អ្នកវិទ្យាសាស្ត្របីនាក់ដែលជាប់ពាក់ព័ន្ធក្នុងការអភិវឌ្ឍន៍កាំជ្រួច "មិនអាចបញ្ឈប់បាន" Kinzhal របស់រុស្ស៊ី ត្រូវបានកាត់ទោសឱ្យជាប់គុក ក្រោមការចោទប្រកាន់ពីបទក្បត់ជាតិ នៅក្នុងករណីដែលបានផ្សព្វផ្សាយព័ត៌មាន​ឲ្យ​ដឹង​ជា​មុន​ក្នុង​ចំណោម​​អ្នកស្រាវជ្រាវរុស្ស៊ី។

នៅក្នុងលិខិតចំហមួយកាលពីថ្ងៃច័ន្ទ សមាជិកនៃវិទ្យាស្ថានទ្រឹស្តី និងយន្តការអនុវត្តនៃសាខាស៊ីបេរីនៃបណ្ឌិត្យសភាវិទ្យាសាស្ត្ររុស្ស៊ី ដែលមានមូលដ្ឋាននៅទីក្រុង Novosibirsk បាននិយាយថា ការចាប់ខ្លួនកំពុងមានឥទ្ធិពលយ៉ាងខ្លាំងទៅលើការស្រាវជ្រាវ។ លិខិតចំហបានឱ្យដឹងថា ករណីទាំងនេះបានបង្ហាញថា "អត្ថបទ ឬរបាយការណ៍ណាមួយ អាចនាំឱ្យមានការចោទប្រកាន់ពីបទក្បត់ជាតិខ្ពស់" ។

"ក្នុងស្ថានភាពនេះ យើងមិនត្រឹមតែខ្លាចជោគវាសនារបស់សហសេវិករបស់យើងប៉ុណ្ណោះទេ តែ​យើងគ្រាន់តែមិនយល់ ថា​តើ​យើង​អាច​បន្តធ្វើការងាររបស់យើង​ដោយ​របៀប​ម៉េច" ។

ពួកគេបាននិយាយថាអ្នកវិទ្យាសាស្ត្របីនាក់គឺ Anatoly Maslov, Alexander Shiplyuk និង Valery Zvegintsev ត្រូវបានចាប់ខ្លួនពីបទចោទប្រកាន់មិនពិត។ Reuters បានរាយការណ៍ថា អ្នកវិទ្យាសាស្ត្រទាំង​៣ គឺ​ជា​អ្នក​បានសម្របសម្រួលការស្រាវជ្រាវ ដើម្បីបង្កើតប្រព័ន្ធមីស៊ីល Kinzhal របស់រុស្ស៊ី។

អាវុធ ដែលជារឿយៗត្រូវបានពិពណ៌នាមិនពិតថាមានល្បឿនលឿនជាងសំឡេង គឺជាប្រភេទកាំជ្រួចផ្លោងបាញ់តាមអាកាសកម្រិតខ្ពស់ដែលមានសមត្ថភាពផ្ទុកសារធាតុផ្ទុះលើសពី 1,000 ផោន។ រុស្ស៊ីបានពិពណ៌នាជាយូរមកហើយថា Kinzhal ជាអាវុធដែលមានល្បឿនលឿនជាងសំឡេងដែលមិនអាចបញ្ឈប់បាន ដែលខ្លួនអះអាងថាមានសមត្ថភាពអាចយកឈ្នះលើប្រព័ន្ធការពារដែនអាកាសដែលគេស្គាល់ទាំងអស់។

ប៉ុន្តែ​ប៉ុន្មាន​ថ្ងៃ​មុន​នេះ វា​ត្រូវ​បាន​បាញ់​ទម្លាក់​ទាំង​៦គ្រាប់ ដោយ​ប្រព័ន្ធ​ការពារ​ដែន​អាកាស​អាមេរិក Patriot គ្រា​ដែល​រុស្សី​បាន​បាញ់​សំដៅ​ទៅ​រដ្ឋធានី​គៀវ​របស់​អ៊ុយ​ក្រែន៕