បដិវត្តន៍ឧស្សាហកម្មទាំង ៤ជំនាន់ក្នុងប្រវត្តិសាស្ត្រមនុស្សជាតិ

2024-09-24 13:17:38
ព័ត៌មាន

2024-09-24 13:17:38
ចំនួនមតិ 0 | ចំនួនចែករំលែក 0

ចន្លោះមិនឃើញ

តាំងពីកកើតនៃមនុស្សជាតិមក មនុស្សតែងតែស្វែងរកអ្វីៗដែលថ្មីជានិច្ចក្នុងការអភិវឌ្ឍជីវភាពរស់នៅប្រចាំថ្ងៃរបស់ខ្លួន។ ក្នុងកំឡុងពេលនោះ មនុស្សត្រាច់ចរចេញពីព្រៃភ្នំ ហើយធ្វើកសិកម្មបង្កើតជាភូមិឋាន ក្រោយមករីកធំធាត់ក្លាយជាទីក្រុង ដែលនាំឲ្យគំនិតរីកចម្រើនជាលំដាប់។

អស់រយៈកាលជាច្រើនពាន់ឆ្នាំមក មនុស្សចាប់ផ្ដើមចេះប្រើប្រាស់សម្ភារៈដែលវិវត្តន៍ពីថ្ម រហូតដល់លោហៈ បន្ទាប់មកក៏រកឃើញម៉ាស៊ីន។ គំនិតវិទ្យាសាស្ត្រទាំងនោះ បានញ៉ាំងឲ្យមានការផ្លាស់ប្ដូរមួយដ៏ធំក្នុងជីវិតដែលគេឲ្យឈ្មោះ បដិវត្តន៍ឧស្សាហកម្ម។

មកទល់សព្វថ្ងៃនេះ បដិវត្តន៍ឧស្សាហកម្មមាន ៤ជំនាន់ ដែលរីកចម្រើនចាប់តាំងពីសតវត្សទី ១៨ មក។ បដិវត្តន៍ឧស្សាហកម្មទាំង ៤នោះមានដូចជា៖

បដិវត្តន៍ឧស្សាហកម្មជំនាន់ទី ១៖ កើតឡើងដំបូងនៅប្រទេសអង់គ្លេស កំឡុងពាក់កណ្ដាលសតវត្សទី ១៨។ បដិវត្តន៍ឧស្សាហកម្មនេះ ធ្វើឲ្យមនុស្សបង្កើនផលិតកម្មដោយប្រើប្រាស់ម៉ាស៊ីនដើរដោយចំហាយទឹក។

បដិវត្តន៍ឧស្សាហកម្មជំនាន់ទី ២៖ កើតឡើងនៅប្រទេសអឺរ៉ុប សហរដ្ឋអាមេរិក និងជប៉ុននៅពាក់កណ្ដាលសតវត្សទី ១៩។ ក្នុងជំនាន់នោះ មនុស្សចេះប្រើប្រាស់ថាមពលអគ្គិសនី និងបង្កើនផលិតកម្មខ្លាំងជាងមុន។

បដិវត្តន៍ឧស្សាហកម្មជំនាន់ទី ៣៖ កើតឡើងនៅពាក់កណ្ដាល និងចុងសតវត្សទី ២០ ដែលធ្វើឲ្យមានលក្ខណៈជាបដិវត្តន៍ឌីជីថល ដែលមនុស្សប្រើប្រាស់អេឡិចត្រូនិក និងព័ត៌មានវិទ្យា ដើម្បីបង្កើនផលិតកម្មដោយស្វ័យប្រវត្តិ។

បដិវត្តន៍ឧស្សាហកម្មជំនាន់ទី ៤៖ កើតឡើងក្នុងពេលបច្ចុប្បន្ននេះឯង ដោយអភិវឌ្ឍបន្ថែមលើបដិវត្តន៍ជំនាន់ទី ៣ ដែលបន្ថែមលើការប្រើប្រាស់មនុស្សយន្តជំនួសកម្លាំងពលកម្មមនុស្ស៕