វៀតណាម បានក្លាយជាដៃគូនាំចេញនាំចូលធំជាងគេបំផុតរបស់កម្ពុជា បើធៀបជាមួយប្រទេសផ្សេងទៀតនៅក្នុងតំបន់អាស៊ីអាគ្នេយ៍។

គិតត្រឹមរយៈពេល ៥ខែនៅក្នុងឆ្នាំ ២០២៣នេះ ទំហំនាំចេញនាំចូលរវាងប្រទេសវៀតណាម និងកម្ពុជា កើនដល់ ២,៨ពាន់លានដុល្លារអាមេរិក ដែលចំនួននេះកើនជាងឆ្នាំមុន ៣ ភាគរយ។ កម្ពុជា បាននាំចេញទំនិញទៅវៀតណាម ១,៣ ពាន់លានដុល្លារ និងនាំចូលពី វៀតណាមវិញ ក្នុងចំនួន ១,៥ ពាន់លានដុល្លារ។ នេះបើតាមការបញ្ជាក់ពីក្រសួងពាណិជ្ជកម្មកម្ពុជា។ វៀតណាមមិនត្រឹមតែជាដៃគូនាំចេញនាំចូលធំជាងគេរបស់កម្ពុជា ប្រចាំតំបន់អាស៊ានប៉ុណ្ណោះទេ ប៉ុន្តែវៀតណាមជាប្រទេសដៃគូនាំចេញនាំចូល របស់កម្ពុជា ធំជាងគេលំដាប់ទី ៣ បន្ទាប់ពីប្រទេសចិន និង សហរដ្ឋអាមេរិក។

កំណើននៃការនាំចេញរបស់កម្ពុជាទៅកាន់ប្រទេសវៀតណាម គឺកសិផល មានទំហំកាន់តែខ្ពស់ ដោយសារការកើនឡើងនៃការប្រមូលផលរបស់កសិករខ្មែរ។ ការនាំចេញសំខាន់ៗទៅកាន់វៀតណាម រួមមាន អង្ករ កៅស៊ូ ស្វាយចន្ទី ដំឡូងមី ពោត ចេក ស្វាយ និង ថ្នាំជក់។ ទន្ទឹមនឹងនោះ ការនាំចូលសំខាន់ៗពីប្រទេសវៀតណាមមកកាន់កម្ពុជា រួមមាន សម្ភារៈសំណង់ គ្រឿងម៉ាស៊ីន ប្រេងឥន្ធនៈ ឧបករណ៍អគ្គិសនី និងអេឡិចត្រូនិច ជី គ្រឿងទេស បន្លែ និងផ្លែឈើ៕