ក្រសួងសុខាភិបាល បានបញ្ជាក់ពីការរកឃើញវត្តមាន អូមីក្រុងបំប្លែងថ្មី BA4 និងBA5 ដែលមានលទ្ធភាពឆ្លងលឿន និងអាចបញ្រ្ជាបចូលប្រព័ន្ធភាពស៊ាំរបស់មនុស្ស បន្ទាប់ពីរកឃើញករណីឆ្លងកូវីដ-១៩ ថ្មី ជារៀងរាល់ថ្ងៃចាប់តាំងពីថ្ងៃទី ២៨ ខែកក្កដា។

ចាប់តាំងពីថ្ងៃទី ២៨ ខែមិថុនា រហូតមកទល់ពេលនេះ កម្ពុជាមានការរកឃើញករណីឆ្លងកូវីដថ្មី ជាបន្តបន្ទាប់រៀងរាល់ថ្ងៃ។ ទន្ទឹមនឹងការរកឃើញករណីឆ្លងថ្មីជារៀងរាល់ថ្ងៃនេះ កម្ពុជាក៏បានរក​ឃើញវត្តមាន អូមីក្រុងបំប្លែងថ្មី BA4 និងBA5 ផងដែរ។

លោកជំទាវ ឱ វណ្ណឌីន អ្នកនាំពាក្យក្រសួងសុខាភិបាល បញ្ជាក់ថា អូមីក្រុងបំប្លែងថ្មីនេះ តាមការបញ្ជាក់របស់អ្នកវិទ្យាសាស្រ្ត ​គឺមានលទ្ធភាពឆ្លងលឿន។ លោកជំទាវ បញ្ជាក់ដែរថា ការឆ្លងអូមីក្រុងប្រភេទថ្មីនេះ​ ធ្វើឱ្យអ្នកជំងឺ ​ឈានទៅភាពធ្ងន់ធ្ងរ ប្រសិនបើមិនមាន​វ៉ាក់សាំង​ការពារខ្លួន ​និងមិនអនុវត្តតាមនិតិវិធីព្យាបាល ព្រមទាំងការការពារខ្លួនបានត្រឹមត្រូវទេនោះ។ ក្រោមហេតុផលទាំងនេះ ​ទើបទាមទារឱ្យមានការចាក់វ៉ាក់សាំងដូសជំរុញក្នុងគម្លាត រយៈពេល ៣ខែ។

ចំពោះអ្នកជំងឺឆ្លងអូមីក្រុងបំប្លែងថ្មី BA4 និងBA5 នេះ គឺមានរោគសញ្ញាមិនខុសប្លែកគ្នាពី ប្រភេទកូវីដ ​ជំនាន់មុនៗនោះទេ។ ​រោគសញ្ញាមានដូចជា ក្ដៅខ្លួន ក្អក ឈឺបំពង់ក ហៀរសំបោរ មានភាពស្រដៀងទៅនឹងជំងឺផ្ដាសាយធម្មតា។

លោកជំទាវនៅតែបញ្ជាក់ដដែលថា កូវីដ-១៩ មិនទៅណាឆ្ងាយនោះទេ គឺទាមទារការការពារខ្លួន និង​ជាពិសេសគឺទៅទទួលយកការចាក់វ៉ាក់សាំងទាំង​ដូសមូលដ្ឋាន និងដូសជំរុញ​ឱ្យ​បាន​ត្រឹមត្រូវ​តាមកាលកំណត់។ ពាក់ព័ន្ធនឹងការចាក់វ៉ាក់សាំងបង្ការកូវីដ-១៩ នេះ ក្រសួងសុខាភិបាល គឺនៅតែបន្តចាក់វ៉ាក់សាំង​ដោយ​មិនគិតថ្លៃជូនប្រជាពលរដ្ឋគ្រប់រូប ទាំងដូសមូលដ្ឋាន​ និងដូសជំរុញ។ ​លោកជំទាវ ឱ វណ្ណឌីន ក៏បានបញ្ជាក់ដែរថា ​បច្ចុប្បន្នការចាក់វ៉ាក់សាំងដូសជំរុញទី ​៣ ​សម្រេចបានប្រមាន ៩ លាន ៥សែននាក់។​ ហើយកម្ពុជា ​ក៏បានឈានដល់ការចាក់វ៉ាក់សាំងដូសជំរុញទី៥ ផងដែ៕ ប្រភព៖ BTV News