ប្រទេសម៉ាឡេស៊ីបានកំណត់គោលដៅដ៏មានមហិច្ឆតាក្នុងការបង្កើតប្រាក់ចំណូលប្រចាំឆ្នាំចំនួន ២,៧ ពាន់លានដុល្លារអាមេរិក ពីវិស័យទេសចរណ៍វេជ្ជសាស្ត្រនៅត្រឹមឆ្នាំ ២០៣០។ យោងតាមការបញ្ជាក់ពីក្រុមប្រឹក្សាទេសចរណ៍វេជ្ជសាស្ត្រម៉ាឡេស៊ី (MHTC) ប្រទេសនេះកំពុងផ្តោតលើគុណភាព តម្លៃសមរម្យ និងសេវាកម្មផ្ទាល់ខ្លួនដើម្បីរក្សាការប្រកួតប្រជែងនៅក្នុងទីផ្សារដែលមានការកើនឡើងនៃតម្រូវការជាសកល។

នៅឆ្នាំ ២០២៣ មានអ្នកទេសចរវេជ្ជសាស្ត្រជាង ១ លាននាក់បានមកទស្សនាម៉ាឡេស៊ី ដែលបានបង្កើតប្រាក់ចំណូលជិត ៥០០ លានដុល្លារអាមេរិក។ តួលេខនេះបានកើនឡើងគួរឱ្យកត់សម្គាល់បើធៀបនឹងសម័យកាលជំងឺរាតត្បាត និងខ្ពស់ជាងតួលេខមុនពេលកូវីដ-១៩។ លើសពីនេះ នៅត្រីមាសទីមួយនៃឆ្នាំ ២០២៥ ម៉ាឡេស៊ីបានទទួលអ្នកជំងឺអន្តរជាតិចំនួន ១,៥២ លាននាក់ ដែលបង្ហាញថាប្រទេសនេះស្ថិតនៅលើមាគ៌ាត្រឹមត្រូវដើម្បីសម្រេចគោលដៅ ២,៧ ពាន់លានដុល្លារនៅឆ្នាំ ២០៣០។

ប្រទេសម៉ាឡេស៊ីបាននឹងកំពុងទាក់ទាញអ្នកទេសចរវេជ្ជសាស្ត្រជាមួយនឹងសេវាកម្មសុខភាពលំដាប់ខ្ពស់ក្នុងតម្លៃទាបជាងបើធៀបនឹងប្រទេសផ្សេងទៀតដូចជាសហរដ្ឋអាមេរិក អឺរ៉ុប និងបណ្តាប្រទេសជិតខាងនៅអាស៊ី។ ឧទាហរណ៍ ការព្យាបាលដោយបច្ចេកទេសបង្កកំណើត (IVF) នៅម៉ាឡេស៊ីមានតម្លៃចាប់ពី ប្រមាណ ៣,០០០ ទៅ ៤,០០០ ដុល្លារ ខណៈដែលនៅសហរដ្ឋអាមេរិកតម្លៃអាចឡើងដល់ ១៥,០០០ ទៅ ២០,០០០ ដុល្លារ។

តំបន់ដូចជា Klang Valley និង Penang នៅតែជាចំណុចទាក់ទាញសំខាន់សម្រាប់អ្នកទេសចរវេជ្ជសាស្ត្រ ដោយសារមានមន្ទីរពេទ្យទំនើបៗ និងវេជ្ជបណ្ឌិតជំនាញ។ អ្នកទេសចរមកពីប្រទេសឥណ្ឌូនេស៊ីជាក្រុមធំបំផុត ដែលស្មើនឹង ៦៦ ភាគរយនៃអ្នកទេសចរវេជ្ជសាស្ត្រសរុប ខណៈដែលចំនួនអ្នកមកពីប្រទេសចិនក៏កំពុងកើនឡើងគួរឱ្យកត់សម្គាល់។ ទោះជាយ៉ាងណា ម៉ាឡេស៊ីក៏ប្រឈមនឹងការប្រកួតប្រជែងពីប្រទេសដទៃទៀតក្នុងតំបន់អាស៊ាន ដូចជាថៃ ដែលបានបង្កើតប្រាក់ចំណូលប្រមាណ ៨៥០ លានដុល្លារក្នុងឆ្នាំ ២០២៣។

អ្នកជំនាញជឿជាក់ថា ជោគជ័យនេះនឹងជួយជំរុញសេដ្ឋកិច្ចម៉ាឡេស៊ី និងពង្រឹងកេរ្តិ៍ឈ្មោះរបស់ខ្លួនជាមជ្ឈមណ្ឌលសុខភាពអន្តរជាតិ៕