាតិ​អប្សរា ក៏​ចេញ​សេចក្ដី​ជូន​ដំណឹង​ទី​១ ស្ដី​ពី​ផែនការ​ដក​ហូត​ដើម​ឈើ និង​កាត់​ក្រី​មែក​ឈើ​ជា​ច្រើន​ក្នុង​រមណីដ្ឋាន​អង្គរ ដែល​ផែនការ​នេះ នឹង​ចាប់​អនុវត្ត​ពី​ថ្ងៃ​នេះ​ត​ទៅ​រហូត​ដល់​ចប់​ភារកិច្ច។

យ៉ាង​ណា​នៅ​មុន​នេះ តាម​ឯកឧត្តម ឡុង កុសល មន្រ្តីអាជ្ញាធរជាតិអប្សរាតែងតែបានដើរពិនិត្យ និងកាត់ក្រីមែកឈើ ដែលប្រឈមហានិភ័យជាប្រចាំក្តី​ដែរ។ ប៉ុន្តែ​ទោះ​ជា​យ៉ាង​នេះ​ក្ដី ក៏មិនអាចដឹងថាមានអ្វីនឹងកើតឡើងជាមុនដែរ។

សកម្មភាពក្រុមការងារអាជ្ញាធរ​អប្សរា ចុះ​កាត់ក្រីមែកឈើ(រូបថត៖ហ្វេសប៊ុក​អាជ្ញាធរអប្សរា)

ដូច្នេះ អាជ្ញាធរជាតិអប្សរា សូមអំពាវនាវដល់ប្រជាពលរដ្ឋ ឬភ្ញៀវទេសចរ និងអ្នកបើកបររថយន្តដឹកភ្ញៀវទេសចរទាំងអស់ សូមមានការប្រុងប្រយ័ត្នឱ្យបានខ្ពស់ នៅពេលមានករណីភ្លៀងធ្លាក់ ឬខ្យល់ខ្លាំង សូមកុំទៅជ្រកក្រោមដើមឈើ ឬយករថយន្តទៅចតក្រោមដើមឈើដែលអាចបង្កឱ្យមានគ្រោះថ្នាក់ជាយថាហេតុ៕

អត្ថបទ៖ ទារិកា

មតិយោបល់
អត្ថបទពេញនិយម
អត្ថបទថ្មី