អាជ្ញាធរក្នុងតំបន់នៅកោះផាងង៉ាន ដែលជាកន្លែងល្បីល្បាញដោយសារពិធីជប់លៀង បានបិទផ្លាកសញ្ញាហាមឃាត់ការអាក្រាតជាសាធារណៈនៅតាមឆ្នេរសមុទ្រនានា បន្ទាប់ពីទទួលបានការតវ៉ាជាច្រើនពីភ្ញៀវទេសចរអំពីអាកប្បកិរិយាអាក្រាតរបស់អ្នកទេសចរមួយចំនួន។ វិធានការនេះត្រូវបានអនុវត្តដើម្បីរក្សាវប្បធម៌ និងច្បាប់របស់ប្រទេសថៃ។

យោងតាមកាសែត Bangkok Post កាលពីថ្ងៃពុធ ទី៣០ ខែមេសា ឆ្នាំ២០២៥ អាជ្ញាធរមូលដ្ឋានបានបិទផ្លាកសញ្ញាហាមឃាត់នៅឆ្នេរ Zen Beach និង Secret Beach ដែលជាទីតាំងពេញនិយមសម្រាប់ការជប់លៀង។ លើសពីនេះ អាជ្ញាធរបានចែកខិតប័ណ្ណជូនភ្ញៀវទេសចរ និងអាជីវកម្មទេសចរណ៍ក្នុងតំបន់ ដូចជាភោជនីយដ្ឋាន និងសណ្ឋាគារ ដើម្បីផ្សព្វផ្សាយអំពីច្បាប់នេះ។ លោកវរសេនីយ៍ឯក Apichart Chansamret ប្រធានប៉ូលិសកោះផាងង៉ាន បានបញ្ជាក់ថា ការអាក្រាតជាសាធារណៈគឺខុសច្បាប់នៅក្នុងប្រទេសថៃ ហើយអ្នកល្មើសអាចប្រឈមនឹងការដកហូតទិដ្ឋាការ។

ការដាក់ចេញនូវវិធានការនេះកើតឡើងបន្ទាប់ពីមានករណីគូស្នេហ៍ជនជាតិប៉ូឡូញមួយគូ ត្រូវបានចាប់ខ្លួនកាលពីពេលថ្មីៗនេះ ដោយសារពួកគេបានអាក្រាត និងឱបគ្នានៅកណ្តាលផ្លូវសាធារណៈនៅលើកោះនេះ។ លោក Thawil Ruangthong អ្នករស់នៅលើកោះផាងង៉ាន បាននិយាយថា កោះនេះទទួលភ្ញៀវទេសចរមកពីគ្រប់ទិសទី ហើយអាកប្បកិរិយាមិនសមរម្យមួយចំនួនបានប៉ះពាល់ដល់រូបភាពទេសចរណ៍របស់កោះ។ លោកបន្តថា ការអាក្រាតជាសាធារណៈអាចនាំឱ្យមានការផាកពិន័យរហូតដល់ ៥,០០០ បាត។

កោះផាងង៉ាន ដែលស្ថិតនៅខេត្តស៊ូរ៉ាត់ថានី ត្រូវបានគេស្គាល់ជាសកលដោយសារពិធីជប់លៀងព្រះច័ន្ទពេញវង់ ដែលទាក់ទាញភ្ញៀវទេសចររាប់ពាន់នាក់ជារៀងរាល់ខែ។ ទោះជាយ៉ាងណា អាកប្បកិរិយាមិនសមរម្យដូចជាការអាក្រាតជាសាធារណៈបានបង្កឱ្យមានការព្រួយបារម្ភក្នុងចំណោមអ្នករស់នៅមូលដ្ឋាន និងអាជ្ញាធរ។ ដើម្បីដោះស្រាយបញ្ហានេះ អាជ្ញាធរបានប្តេជ្ញាពង្រឹងការអនុវត្តច្បាប់ និងបន្តផ្សព្វផ្សាយការយល់ដឹងអំពីវប្បធម៌ និងច្បាប់ក្នុងស្រុកដល់ភ្ញៀវទេសចរ។

អាជ្ញាធរក៏បានអំពាវនាវឱ្យភ្ញៀវទេសចរគោរពច្បាប់ និងទំនៀមទម្លាប់របស់ប្រទេសថៃ ដើម្បីរក្សាបរិយាកាសទេសចរណ៍ដ៏រីករាយ និងប្រកបដោយសុវត្ថិភាព។ សញ្ញាហាមឃាត់ទាំងនេះត្រូវបានគេរំពឹងថានឹងជួយកាត់បន្ថយអាកប្បកិរិយាមិនសមរម្យ និងលើកកម្ពស់កេរ្តិ៍ឈ្មោះរបស់កោះផាងង៉ានជាគោលដៅទេសចរណ៍ដ៏គួរឱ្យទាក់ទាញ៕