ថ្លែងក្នុងធ្វើសនិ្នសីទសារព័ត៌មានអំពី "ពិព័រណ៍ការងារ និងផលិតភាពជាតិឆ្នាំ២០២២" នាថ្ងៃទី១៨ ខែតុលា ឆ្នាំ២០២២ នៅមជ្ឈមណ្ឌលសហប្រតិបត្តិការកម្ពុជា-ជប៉ុន ដោយមានការចូលរួមជាវាគ្មិនពីតំណាងសហភាពសហព័ន្ធយុវជនកម្ពុជារាជធានីភ្នំពេញ, សមាគមរោងចក្រកាត់ដេរនៅកម្ពុជា (GMAC) និងធនាគារកាណាឌីយ៉ា ព្រមទាំងតំណាង ក្រសួង ស្ថាប័ន ក្រុមហ៊ុន សិស្ស/និស្សិត ចំនួនប្រមាណ ៤០០នាក់ ឯកឧត្តម ហៃ ហ៊ុនឡេង ប្រតិភូរាជរដ្ឋាភិបាលទទួលបន្ទុក​ជាប្រធានទីភ្នាក់ងារជាតិមុខរបរនិងការងារ បានឱ្យដឹងថា​ក្នុងព្រឹត្តិការណ៍នេះនឹងមានការចូលរួមពីវិស័យនាំមុខគេជាច្រើនរួមមាន៖ ធនាគារ គ្រឹះស្ថានមីក្រូហិរញ្ញវត្ថុ និងធានារ៉ាប់រង, សេវាកម្មលក់ដុំ និងរាយ, ទេសចរណ៍ និងបដិសណ្ឋារកិច្ច, ម្ហូបអាហារ និងភេសជ្ជៈ, អចលនទ្រព្យ, សេវាកម្ម ព្រមទាំងវិស័យឧស្សាហកម្ម និងកម្មន្តសាល។

ពិព័រណ៍ការងារនេះ នឹងត្រូវរៀបចំឡើងនៅអគារពិព័រណ៍​កោះពេជ្រ រយៈពេលពីរថ្ងៃ គឺថ្ងៃ ទី២៨-២៩ ខែតុលា ឆ្នាំ ២០២២ ចាប់ពីម៉ោង ៨ ព្រឹក ដល់ ៨ យប់ និងត្រូវបានសហការ​រៀបចំដោយទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ, សហភាព​សហព័ន្ធយុវជនកម្ពុជារាជធានីភ្នំពេញ និងសមាគមរោងចក្រ​កាត់ដេរនៅកម្ពុជា (GMAC) ។ ពិព័រណ៍នេះ គឺជាអន្តរាគមន៍​ទីផ្សារការងារដ៏ធំ និងមានលក្ខណៈប្រមូលផ្តុំដែលត្រូវបាន​រៀបចំឡើងក្នុងមួយឆ្នាំម្តង បន្ថែមទៅលើការផ្តល់សេវាការងារ​ជាប្រចាំថ្ងៃ សំដៅពង្រីកការផ្សព្វផ្សាយ បង្កើនការយល់ដឹង និងការត្រៀមខ្លួនចូលទីផ្សារការងារឱ្យកាន់តែទូលំទូលាយដល់គ្រប់ភាគីពាក់ព័ន្ធ។ ជាពិសេស ព្រឹត្តិការណ៍ ឆ្នាំ២០២២ នេះ នឹងត្រូវបានរៀបចំឡើងដោយជុំគ្នាផ្ទាល់ជាថ្មីឡើងវិញ បន្ទាប់ពីស្ថានភាពកូវីដ-១៩ បានធូរស្រាល។

ក្រៅពីផ្តល់ឱកាសការងារគ្រប់ប្រភេទជាង ២ម៉ឺនកន្លែង ពិព័រណ៍ការងារ និងផលិតភាពជាតិឆ្នាំនេះ នឹងមានការរៀបចំ​សិក្ខាសាលាលើកកម្ពស់ផលិតភាពក្រោមប្រធានបទស្តីពី៖ «ការលើកកម្ពស់កម្លាំងពលកម្មជំនាញ ឌីជីថលនីយកម្ម និងផលិតភាព» ផងដែរ។ លោក កាំង ម៉ូនីកា អគ្គលេខាធិការរង​សមាគមរោងចក្រកាត់ដេរនៅកម្ពុជា (GMAC) បានឱ្យដឹងថា វិស័យឧស្សាហកម្មនៅកម្ពុជាបានទួលការរីកចម្រើនយ៉ាងខ្លាំងក្លា ហើយវិស័យមួយនេះ ក៏មានចំណែកស្រូបទាញកម្លាំងយុវជន​យ៉ាងច្រើននៅកម្ពុជា។ លោកបានចាត់ទុកថាមុខជំនាញ​បច្ចេកទេសវិជ្ជាជីវៈ គឺជាវិស័យមួយដ៏ល្អសម្រាប់យុវជន​ដែលត្រូវសិក្សាស្វែងយល់ និងរៀនសូត្រដើម្បីបង្កើតមុខរបរ​សម្រាប់ចិញ្ចឹមជីវិតទៅថ្ងៃខាងមុខ។

ដោយឡែក លោក សុំ មនោរម្យ តំណាងសហភាព​សហព័ន្ធ​យុវជនកម្ពុជា រាជធានីភ្នំពេញ បានថ្លែងដោយជំរុញឱ្យ​យុវជនសិក្សាស្វែងយល់ក្នុងពិព័រណ៍ការងារ និងផលិតភាព​ជាតិឆ្នាំ២០២២ ដោយសារថ្ងៃនេះ គឺជាការជួបជុំដោយក្រុមហ៊ុន និងអ្នកជំនាញដែលសិស្សនិស្សិតអាចសិក្សាស្វែងយល់ ហើយអាចមានឱកាសការងារនឹងកន្លែងផ្ទាល់។ លោក បានលើកឡើងដោយបញ្ជាក់បន្ថែមថា៖ “សហភាពសហព័ន្ធ​យុវជនកម្ពុជាបច្ចុប្បន្នបានចូលរួមជាមួយរាជរដ្ឋាភិបាលក្នុងការអប់រំ និងបណ្តុះបណ្តាលយុវជនឱ្យក្លាយជាមនុស្ស​ជំនាន់ថ្មីប្រកបដោយសមត្ថភាព និងគុណភាពសម្រាប់បម្រើដល់​ការអភិវឌ្ឍសេដ្ឋកិច្ចជាតិ។”

មហាព្រឹត្តិការណ៍ការងារប្រចាំឆ្នាំនេះ ត្រូវបានរំពឹងថានឹងមាន​អ្នកស្វែងរកការងារដែលមានសក្ដានុពល ចំនួនប្រមាណ ៣ ម៉ឺននាក់ នឹងចូលរួមដាក់ពាក្យរកការងារជាមួយក្រុមហ៊ុនធំៗ ១៥០ ផងដែរ។ លោកស្រី កង បូរ៉ា នាយិការង នាយកដ្ឋាន​គ្រប់គ្រងបណ្តាញសាខា និងជាប្រធានតំបន់ភ្នំពេញខាងត្បូង​របស់ធនាគារ កាណាឌីយ៉ា បានលើកឡើងក្នុងសន្និសីទ​សារព័ត៌មាននាព្រឹកមិញថា ធានាគារកាណាឌីយ៉ា តែងតែចូលរួមជាមួយពិព័រណ៍ការងាររបស់ NEA ជានិច្ច ដោយសារមានបេក្ខជនល្អៗជាច្រើនបានដាក់ពាក្យស្វែងរកការងារ ហើយមានបុគ្គលិកខ្លះត្រូវបាន​ជ្រើសរើសជាបុគ្គលិក​ពេញសិទ្ធិ និងបានវិវត្តន៍ខ្លួនទៅជាអ្នកគ្របគ្រងនាពេល​បច្ចុប្បន្នទៀតផង៕