ក្រុមហ៊ុនធានារ៉ាប់រងអាយុជីវិត FWD Cambodia និងសាលាអន្តរជាតិប្រ៊ីតធីសប៊្លូប៊ើដ បានចុះហត្ថលេខាលើអនុស្សារណៈនៃការយោគយល់ នាព្រឹកថ្ងៃទី១០ ខែមីនា ឆ្នាំ២០២៣ នៅការិយាល័យក្រុមហ៊ុន FWD Cambodia។ តាមរយៈកិច្ចសហការនេះ ស្ថាប័ន​ទាំង​ពីរ​នឹង​រួម​ដៃគ្នា​ជំរុញឱ្យក្រុមគ្រួសារកម្ពុជារស់នៅដោយភាពរីករាយ តាមរយៈការផ្តល់ជូននូវការការពារហិរញ្ញវត្ថុ និងបង្កើនឱកាសក្នុងការបណ្តុះបណ្តាលធនធានមនុស្ស។​

កញ្ញា ថៃ សុច័ន្ទណា នាយិកាគ្រប់គ្រងនាយកដ្ឋានហិរញ្ញវត្ថុ និងនាយិកាចាត់ការទូទៅស្ដីទី នៃក្រុមហ៊ុន FWD Cambodia បានមានប្រសាសន៍ថា៖ «ខ្ញុំពិតជារីករាយក្រៃលែងដែលក្រុមហ៊ុន FWD Cambodia អាចរួមចំណែកលើកកម្ពស់វិស័យអប់រំ តាមរយៈការចូលរួមផ្សព្វផ្សាយពីឱកាស និងកម្មវិធីសិក្សាអន្តរជាតិរបស់សាលាអន្តរជាតិប្រ៊ីតធីសប៊្លូប៊ើដទៅដល់បុគ្គលិក ដៃគូអាជីវកម្ម និងអតិថិជនរបស់យើង។​ តាមរយៈភាពជាដៃគូនេះផងដែរ ក្រុម​ហ៊ុន​ FWD Cambodia​ ក៏​នឹង​អាច​ផ្ដល់​ជូន​នូវ​ដំណោះស្រាយលើសេវាធានារ៉ាប់រងអាយុជីវិត និង​ការ​ការ​ពារ​ហិរញ្ញ​វត្ថុ​ជូន​ដល់​ក្រុម​ការ​ងារ​ ក៏​ដូច​ជា​អាណាព្យាបាលរបស់សិស្សានុសិស្សនៃសាលាប៊្លូប៊ើដផង​ដែរ​។»

លោកស្រី Kendall Fairburn នាយិកាសាលាអន្តរជាតិប្រ៊ីតធីសប៊្លូប៊ើដ បានថ្លែងមតិចំណាប់អារម្មណ៍ថា៖ «ខ្ញុំពិតជាមានមោទកភាពដែលសាលារបស់យើងអាចសហការជាមួយនឹងក្រុមហ៊ុនធានារ៉ាប់រងអាយុជីវិត FWD Cambodia ដែលនេះជាចំណុចចាប់ផ្ដើមនៃការបង្កើនចំណងមិត្តភាពរវាងភាគីទាំងពីរក្នុងការផ្តល់ផលប្រយោជន៍ និងរីកចម្រើនរួមគ្នា។»

អំពីក្រុមហ៊ុនធានារ៉ាប់រងអាយុជីវិត FWD

ក្រុមហ៊ុន FWD (FWD Group) ជាក្រុមហ៊ុនធានារ៉ាប់រងអាយុជីវិតឈានមុខគេមួយក្នុងតំបន់អាស៊ីដែលមាន​​អតិថិជនជាង ១០ លាននាក់ក្នុងទីផ្សារចំនួន ១០ ដោយក្នុងនោះរួមមាន ទីផ្សារដែលរីកចម្រើនរហ័សបំផុតក្នុងពិភពលោកលើវិស័យធានារ៉ាប់រងផងដែរ។ ក្រុមហ៊ុន FWD ត្រូវបានបង្កើតឡើងដំបូងក្នុងទ្វីបអាស៊ីក្នុងឆ្នាំ ២០១៣ ហើយជាក្រុមហ៊ុនដែលផ្តោតលើការយកចិត្តទុកដាក់បំផុតក្នុងការផ្ដល់បទពិសោធន៍​ និងសេវាកម្មដែលសាមញ្ញជាងមុន រហ័សជាងមុន ងាយស្រួលយល់ជាងមុន ជាមួយបច្ចេកវិទ្យាឌីជីថល។ តាមរយៈយុទ្ធសាស្ត្រក្នុងការយកអតិថិជនជាគោល ក្រុមហ៊ុន FWD មានគោលដៅក្នុងការផ្ដល់បទពិសោធន៍​ថ្មីលើសេវាធានារ៉ាប់​រង​ជូនដល់អតិថិជន។

ក្រុម​ហ៊ុន​ FWD Cambodia ចាប់ផ្តើមប្រតិបត្តិការជាផ្លូវការក្នុងប្រទេសកម្ពុជាកាលពីខែកញ្ញា ឆ្នាំ ២០២១ និងត្រូវបានទទួលស្គាល់ជាក្រុមហ៊ុនធានារ៉ាប់រងបែបឌីជីថលថ្មីដែលមានភាពច្នៃប្រឌិតបំផុតក្នុងប្រទេសកម្ពុជា ពីស្ថាប័ន Global Business Outlook Awards នៅចក្រភពអង់គ្លេស។ សម្រាប់ព័ត៌មានបន្ថែម សូមចូលទៅកាន់គេហទំព័រ៖ www.fwd.com.kh ឬហ្វេសបុកផេក FWD Cambodia។

អំពីសាលាអន្តរជាតិប្រ៊ីតធីសប៊្លូប៊ើដ

សាលាអន្តរជាតិប្រ៊ីតធីសប៊្លូប៊ើដ ផ្តល់ការអប់រំដ៏ទូលំទូលាយសម្រាប់កុមារចាប់ពីអាយុ២ឆ្នាំ ដល់ ១២ឆ្នាំ។ សិស្សានុសិស្សស្ថិតនៅក្នុងបរិយាកាសសិក្សាដែលត្រូវបានយកចិត្តទុកដាក់ខ្ពស់ដើម្បីឲ្យពួកគេអាចអភិវឌ្ឍខ្លួនឈានទៅសម្រេចបានសក្តានុពលរបស់ពួកគេ ហើយការស្រឡាញ់ការសិក្សាត្រូវបានបណ្តុះតាំងពីក្មេង។ សាលាប៊្លូប៊ើដ ប្រើប្រាស់កម្មវិធី Early Years Foundation Stages (EYFS) សម្រាប់ថ្នាក់មត្តេយ្យសិក្សា កម្មវិធីសិក្សាបឋមអន្តរជាតិ International Primary Curriculum (IPC) និងកម្មវិធីចំណេះទូទៅភាសាខ្មែរ ដោយផ្តល់ឱ្យសិស្សនូវមូលដ្ឋានគ្រឹះសម្រាប់ភាពជោគជ័យក្នុងការសិក្សា។

ចក្ខុវិស័យរបស់សាលាប៊្លូប៊ើដ គឺចង់ឃើញសិស្សដែលបានចុះឈ្មោះទាំងអស់ត្រូវបានផ្តល់ឱកាសដើម្បីកសាងគ្រឹះដ៏រឹងមាំមួយ និងការរៀបចំសម្រាប់ការសិក្សាពេញមួយជីវិត ជាមួយនឹងបេសកកម្មក្នុងការផ្តល់នូវបរិយាកាសប្រកបដោយសុវត្ថិភាព ការយកចិត្តទុកដាក់ និងជំរុញទឹកចិត្តសិស្សឱ្យរៀននិងអភិវឌ្ឍ។