លោក ផូ ផល្លាប្រាប់ថា មានអារម្មណ៍ស្រងេះស្រងោច ពេលជិះកង់កាត់ទឹកដីអឺរ៉ុបម្នាក់ឯង

2023-08-02 08:59:04
ព័ត៌មាន

2023-08-02 08:59:04
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ផូ ផល្លា ដែលបានស្ម័គ្រចិត្តជិះកង់ដើម្បីប្រមូលមូលនិធិជួយមន្ទីរពេទ្យកុមារអង្គរ បានធ្លោយមាត់ ថាស្រងេះស្រងោច បន្ទាប់ពីបានចាប់ផ្ដើមបេសកកម្មរយៈពេលប៉ុន្មានថ្ងៃ។

តាមរយៈបទសម្ភាសន៍ពីចម្ងាយ លោក ផូ ផល្លា ប្រាប់ថា មានរឿងលំបាក និងនឹកស្មានមិនដល់ជាច្រើនបានកើតឡើង ក៏ដូចជាលោកបានជួប នៅក្នុងបេសកកម្មសប្បុរសធម៌លើទឹកដីអឺរ៉ុបដើម្បីជួយមន្ទីរពេទ្យ និងកុមារក្នុងស្រុក។

បញ្ហាទី១ គឺបញ្ហាអាកាសធាតុ តាមលោក ផល្លា បញ្ជាក់ថា "ជាធម្មតារដូវនេះជារដូវក្តៅ ប៉ុន្តែឆ្នាំនេះ បែរជាភ្លៀងរហូត និងត្រជាក់ទៅវិញ ហើយអាកាសធាតុ ប្រែប្រួលភ្លាមៗ ។ ជាក់ស្តែងពី Basel ទៅ Zurich មុនចាប់ផ្តើមជិះខ្ញុំឆែកអាកាសធាតុ ២៥ អស្សារ ប៉ុន្តែដល់ថ្ងៃជិះជាក់ស្តែង ១១ អស្សារ ដូចនេះធ្វើអោយខ្ញុំត្រៀមទុកមិនបានល្អ"។

លោកបន្តទៀតថា ដើម្បីអោយដំណើរការជិះកង់ទៅតាមផែនការគ្រោងទុក លោកត្រូវខិតខំជិះកង់ពីគោលដៅមួយ ទៅមួយ មិនសូវមានពេលសំរាក ដោយបារម្ភខ្លាចខកខានរថភ្លើង ដោយសារពេលទៅដល់គោលដៅ លោកត្រូវជិះរថភ្លើងទៅគោលដៅមួយទៀតដើម្បីចាប់ផ្តើមជិះបន្តទៀត។ "ប្រសិនបើខ្ញុំខកខានតែផ្លូវណាមួយ គឺធ្វើអោយប៉ះពាល់ដល់កម្មវិធីជិះកង់តែម្តង។

អ្វីដែលជាឧបសគ្គមួយទៀត គឺថា អឺរ៉ុប មិនមែនជាទឹកដី ឬទីកំណើតលោកឡើយ។ ដូច្នេះលោក មិនស្គាល់ភូមិសាស្ត្រ ផ្លូវខ្លះលោកជិះតែម្នាក់ឯងក្នុងព្រៃថែមទៀត ដែលធ្វើឲ្យលោកមានអារម្មណ៍ស្រងេះស្រងោច។

លោកថ្លែងថា "ផ្លូវដែលខ្ញុំជិះគឺមិនដែលស្គាល់សោះ អាចធ្វើដំណើរទៅបានអាស្រ័យ GPS ។ តែGPS នាំទៅតែផ្លូវក្នុងព្រៃ ជិះ១០គម- ២០ គម មិនទាន់ជួបមនុស្សម្នាក់ ពេលខ្លះGPS នាំខុសផ្លូវដែរ។ មានអារម្មណ៍ស្រងេះស្រងោចបន្តិចដោយសារជិះកង់តែម្នាក់ឯង!"។

យ៉ាងណាដោយ ពេលចេញផុតពីព្រៃ លោកក៏ជួបស្ថានភាពថ្មី និងល្អប្រសើរដែរ។ លោកថា ពេលឆ្លងកាត់ប្រជុំជន មានការទទួលរាក់ទាក់។ "ពួកគេបានមកសួរនាំពីកម្មវិធីជិះកង់របស់ខ្ញុំ ពួកគេលើកទឹកចិត្ត ផ្តល់ស្នាមញញឹម និងគាំទ្រ អ្នកខ្លះបានថតផ្លាកដែលមាន QR Code សម្រាប់ការបរិច្ចាគថែមទៀត"។

បែបនេះក្ដី លោកថា ការចូលរួមនៅមានកំរិត ត្បិតពួកគេមិនស្គាល់លោក និងមិនស្គាល់ពីស្ថានភាពមន្ទីរពេទ្យយើងច្បាស់នៅឡើយ។

មកដល់ថ្ងៃនេះ មានរយៈពេល ១សប្ដាហ៍មកហើយ ដែលលោក ផូ ផល្លា បានចាប់ផ្ដើមយុទ្ធនាការជិះកង់ដើម្បីប្រមូលមូលនិធិជួយមន្ទីរពេទ្យកុមារអង្គរ។ លោកគ្រោងជិះរយៈចម្ងាយ ៣០០០គីឡូម៉ែត្រ ដោយឆ្លងកាត់ប្រទេសតំបន់អឺរ៉ុបមួយចំនួន៨ មានដូចជា បារាំង ស្វីស លុច្សសំបួរ បែលហ្សិច អង់គ្លេស អ៊ីតាលី ហូឡង់ និងអាល្លឺម៉ង់ ថវិកាដែលប្រមូលបាន គឺផ្ដល់ជូនមន្ទីរពេទ្យកុមារអង្គរខេត្តសៀមរាបទាំងអស់។

"ដោយសារកម្មវិធីនេះ ជាកម្មវិធីសប្សុរសធម៌សុទ្ធសាទ្ធ ដូចនេះសូមពុក ម៉ែ អ៊ំ ពូ មីង បងប្អូនទាំងអស់ ដែលរស់នៅក្នុងប្រទេសក្តី ក្រៅប្រទេសក្តី មេត្តាចូលរួមបរិច្ចាកប្រាក់ទៅតាមលទ្ធភាពជូនទៅមន្ទីរពេទ្យ កុមារអង្គរ ការចូលរួមបរិច្ចាកពីពុក ម៉ែ អ៊ំ ពូ មីង បងប្អូនទាំងអស់ ពិតជាមានសារះសំខាន់ និងប្រកប ទៅដោយអត្ថន័យ និងការស្រលាញ់ដ៏ជ្រាលជ្រៅចំពោះកុមារកម្ពុជា នៅក្នុងស្មារតី “ខ្មែរជួយខ្មែរ”" ផូ ផល្លា ថ្លែង៕

សម្រាប់បងប្អូនប្រិយមិត្តចង់ចូលរួមបរិច្ចាគជួយមន្ទីរពេទ្យកុមារអង្គរ សូម Scan តាមរយៈ QR Code របស់មន្ទីរពេទ្យខាងក្រោម៖