សហរដ្ឋអាមេរិក បានប្រកាសដាក់ពន្ធថ្មីក្នុងអត្រាខ្ពស់បំផុតរហូតដល់ ៣៥២១% លើការនាំចូលផលិតផលផ្ទាំងសូឡា ពីបណ្តាប្រទេសអាស៊ីអាគ្នេយ៍ រួមមាន កម្ពុជា ម៉ាឡេស៊ី ថៃ និងវៀតណាម។ វិធានការនេះត្រូវបានប្រកាសដោយក្រសួងពាណិជ្ជកម្មអាមេរិកនៅថ្ងៃចន្ទ ទី២១ ខែមេសា ឆ្នាំ២០២៥។

អត្រាពន្ធនេះប្រែប្រួលទៅតាមក្រុមហ៊ុននិងប្រទេស។ ជាក់ស្តែងផលិតផលរបស់ក្រុមហ៊ុន Jinko Solar ពីម៉ាឡេស៊ីត្រូវបានកំណត់ពន្ធនៅអត្រាទាបបំផុតគឺ ៤១.៥៦% ខណៈដែលផលិតផលរបស់ក្រុមហ៊ុន Trina Solar ពីថៃប្រឈមនឹងពន្ធ ៣៧៥.១៩%។ ទោះជាយ៉ាងណា ផលិតផលមកពីកម្ពុជាត្រូវបានដាក់ពន្ធខ្ពស់បំផុតរហូតដល់ជាង ៣៥២១%។

វិធានការនេះជាផ្នែកមួយនៃការស៊ើបអង្កេតដែលចាប់ផ្តើមកាលពីឆ្នាំមុនក្រោមរដ្ឋបាលរបស់អតីតប្រធានាធិបតី Joe Biden បន្ទាប់ពីសម្ព័ន្ធក្រុមហ៊ុនផលិតថាមពលពន្លឺព្រះអាទិត្យអាមេរិកបានចោទប្រកាន់ថា ក្រុមហ៊ុនបរទេសបានធ្វើឱ្យទីផ្សារអាមេរិកខូចខាតដោយលក់ផលិតផលក្នុងតម្លៃទាបមិនសមហេតុផល។ ការស៊ើបអង្កេតនេះបាននាំឱ្យមានការដាក់ពន្ធបណ្តោះអាសន្នកាលពីឆ្នាំមុន ប៉ុន្តែអត្រាពន្ធដែលប្រកាសថ្មីនេះគឺខ្ពស់ជាងអត្រាបណ្តោះអាសន្ន។

ទោះបីជាវិធានការនេះត្រូវបានគេមើលឃើញថាជាជ័យជម្នះសម្រាប់ក្រុមហ៊ុនផលិតក្នុងស្រុករបស់អាមេរិកក៏ដោយ វាក៏បានបង្កើតនូវបញ្ហាប្រឈមសម្រាប់វិស័យអភិវឌ្ឍន៍ថាមពលកកើតឡើងវិញរបស់សហរដ្ឋអាមេរិក ដែលពឹងផ្អែកលើការផ្គត់ផ្គង់ផលិតផលថោកពីបរទេស។ អ្នកជំនាញព្រមានថា ពន្ធខ្ពស់នេះអាចប៉ះពាល់ដល់គម្រោងថាមពលកកើតឡើងវិញ និងបង្កើនតម្លៃសម្រាប់អ្នកប្រើប្រាស់។ នៅកម្ពុជា ដែលជាប្រទេសនាំចេញផលិតផលផ្ទាំងសូឡា ទៅកាន់សហរដ្ឋអាមេរិក វិធានការនេះអាចជះឥទ្ធិពលអវិជ្ជមានដល់វិស័យផលិតកម្ម។

ដើម្បីឱ្យពន្ធនេះត្រូវបានអនុវត្តជាផ្លូវការ គណៈកម្មការពាណិជ្ជកម្មអន្តរជាតិរបស់អាមេរិក (International Trade Commission) នឹងត្រូវបោះឆ្នោតនៅខែមិថុនា ឆ្នាំ២០២៥ ដើម្បីកំណត់ថាតើការនាំចូលទាំងនេះបានបង្កគ្រោះថ្នាក់ដល់ឧស្សាហកម្មក្នុងស្រុកឬអត់។ ប្រសិនបើការបោះឆ្នោតនេះអនុម័ត ពន្ធនឹងចូលជាធរមានជាផ្លូវការ ដែលនឹងផ្លាស់ប្តូរទិដ្ឋភាពនៃពាណិជ្ជកម្មផ្ទាំងសូឡា នៅក្នុងតំបន់៕