ក្រសួងសាធារណការ និងដឹកជញ្ជូន (MPWT) បានបញ្ចប់ការតភ្ជាប់ផ្នែកផ្លូវនៅលើស្ពានខ្ពស់ជាងគេនៅភាគខាងលិចប្រទេសកម្ពុជា ស្ថិតក្នុងខេត្តពោធិ៍សាត់ និងបានបើកឱ្យប្រើប្រាស់ជាបណ្តោះអាសន្នក្នុងអំឡុងពេលបុណ្យចូលឆ្នាំថ្មីប្រពៃណីខ្មែរ។ ពិធីបញ្ចប់ការតភ្ជាប់ផ្នែកផ្លូវទៅកាន់ជើងសសរស្ពាននេះបានធ្វើឡើងនៅព្រឹកថ្ងៃទី ៨ ខែមេសា ឆ្នាំ២០២៥នេះ ក្រោមអធិបតីភាពរបស់ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា ដោយមានការចូលរួមពីអាជ្ញាធរមូលដ្ឋាន និងតំណាងក្រុមហ៊ុនសាងសង់។

ក្រសួងបានប្រកាសថា ស្ពាននេះនឹងបើកឱ្យប្រើប្រាស់សាកល្បងចាប់ពីថ្ងៃទី ១១ ដល់ថ្ងៃទី ១៧ ខែមេសា ឆ្នាំ ២០២៥ ដើម្បីផ្តល់ភាពងាយស្រួលដល់អ្នកធ្វើដំណើរក្នុងឱកាសបុណ្យចូលឆ្នាំ។ ស្ពានលេខ ២៨ នេះត្រូវបានសាងសង់ដោយក្រុមហ៊ុន China Road and Bridge Corporation (CRBC) ដោយលាតសន្ធឹងលើជ្រលងទន្លេឬស្សីជ្រុំ ស្ថិតនៅភូមិឆាយលុក ឃុំអូរសោម ស្រុកវាលវែង តាមបណ្តោយផ្លូវជាតិលេខ ១០។

ស្ពាននេះមានកម្ពស់ ៩០ ម៉ែត្រ ប្រវែងសរុប ៥៣៧ ម៉ែត្រ និងទទឹង ១០ ម៉ែត្រ ជាស្ពានខ្ពស់ជាងគេនៅក្នុងប្រទេសកម្ពុជា។ នេះជាផ្នែកមួយនៃគម្រោងស្តារឡើងវិញផ្លូវជាតិលេខ ១០ ដែលមានប្រវែងសរុប ១៩៧,៣ គីឡូម៉ែត្រ តភ្ជាប់ខេត្តបាត់ដំបង និងខេត្តកោះកុង។

ឯកឧត្តម ស៊ុន ចាន់ថុល បានមានប្រសាសន៍ក្នុងពិធីនេះថា «ការបើកឱ្យប្រើប្រាស់ស្ពាននេះជាបណ្តោះអាសន្ននឹងជួយសម្រួលដល់ការធ្វើដំណើររបស់ប្រជាពលរដ្ឋក្នុងអំឡុងពេលបុណ្យចូលឆ្នាំ និងបង្ហាញពីការប្តេជ្ញាចិត្តរបស់រាជរដ្ឋាភិបាលក្នុងការអភិវឌ្ឍហេដ្ឋារចនាសម្ព័ន្ធដឹកជញ្ជូន»។ ឯកឧត្តមបានបន្ថែមថា ការសាងសង់ស្ពាននេះនឹងបន្តដើម្បីធានាគុណភាព និងសុវត្ថិភាពសម្រាប់ការប្រើប្រាស់ជាអចិន្ត្រៃយ៍នាពេលអនាគត។

ស្ពានលេខ ២៨ នេះត្រូវបានគេរំពឹងថានឹងកាត់បន្ថយរយៈពេលធ្វើដំណើររវាងខេត្តបាត់ដំបង និងខេត្តកោះកុង ព្រមទាំងជួយជំរុញសេដ្ឋកិច្ចតំបន់ភាគខាងលិចប្រទេសកម្ពុជា តាមរយៈការតភ្ជាប់ផ្លូវដែលមានស្តង់ដារខ្ពស់៕