រដ្ឋាភិបាលថៃ ដឹកនាំដោយនាយករដ្ឋមន្ត្រី ផែថងថាន ស៊ីណាវ៉ាត្រា បានប្រកាសលុបចោលការរឹតត្បិតលើការនាំចេញអង្ករ ដើម្បីអនុញ្ញាតឱ្យកសិករខ្នាតតូច និងសហគ្រាសខ្នាតតូច និងមធ្យម (SMEs) អាចនាំចេញអង្ករទៅកាន់ទីផ្សារអន្តរជាតិបាន។ គោលនយោបាយនេះមានគោលបំណងបំបែកការផ្តាច់មុខនៅក្នុងឧស្សាហកម្មអង្ករ និងផ្តល់ឱកាសឱ្យកសិករទទួលបានប្រាក់ចំណូលកាន់តែប្រសើរ។

យោងតាមការលើកឡើងរបស់លោក ជីរ៉ាយុ អ្នកនាំពាក្យរដ្ឋាភិបាលថៃ នៅថ្ងៃទី១៤ ខែឧសភា គណៈរដ្ឋមន្ត្រីបានអនុម័តសេចក្តីព្រាងបទបញ្ជាក្រសួងស្តីពីការកាត់បន្ថយថ្លៃសេវាអាជ្ញាបណ្ណនាំចេញអង្ករ។ ថ្លៃសេវាសម្រាប់អ្នកនាំចេញអង្ករវេចខ្ចប់ត្រូវបានកាត់បន្ថយពី ២០,០០០ បាត មកនៅត្រឹម ១០,០០០ បាត។ វិធានការនេះត្រូវបានរំពឹងថានឹងជួយសម្រួលដល់កសិករខ្នាតតូចក្នុងការចូលទៅកាន់ទីផ្សារពិភពលោក។

លោក ជីរ៉ាយុ បានសង្កត់ធ្ងន់ថា គោលនយោបាយរបស់នាយករដ្ឋមន្ត្រី ផែថងថាន ផ្តោតលើការលើកកម្ពស់ជីវភាពរបស់កសិករថៃ ដោយមានគោលដៅផ្តល់នូវស្ថិរភាពសេដ្ឋកិច្ចរយៈពេលវែង។ “គោលនយោបាយនេះអនុញ្ញាតឱ្យកសិករអង្ករថៃនាំចេញផលិតផលរបស់ពួកគេដោយមិនចាំបាច់ពឹងផ្អែកលើសាជីវកម្មធំៗ ដែលជួយសម្រួលដល់ការធ្វើពាណិជ្ជកម្មសេរីនៅក្នុងសេដ្ឋកិច្ចពិភពលោកសព្វថ្ងៃ” លោកបាននិយាយ។

ទោះជាយ៉ាងណា សមាគមន៍អ្នកនាំចេញអង្ករថៃ (TREA) បានរិះគន់គោលនយោបាយនេះថាអាចនឹងមិនអាចសម្រេចបានដូចការរំពឹងទុក។ លោក ឈុកគីអាត អុផាសវ៉ុងសេ ប្រធានកិត្តិយសនៃ TREA បានលើកឡើងថា ការនាំចេញអង្ករទាមទារឯកសារច្រើន និងថ្លៃសេវាខ្ពស់ ដែលកសិករនិង SMEs អាចនឹងជួបការលំបាកក្នុងការគ្រប់គ្រង។ “រដ្ឋាភិបាលហាក់កំពុងលក់ក្តីសុបិនមួយ ប៉ុន្តែវាពិបាកសម្រាប់កសិករក្នុងការអនុវត្តជាក់ស្តែង” លោកបានថ្លែង។

ទោះបីមានការសង្ស័យខ្លះក៏ដោយ គោលនយោបាយនេះត្រូវបានចាត់ទុកថាជាការផ្លាស់ប្តូរដ៏សំខាន់មួយនៅក្នុងឧស្សាហកម្មនាំចេញអង្កររបស់ថៃ។ វាមានគោលបំណងផ្តល់អំណាចដល់កសិករ និងជួយឱ្យពួកគេអាចប្រកួតប្រជែងនៅលើទីផ្សារអន្តរជាតិ ខណៈដែលប្រទេសថៃនៅតែជាប្រទេសនាំចេញអង្ករធំជាងគេលំដាប់ទីពីរនៅលើពិភពលោក៕