សិង្ហបុរីនឹងមាននាយករដ្ឋមន្ត្រីថ្មីនៅខែក្រោយ

2024-04-16 05:46:35
ព័ត៌មាន

2024-04-16 05:46:35
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីម្សិលមិញ លោក Lee Hsien Loong នាយករដ្ឋមន្ត្រីនៃប្រទេសសិង្ហបុរី បានប្រកាសជាសាធារណៈថាលោកនឹងចុះចេញពីតំណែងនៅខែក្រោយ។ ឧបនាយករដ្ឋមន្ត្រី Lawrence Wong នឹងឡើងមកកាន់តំណែងនាយករដ្ឋមន្ត្រីសិង្ហបុរីជំនួសលោក Lee។

លោក Lee Hsien Loong

លោក Lee Hsien Loong បានកាន់តំណែងជានាយករដ្ឋមន្ត្រីសិង្ហបុរីជាផ្លូវការកាលនៅថ្ងៃទី ១២ ខែសីហា ឆ្នាំ២០០៤។ គិតមកទល់ពេលនេះ លោកកាន់តំណែងជាប្រមុខរដ្ឋាភិបាលប្រទេសមួយនេះរយៈពេលជិត ២០ ឆ្នាំ។

សរសេរលើគណនីបណ្ដាញសង្គមផ្លូវការរបស់លោកផ្ទាល់ លោក Lee បានប្រកាសថាលោកនឹងចុះចេញពីតំណែងនាយករដ្ឋមន្ត្រីនៅថ្ងៃទី ១៥ ខែឧសភា ឆ្នាំ២០២៤។ លោកក៏បានអំពាវនាវប្រជាជនសិង្ហបុរីផ្ដល់ការគាំទ្រដល់ឧបនាយករដ្ឋមន្ត្រី Lawrence Wong ដែលនឹងឡើងមកកាន់តំណែងជានាយករដ្ឋមន្ត្រីថ្មី។

លោក Lawrence Wong

ក្រោយការប្រកាសរបស់លោក Lee លោក Lawrence Wong ក៏បានចេញសារមួយផងដែរ ថាលោកនឹងខិតខំឲ្យអស់សមត្ថភាពក្នុងការបម្រើប្រទេស និងប្រជាជនសិង្ហបុរីក្នុងនាមជានាយករដ្ឋមន្ត្រីនាពេលដ៏ខ្លីខាងមុខ។

បច្ចុប្បន្នលោក Lawrence Wong គឺជាឧបនាយករដ្ឋមន្ត្រី និងរដ្ឋមន្ត្រីក្រសួងសេដ្ឋកិច្ចសិង្ហបុរីតាំងពីឆ្នាំ ២០២២ មក។ មុនមកកាន់តំណែងជាឧបនាយករដ្ឋមន្ត្រី លោក Wong ធ្លាប់កាន់តំណែងជាច្រើនតាំងពីចូលប្រលូកឆាកនយោបាយកាលពីឆ្នាំ ២០១១ មក ដូចជាសមាជិកសភា រដ្ឋមន្ត្រីអប់រំ រដ្ឋមន្ត្រីវប្បធម៌ រដ្ឋមន្ត្រីទទួលបន្ទុកកិច្ចការអភិវឌ្ឍជាតិជាដើម។ មុនចូលនយោបាយ ពីឆ្នាំ ១៩៩៧ ដល់ ២០១១ លោកគឺជាមន្ត្រីរាជការនៅក្រសួងមួយចំនួនដូចជាក្រសួងពាណិជ្ជកម្ម និងឧស្សាហកម្ម ក្រសួងសេដ្ឋកិច្ច ក្រសួងសុខាភិបាល និងអាជ្ញាធរទទួលបន្ទុកទីផ្សារថាមពលសិង្ហបុរី។ ក្នុងចន្លោះនោះ ពីឆ្នាំ ២០០៥ ដល់ឆ្នាំ ២០០៨ លោកធ្លាប់ជាលេខាផ្ទាល់នាយករដ្ឋមន្ត្រីបច្ចុប្បន្ន Lee Hsien Loong។

តាមពិតទៅ ការប្រកាសកំណត់ថ្ងៃនៃការផ្លាស់ប្ដូរនាយករដ្ឋមន្ត្រីមិនមានភាពភ្ញាក់ផ្អើលឡើយនៅសិង្ហបុរី។ នេះក៏ដោយសារតែការរៀបចំការផ្ទេរអំណាចនេះបានកើតឡើងជាង ២ ឆ្នាំទៅហើយ។ ក្នុងកម្រិតគណបក្សកាន់អំណាចសិង្ហបុរី លោក Lawrence Wong ត្រូវបានជ្រើសរើសជាបេក្ខភាពនាយករដ្ឋមន្ត្រីជំនួសលោក Lee តាំងពីខែសីហា ឆ្នាំ២០២២។ នៅខែវិច្ឆិកា ឆ្នាំ២០២៣ លោក Lee បានប្រកាសជាផ្លូវការថាលោកនឹងចុះចេញពីតំណែងនាយករដ្ឋមន្ត្រីយ៉ាងយូរបំផុតត្រឹមខែវិច្ឆិកា ឆ្នាំ ២០២៤ ហើយនឹងត្រូវបានជំនួសដោយលោក Lawrence Wong។

សិង្ហបុរីគឺជាប្រទេសប្រកាន់របបសភានិយម ហើយមានការបោះឆ្នោតជាទូទៅរៀងរាល់ ៥ ឆ្នាំម្តង។ ការរើសនាយករដ្ឋមន្ត្រី គឺអាស្រ័យដោយសំឡេងគាំទ្រភាគច្រើនរបស់សមាជិកសភាដែលកើតចេញពីការបោះឆ្នោតដោយប្រជាជន។ ដោយបក្សកាន់អំណាចរបស់សិង្ហបុរីគ្រប់គ្រងសំឡេងភាគច្រើនក្នុងសភា (៨៣ អាសនៈ នៃ ៩៣ អាសនៈសភាសរុប) ដូច្នេះការរើសនាយករដ្ឋមន្ត្រីក្នុងកម្រិតស្ថានភាពជាក់ស្តែងជាសេចក្ដីសម្រេចរបស់បក្សកាន់អំណាច៕

ប្រភព៖ CNA អត្ថបទ៖ សេរី មង្គល