/65521090774c5_1699876980_medium.jpg)
- 2023-11-13 12:48:20
- ព័ត៌មាន
អតីតនាយករដ្ឋមន្ត្រីត្រូវបានតែងតាំងជារដ្ឋមន្ត្រីការបរទេសអង់គ្លេស
- 2023-11-13 12:48:20
- ចំនួនមតិ 0 | ចំនួនចែករំលែក 0
អតីតនាយករដ្ឋមន្ត្រីត្រូវបានតែងតាំងជារដ្ឋមន្ត្រីការបរទេសអង់គ្លេស
ចន្លោះមិនឃើញ
កាលពីរសៀលថ្ងៃនេះ លោក David Cameron អតីតនាយករដ្ឋមន្ត្រីអង់គ្លេស ត្រូវបានលោក Rishi Sunak នាយករដ្ឋមន្ត្រីអង់គ្លេសបច្ចុប្បន្ន តែងតាំងជារដ្ឋមន្ត្រីការបរទេសថ្មីរបស់អង់គ្លេស។ នេះបើតាមសេចក្ដីប្រកាសព័ត៌មានជាផ្លូវការរបស់រដ្ឋាភិបាលអង់គ្លេសទាក់ទិននឹងការផ្លាស់ប្ដូរសមាសភាពមួយចំនួនក្នុងរដ្ឋាភិបាល។
អតីតរដ្ឋមន្ត្រីការបរទេស លោក James Cleverly ត្រូវបានតែងតាំងជារដ្ឋមន្ត្រីមហាផ្ទៃជំនួសលោកស្រី Suella Braverman។
តាមរយៈសារបង្ហោះក្នុងបណ្ដាញសង្គម X (អតីត Twitter) លោក Cameron ថានឹងខិតខំប្រើប្រាស់បទពិសោធន៍ខ្លួនមានក្នុងការជួយនាយករដ្ឋមន្ត្រី Sunak ទាក់ទងនឹងវិស័យការបរទេស។
លោក Cameron ធ្លាប់ធ្វើជានាយករដ្ឋមន្ត្រីអង់គ្លេសពីឆ្នាំ ២០១០ ដល់ឆ្នាំ ២០១៦ ហើយធ្លាប់ធ្វើជាប្រធានគណបក្សអភិរក្សពីឆ្នាំ ២០០៥ ដល់ឆ្នាំ ២០១៦។ លោកធ្លាប់ធ្វើជាតំណាងរាស្ត្រអង់គ្លេសពីឆ្នាំ ២០០១ ដល់ឆ្នាំ ២០១៦។
នាពេលដែលលោកធ្វើជាដឹកនាំរដ្ឋាភិបាលនេះហើយ ដែលអង់គ្លេសបានធ្វើប្រជាមតិពាក់ព័ន្ធនឹងអនាគតរបស់អង់គ្លេសនៅក្នុងសហភាពអឺរ៉ុបកាលពីឆ្នាំ ២០១៦។ ជាលទ្ធផល ប្រជាជនអង់គ្លេសប្រមាណ ៥១ ភាគរយបានបោះឆ្នោតសម្រេចចិត្តឲ្យអង់គ្លេសចាកចេញពីសហភាពអឺរ៉ុប។ ក្រោយលទ្ធផលនេះកើតឡើង លោក Cameron សម្រេចលាលែងពីតំណែងជានាយករដ្ឋមន្ត្រី។ មូលហេតុធំមួយនៃការលាលែងនេះគឺ ដោយសារលោកមានជំហរគាំទ្រចង់ឲ្យអង់គ្លេសបន្តនៅជាសមាជិកសហភាពអឺរ៉ុប៕
