រ៉ឺម៉កជើងដ៏មានអនុស្សាវរីយ៍ បាត់ខ្លួនរាប់ទសវត្សរ៍ ឥឡូវលេចវត្តមានវិញនៅទឹកដីអង្គរ

2023-08-10 02:56:30
ព័ត៌មាន

2023-08-10 02:56:30
ចំនួនមតិ 0 | ចំនួនចែករំលែក 0

ចន្លោះមិនឃើញ

រ៉ឺម៉កជើង គឺមធ្យោបាយធ្វើដំណើរពេញនិយមរបស់ប្រជាពលរដ្ឋខ្មែរគ្រប់ទិសទីកាលពីអតីតកាល បានបាត់ខ្លួន ទៅតាមការវិវត្តន៍បែបផែននៃការរស់នៅក្រោមឥទ្ធិពលសកលភាវូបនីយកម្មនោះ ឥឡូវនេះ បានលេចវត្តមានវិញនៅលើទឹកដីសៀមរាបក្រោមគំនិតផ្ដួចផ្ដើមរបស់មគ្គុទេសន៍ទេសចរម្នាក់។

លោក បូរ សុភា វ័យ ៣៣ឆ្នាំ គឺជាមគ្គុទេសន៍ទេសចរនៅខេត្តសៀមរាប និងជាម្ចាស់រ៉ឺម៉កជើង២គ្រឿងដែលកំពុងបង្ហាញវត្តមានដឹកភ្ញៀវទេសចរយ៉ាងសកម្មនៅតំបន់រមណីយដ្ឋានអង្គរ។ នៅក្នុងបទសម្ភាសន៍តាមរយៈសារអេឡិកត្រូនិក បុរសវ័យកណ្ដាល ប្រាប់ថា លោកជាមនុស្សស្រឡាញ់របស់របរចាស់ៗ ក្នុងនោះ រ៉ឺម៉កធាក់ជើងនេះ ជារបស់ដែលលោកងប់ងុលមួយ។

ដូច្នេះលោក ក៏ផ្ដើមផែនការប្រមូលរ៉ឺម៉កធាក់ជើងយកមកទុក។ សុភា ចំណាយពេលប្រមាណ ៣-៤ឆ្នាំមកហើយ ក្នុងការដើរប្រមូលរ៉ឺម៉កកង់ពីតាមខេត្ត តាមក្រុងនានា ក្នុងនោះរបស់ខ្លះគេបោះចោល គេលក់ជាអេតចាយ។ "ខ្ញុំប្រមូលមកទុកយូរដែរហើយ តែដោយខ្ញុំមិនទាន់មានលទ្ធភាពធ្វើ កែច្នៃវាក៏ចេះតែទុក ទើបប្រមាណ១ខែនេះទេ ទើបខ្ញុំកែច្នៃវាបាន!”។

បុរសសម្បុរស្រអែម ប្រាប់ថា លោកចង់គាស់រំលើង និងរក្សាអនុស្សាវរី៍អំពីរ៉ឺម៉កជើង និងចង់ជួយលើកកម្ពស់ឱកាសការងារដល់បងប្អូនប្រជាពលរដ្ឋក្នុងតំបន់ ទើបលោកខិតខំធ្វើវាឲ្យបាន។

បច្ចុប្បន្ន បូរ សុភា មានរ៉ឺម៉កកង់ ឬរ៉ឺម៉កធាក់ជើងចំនួន ៥គ្រឿង តែក្នុងនោះមានតែ ២គ្រឿងប៉ុណ្ណោះ លោកបានធ្វើវាឡើងវិញ ដោយដាក់ម៉ូទ័រជំនួយកម្លាំងធាក់ បច្ចុប្បន្នកំពុងដំណើរការផ្ដល់សេវាដឹកភ្ញៀវទេសចរនៅរមណីយដ្ឋានអង្គរ។ លោកថា នេះជាការសាកល្បង និងស្ទង់មើលពីការគាំទ្រ បើសិនអ្វីៗដើរទៅតាមការគិតទុក លោកនឹងច្នៃ ៣គ្រឿងដែលនៅសល់ដាក់ដំណើរការទៀត។

គិតមកដល់ពេលនេះ រ៉ឺម៉កកង់របស់ បូរ សុភា បានដំណើរជាង ១ខែហើយ។ តាម សុភា រ៉ឺម៉កកង់ របស់លោកនេះទទួលបានការចាប់អារម្មណ៍ច្រើន។ លោកថ្លែងថា "គេចាប់អារម្មណ៍ច្រើន ជិះតាមផ្លូវគេឃើញ គេទះដៃសើច ហ៊ោរ គេថារ៉ឺម៉កកង់បាត់យូរ ឥឡូវត្រឡប់មកវិញហើយ!”។

ក្រៅពីការចាប់អារម្មណ៍របស់សាធារណជននៅខេត្តសៀមរាប ប៉ុន្តែសម្រាប់ភ្ញៀវទេសចរ ពិសេសជនជាតិបរទេសក៏ជាប់អារម្មណ៍ដូចគ្នា។ សុភា ប្រាប់ថា ពេលនេះលោកទទួលបានភ្ញៀវទេសចរ ៣ក្រុមហើយ សុទ្ធជាជនជាតិបរទេសដែលមានគ្នាសរុបជាង ១០នាក់។ ស្ថានភាពនេះលោកថា មិនយូរទេ លោកនឹងតំឡើង៣គ្រឿងដែលនៅសល់ ដាក់ដំណើរការបន្ថែមទៀត៕

អត្ថបទ៖ ទារិកា