បណ្ឌិត គី សិរីវឌ្ឍន៍ លើកវិស័យសំខាន់អាទិភាពមួយចំនួន ដែលរាជរដ្ឋាភិបាលថ្មី គួរដាក់ការយកចិត្តទុកដាក់

2023-07-28 09:17:28
ព័ត៌មាន

2023-07-28 09:17:28
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមលោកបណ្ឌិត គី សិរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិតសភាកម្ពុជា មានវិស័យអាទិភាពមួយចំនួន ដែលកម្ពុជាគួរតែផ្ដោតការយកចិត្តទុកដាក់ថែទាំ ជំរុញ សម្រាប់ពន្លឿនវិស័យសេដ្ឋកិច្ចជាតិទាំងមូល។

រាជរដ្ឋាភិបាលកម្ពុជាក្នុងអតីតកាល បានកំណត់យក វិស័យកាត់ដេរ កសិកម្ម សំណង់ និងទេសចរណ៍ ធ្វើជាសរសរស្ដម្ភទ្រទ្រង់សេដ្ឋកិច្ចជាតិ ក្នុងនោះវិស័យនាំចេញផលិតផលកាត់ដេរសំលៀកបំពាក់ និងស្បែកជើង ជាវិស័យសំខាន់មួយ។

ប៉ុន្តែបញ្ហាវិបត្តិសេដ្ឋកិច្ចសកល ឥទ្ធិពលខ្លះពីបញ្ហាចម្រូងចម្រាស់ពាក់ព័ន្ធនឹង EBA គេបានមើលឃើញថា បានធ្វើឲ្យវិស័យនេះថមថយសក្ដានុពលប្រកួតប្រជែងលើទីផ្សារអឺរ៉ុប ហើយរាជរដ្ឋាភិបាលកម្ពុជាអាណត្តិសម្ដេចតេជោ ហ៊ុន សែន បានងាកទៅរកបង្កើតកិច្ចព្រមព្រៀងពាណិជ្ជកម្មមួយចំនួនដូចជា កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ RCEP និង កិច្ចព្រមព្រៀងពាណិជ្ជកម្មសេរីកម្ពុជា-ចិន ជាដើមជាជំនួស។

ដូច្នេះ ខណៈកម្ពុជាត្រៀមនឹងទទួលយករាជរដ្ឋាភិបាលថ្មី ដោយមានឯកឧត្តមបណ្ឌិត ហ៊ុន ម៉ាណែត ជានាយករដ្ឋមន្ត្រីថ្មីជាអ្នកដឹកនាំ ប្រជាពលរដ្ឋកម្ពុជាទាំងក្នុង និងក្រៅស្រុក ក៏បាន និងកំពុងចាំមើលការកាច់ចង្កូតដឹកនាំប្រទេសរបស់នាយករដ្ឋមន្ត្រីថ្មី ថាតើរាជរដ្ឋាភិបាលថ្មីរបស់ឯកឧត្តមបណ្ឌិត មានយន្តការដឹកនាំបែបណា និងផ្ដោតជាចម្បងលើវិស័យណាខ្លះ?

នៅក្នុងកិច្ចពិភាក្សាពិសេស៖ របត់នយោបាយ-សេដ្ឋកិច្ចកម្ពុជា ក្រោយការផ្ទេរអំណាចជានាយករដ្ឋមន្រ្តីទៅឯកឧត្តម ហ៊ុន ម៉ាណែត របស់កម្ពុជាថ្មីរសៀលនេះ លោកបណ្ឌិត គី សិរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិតសភាកម្ពុជា លើកឡើងថា វិស័យសំខាន់ៗចំនួន ២ ដែលរាជរដ្ឋាភិបាលថ្មីគួរផ្ដោតការយកចិត្តទុកដាក់មាន កសិកម្ម និងឧស្សាហកម្ម។

សម្រាប់កសិកម្ម លោកបណ្ឌិត បានចង្អុលបង្ហាញថា វាវិស័យយុទ្ធសាស្ត្រ ហើយសំខាន់សម្រាប់គ្រប់ប្រទេសទាំងអស់លើពិភពលោកដែលធានាដល់ការទទួលទាន។ ស្ថានភាពនេះ វាមិនប្រសើរឡើយ ប្រសិនបើយើងមិនអាចមានវិស័យកសិកម្មរឹងមាំដែលអាចរស់លើខ្លួនឯងបាន ដោយពឹងភាគច្រើនតែលើការនាំចូលពីក្រៅ។

ក្នុងន័យ លោកបណ្ឌិត គី សិរីវឌ្ឍន៍ លើកឡើងថា រាជរដ្ឋាភិបាល ត្រូវធ្វើយ៉ាងណាឲ្យកសិកម្មក្នុងស្រុកអាចជំនួសការនាំចូលកសិផលពីបរទេសឲ្យបាន។ ទី២ទៀត ដែលរាជរដ្ឋាភិបាលត្រូវផ្ដោតដើម្បីដោះស្រាយបញ្ហានានានៅក្នុងវិស័យកសិកម្ម គឺជំរុញឧស្សាហកម្មកែច្នៃកសិផលក្នុងស្រុក ដើម្បីដោះស្រាយវិបត្តិខ្វះទីផ្សារបញ្ចេញកសិផលរបស់កសិករក្នុងស្រុក។ ទន្ទឹមគ្នា ក៏ត្រូវជំរុញការនាំចេញកសិផលក្នុងស្រុកចេញទៅបរទេសថែមទៀត។

ចំពោះវិស័យឧស្សាហកម្មខ្នាតធំ លោកបណ្ឌិត គី សិរីវឌ្ឍន៍ បញ្ជាក់ថា សំខាន់ដូចគ្នាក្នុងការជំរុញសេដ្ឋកិច្ចរបស់ជាតិ។ លោកបណ្ឌិត បានលើកឡើងថា រាជរដ្ឋាភិបាលបានធ្វើល្អច្រើនហើយក្នុងឧស្សាហកម្មផ្គុំតម្លើងរថយន្ត ម៉ូតូជាដើមសម្រាប់នាំចេញ។ ប៉ុន្តែរឹតតែប្រសើរនោះ គឺរាជរដ្ឋាភិបាល គួរជំរុញការផលិតគ្រឿងបង្គុំនៅក្នុងស្រុកថែមទៀត ជំនួសឲ្យការនាំចូលពីក្រៅ។

ក្រៅពីវិស័យកាត់ដេរសំលៀកបំពាក់ និងស្បែកជើងថមថយសក្ដានុពល ងាកមកវិស័យទេសចរណ៍វិញ ក៏កំពុងរងគ្រោះដូចគ្នា។ ដូច្នេះហើយ តាមលោកបណ្ឌិត គី សិរីវឌ្ឍន៍ វិស័យនេះទំនងមិនទាន់មានសក្ដានុពលពេញលេញសម្រាប់ប្រមូលថវិកាចូលជាតិនោះទេ ក្នុងបរិបថវិបត្តិសេដ្ឋកិច្ចសកលនេះ។

ដោយឡែកវិស័យអចលនទ្រព្យ នឹងសំណង់ ដែលធ្លាប់ជាសរសរស្ដម្ភ១ក្នុងចំណោម ៤ ដើម្បីទ្រទ្រង់សេដ្ឋកិច្ចជាតិដែរនោះ លោកបណ្ឌិត បានលើកឡើងក្នុងបទសម្ភាសន៍ដាច់ដោយឡែកជាមួយវិទ្យុបារាំងថា វិស័យនេះ បានដើរដល់ចំណុចទុំជោរហើយ។ ដូច្នេះវិស័យនេះ ទំនងមិនអាចជួយជំរុញសេដ្ឋកិច្ចជាតិបានច្រើន ដូចកាលពីអតីតកាលពិសេសឆ្នាំ ២០១៩ នោះឡើយ៕

អត្ថបទ៖ ទារិកា