ចេញ App ថ្មីមួយ ឯកឧត្តមទេសរដ្ឋមន្ត្រី ស៊ុន ចាន់ថុល ស្នើពលរដ្ឋឈប់ពឹងគេរត់ការឲ្យ

2023-06-29 09:09:51
ព័ត៌មាន

2023-06-29 09:09:51
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្លែងនៅថ្ងៃសម្ពោធដាក់ឲ្យប្រើប្រាស់មណ្ឌលផ្ដល់សេវាសាធារណៈផ្សារទំនើបអុីអន ម៉ល មានជ័យ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីសាធារណការ និងដឹកជញ្ជូន ស្នើពលរដ្ឋកុំពឹងពាក់អ្នករត់ការក្នុងការស្នើសុំធ្វើកិច្ចអ្វីមួយ ដូចជាស្នើសុំផ្លាស់ប្ដូរប័ណ្ណបើកបរជាដើម។

ថ្លែងដូច្នេះ ឯកឧត្តមទេសរដ្ឋមន្ត្រី លើកឡើងថា ក្រសួងសាធារណការ បានធ្វើឲ្យប្រសើរច្រើនមកហើយទៅលើសេវាសាធារណៈរបស់ក្រសួង ក្នុងនោះមានទាំងការពង្រីកមជ្ឈមណ្ឌលឆៀករថយន្ត និងការពង្រីកមជ្ឈមណ្ឌលផ្ដល់សេវាសាធារណៈដែលគិតត្រឹមមកថ្ងៃនេះ មានចំនួន ៧ទីតាំងមកហើយ បូករួមទាំងទីតាំងថ្មីនៅផ្សារទំនើបអ៊ីអនមានជ័យនៅថ្ងៃនេះ។

ឯកឧត្តមទេសរដ្ឋមន្ត្រី លើកឡើងថា ទាំងនេះ គឺជាក្រសួងបានធ្វើ ក្នុងការនាំយកសេវាពាក់ព័ន្ធទាំងអស់ឲ្យទៅកាន់តែកៀកនឹងប្រជាពលរដ្ឋ ដោយមិនចាំបាច់ខាតពេលធ្វើដំណើរមកធ្វើកិច្ចការជាច្រើននៅកន្លែងតែមួយក្នុងក្រសួង ទាំងនេះនាំឲ្យមានការខាតបង់។

ឯកឧត្តមទេសរដ្ឋមន្ត្រីថ្លែងថា "បើយើងទុកឲ្យពួកគាត់បើកឡាន ៥០គីឡូម៉ែត្រ ៣០គីឡូម៉ែត្រ មកឆៀក គាត់មានការលំបាក។ ដូច្នេះអនុវត្តអនុសាសន៍ដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន ក្នុងការផ្ដល់សេវាសាធារណៈនេះជូនបងប្អូនរបស់យើង ធ្វើឲ្យបានលឿន មានប្រសិទ្ធភាព និងមានតម្លាភាព!”។

ក្រៅពីនេះក្រោមកិច្ចខិតខំប្រឹងប្រែងរបស់អគ្គនាយកដ្ឋាន បច្ចេកវិទ្យា ទំនាក់ទំនងសាធារណៈ មាន App ជាច្រើនត្រូវបានបង្កើតឡើង ដើម្បីសម្រួលប្រសិទ្ធភាពការងារជូនបងប្អូនសាធារណជន។ ជាក់ស្ដែង ថ្មីៗនេះ ក្រសួងទើបដាក់ឲ្យប្រើប្រាស់ App ថ្មីមួយទៀតមានឈ្មោះថា "Public Service Tracking” ដែលសាធារណជន អាចប្រើប្រាស់កម្មវិធីលើទូរស័ព្ទនេះ ដើម្បីតាមដានពីដំណើរការនៃការស្នើសុំអ្វីមួយ ដូចជាការស្នើសុំកាត់ឈ្មោះយានយន្ត។ ឯកឧត្តមទេសរដ្ឋមន្ត្រីថា ក្នុងគោលបំណងនេះ ពីដើម អ្នកស្នើសុំ មិនអាចដឹងអ្វីទាំងអស់ចំពោះដំណើរការ ក្រោយបានដាក់ការស្នើសុំរួចរាល់។

ប៉ុន្តែឥឡូវនេះជាមួយ Mobile App ខាងលើ គឺសាធារណជន តាមដានដំណើរការតាមដំណាក់កាលនីមួយៗ ចាប់តាំងពីថ្ងៃដាក់ពាក្យស្នើសុំ រហូតដល់ថ្ងៃទទួលលទ្ធផល។ ដូច្នេះហើយ ឯកឧត្តម ទេសរដ្ឋមន្ត្រី លើកឡើងថា ពលរដ្ឋ មិនចាំបាច់ប្រើប្រាស់អ្នករត់ការឲ្យទៀតនោះទេ តែអាចធ្វើបានដោយខ្លួនឯង។

ឯកឧត្តមថ្លែងថា "បើយើងឲ្យគេធ្វើឲ្យ គាត់យកថវិកាយើងច្រើន ហើយមានការយឺតយ៉ាវផង ដូច្នេះបើយើងធ្វើខ្លួនយើង ហើយយើងមានទាំង Mobile App ដើម្បីស្កេន យើងតាមដានដឹងទាំងអស់...ឯកសារទៅដល់យើងតាមដានដឹងទាំងអស់..សូមកុំទៅប្រើសេវាក្រៅផ្លូវការ ដែលធ្វើឲ្យយើងចំណាយថវិកាច្រើន ក្នុងការស្នើប័ណ្ណបើកបរ ផ្ទេរកម្មសិទ្ធិ ។ល។"៕

អត្ថបទ៖ ទារិកា