ក្រុមហ៊ុនផលិតបង្គន់អនាម័យដ៏ល្បីរបស់ជប៉ុន TOTO បានបើកដំណើរការសេវាកម្មថ្មីមួយ ដែលអនុញ្ញាតឱ្យអ្នកដែលត្រូវការបន្ទប់ទឹកនៅទីសាធារណៈអាចស្វែងរកទីតាំងបន្ទប់ទឹកនៅជិតបំផុត និងពិនិត្យមើលស្ថានភាពកកស្ទះតាមពេលជាក់ស្តែងបាន ដោយគ្រាន់តែប្រើទូរស័ព្ទ និងស្កេន QR Code។

ប្រទេសជប៉ុន ដូចជាប្រទេសជាច្រើនទៀត កំពុងប្រឈមនឹងបញ្ហាការតម្រង់ជួរនៅខាងក្រៅបន្ទប់ទឹកសាធារណៈ ជាពិសេសសម្រាប់ស្ត្រី នៅតាមស្ថានីយ៍រថភ្លើងដ៏មមាញឹក និងទីកន្លែងសាធារណៈផ្សេងទៀត។

សេវាកម្មនេះ ដែលបានចាប់ផ្តើមនៅខែសីហា ឆ្នាំ ២០២៥ ដោយក្រុមហ៊ុន TOTO ដែលត្រូវបានគេស្គាល់ជាក្រុមហ៊ុនផលិតបង្គន់អនាម័យ ដ៏ល្បីរបស់ជប៉ុន។ ប្រព័ន្ធនេះត្រូវបានរចនាឡើងដើម្បីជូនដំណឹងដោយស្វ័យប្រវត្តិដល់បុគ្គលិកគ្រប់គ្រង ប្រសិនបើបន្ទប់ទឹកណាមួយកខ្វក់ ឬ មានអ្នកចូលយូរពេក។

អ្នកប្រើប្រាស់អាចស្កេន QR Code ដោយទូរស័ព្ទរបស់ពួកគេ ដើម្បីចូលទៅកាន់គេហទំព័រមួយ ដែលបង្ហាញទីតាំងបន្ទប់ទឹក និងកម្រិតនៃការកកស្ទះតាមពេលជាក់ស្តែង។ នៅក្នុងបន្ទប់ទឹក មាន QR Code ដែលអនុញ្ញាតឱ្យអ្នកប្រើប្រាស់រាយការណ៍អំពីបញ្ហា ដូចជាការមិនអាចបង្ហូរទឹក ឬឧបករណ៍ខូច តាមរយៈគេហទំព័រមួយ។ សេវាកម្មនេះគាំទ្រច្រើនភាសា រួមមានភាសាអង់គ្លេស ចិន និងកូរ៉េ ដើម្បីបម្រើភ្ញៀវទេសចរអន្តរជាតិ៕