សន្និសីទពិភពលោកស្តីពីមនុស្សយន្តឆ្នាំ២០២៥ World Robot Conference - WRC 2025 លើកទី១០ ត្រូវបានរៀបចំឡើង កាលពីថ្ងៃទី៨ ដល់ថ្ងៃទី១២ ខែសីហា ឆ្នាំ២០២៥ នៅទីក្រុងប៉េកាំង ប្រទេសចិន។

សន្និសីទនេះត្រូវបានសហការរៀបចំដោយវិទ្យាស្ថានអេឡិចត្រូនិកចិន (Chinese Institute of Electronics - CIE) និងអង្គការសហប្រតិបត្តិការមនុស្សយន្តពិភពលោក (World Robot Cooperation Organization - WRCO) ក្រោមប្រធានបទ «ធ្វើឱ្យមនុស្សយន្តកាន់តែឆ្លាតវៃ និងធ្វើឱ្យភ្នាក់ងាររូបវន្តកាន់តែឆ្លាតវៃ»។

សន្និសីទនេះបានទាក់ទាញក្រុមហ៊ុនមនុស្សយន្តជាង២០០ ដែលបានបង្ហាញផលិតផលជាង១៥០០ រួមទាំងផលិតផលថ្មីជាង១០០ ដែលជាចំនួនច្រើនជាងពីរដងបើប្រៀបធៀបនឹងឆ្នាំ២០២៤។

មនុស្សយន្ត មនុស្សសិប្បនិម្មិត (humanoid robots) គឺជាចំណុចសំខាន់ ដោយមានការបង្ហាញសមត្ថភាពដូចជា ការប្រកួតប្រដាល់ ការលេងកីឡាបាល់ទាត់ ការប្រតិបត្តិការឧស្សាហកម្ម និងសេវាកម្មសណ្ឋាគារ។ ក្រុមហ៊ុនល្បីៗដូចជា Unitree Robotics បានបង្ហាញមនុស្សយន្ត G1 ដែលអាចធ្វើចលនាគុនកុងហ្វូ ខណៈ UBTECH Robotics បានបង្ហាញម៉ូដែល Walker S2 ដែលអាចផ្លាស់ប្តូរថ្មដោយខ្លួនឯង។

លើសពីនេះ មនុស្សយន្តពីក្រុមហ៊ុនដូចជា Beijing Humanoid Robot Innovation Center បានបង្ហាញការសហការក្នុងកិច្ចការដូចជាត្រួតពិនិត្យខ្សែភ្លើង។ ប្រទេសចិន បានបង្ហាញពីភាពលេចធ្លោររបស់ខ្លួននៅក្នុងវិស័យមនុស្សយន្ត ដោយមានការដាក់ពាក្យស្នើសិទ្ធិប៉ាតង់ជាង ២/៣ នៃពិភពលោក ក្នុងឆ្នាំ២០២៤ និងជាទីផ្សារធំបំផុតសម្រាប់មនុស្សយន្តឧស្សាហកម្មអស់រយៈពេល ១២ឆ្នាំ ជាប់គ្នា។

ទោះយ៉ាងណា បញ្ហាប្រឈមនៅតែមាន ដូចជាល្បឿនយឺតយ៉ាវនៃមនុស្សយន្ត (ត្រឹមតែ២០%នៃប្រសិទ្ធភាពមនុស្ស) និងតម្រូវការទិន្នន័យបណ្តុះបណ្តាលបន្ថែម ដែលអាចត្រូវការពេលរាប់ទសវត្សរ៍ដើម្បីសម្រេចបាននូវកម្រិតមនុស្ស។

សន្និសីទនេះក៏បានរៀបចំកម្មវិធីប្រកួតប្រជែងដូចជា World Humanoid Robot Games និងការពិភាក្សាស្តីពីបញ្ញាសិប្បនិម្មិតរួមបញ្ចូលជាមួយមនុស្សយន្ត ដែលបង្ហាញពីសក្តានុពលនាពេលអនាគតក្នុងវិស័យឧស្សាហកម្ម និងជីវិតប្រចាំថ្ងៃ៕