ថ្លែង​នៅ​ក្នុងពិធីសំណេះសំណាលជាមួយប្រធានរដ្ឋបាល ប្រធានផ្នែកនៅតាមរោងចក្រ សហគ្រាស ក្រោមអធិបតីភាពឯកឧត្តមបណ្ឌិត ហ៊ុន ម៉ាណែត ម្សិលមិញ​នេះ ឯកឧត្តម អ៊ិត សំហេង រដ្ឋមន្ត្រីក្រសួង​ការងារ និង​បណ្ដុះបណ្ដាល​វិជ្ជាជីវៈ បាន​ឲ្យ​ដឹង​ថា រាជរដ្ឋាភិបាល​ត្រៀម​ផែនការ​បណ្តុះ​បណ្តាល​ជំនាញវិជ្ជាជីវៈ​ដល់​យុវជន​នៃ​គ្រួសារក្រីក្រ។

យុវជននៃគ្រួសារក្រីក្រ និងងាយរងគ្រោះទូទាំងប្រទេសចំនួន១លាន៥សែននាក់ ស្ថិត​ក្នុង​ផែន​ការរបស់​រាជរដ្ឋាភិបាល សម្រាប់​ការ​​បណ្ដុះបណ្ដាល​ជំនាញវិជ្ជាជីវៈ ដោយ​ក្នុង​នោះ រដ្ឋធានាផ្តល់ប្រាក់ឧបត្ថម្ភចាប់ពីឆ្នាំ២០២៣នេះតទៅ។

ធើ្វ​បែប​នេះ ដើម្បីផ្តល់ឱកាសឱ្យពួកគេទទួលបានជំនាញសម្រាប់យកទៅធ្វើការងារ ឬបង្កើតមុខរបរដោយខ្លួនឯង និងបំពេញតម្រូវការនៃកម្លាំងពលកម្មជំនាញសម្រាប់ការវិនិយោគថ្មីៗនៅកម្ពុជា។ នេះ​បើ​តាម​​ឯកឧត្តម អ៊ិត សំហេង។

ឯកឧត្តម​រដ្ឋមន្ត្រី​បន្ត​ថា ទន្ទឹមនឹងឱកាស​ការងារក្នុងស្រុក រាជរដ្ឋាភិបាលខិតខំផ្តល់ជម្រើសជូនប្រជាពលរដ្ឋដែលមានបំណងចង់ធ្វើការងារនៅក្រៅប្រទេស ដោយបានខិតខំពង្រឹងកិច្ចសហការជាមួយបណ្តាប្រទេសដៃគូ ដើម្បីទទួលបានឱកាសការងារនៅក្រៅប្រទេសជូនពលករសរុបចំនួនប្រមាណ១.៣លាននាក់។

នយោបាយ​នេះ មិនត្រឹមតែអាចទទួលបានប្រាក់ចំណូល បានចំណេះជំនាញប៉ុណ្ណោះទេ ថែមទាំងអាចផ្ញើប្រាក់បញ្ញើមកក្នុងប្រទេសជូនគ្រួសារប្រមាណ២.៧ពាន់លានដុល្លារអាមេរិកថែម​ទៀត ក្នុងមួយឆ្នាំៗ និងចូលរួមការអភិវឌ្ឍប្រទេសជាតិ៕(ប្រភព៖ ក្រសួងការងារ)