- 2016-08-20 12:52:11
- សេដ្ឋកិច្ច
ជាង២០ឆ្នាំ ក្រសួងទេសចរណ៍ សម្រេចកែសម្រួលថ្លៃសំបុត្រចូលទស្សនាអង្គរវត្ត
- 2016-08-20 12:52:11
- ចំនួនមតិ 0 | ចំនួនចែករំលែក 0
ជាង២០ឆ្នាំ ក្រសួងទេសចរណ៍ សម្រេចកែសម្រួលថ្លៃសំបុត្រចូលទស្សនាអង្គរវត្ត
ចន្លោះមិនឃើញ
-ក្រសួងប្រកាសកែសម្រួលតម្លៃសំបុត្រចូលទស្សនាអង្គរ -ការដំឡើងថ្លៃសំបុត្រចូលទស្សនាអង្គរ អាចមានផលប៉ះពាល់តិចតួច -ការបង្កើតផលិតផលខ្មែរ នៅមានបញ្ហាមួយចំនួន សម្រាប់ទាក់ចិត្តភ្ញៀវបរទេស
នៅក្នុងសប្ដាហ៍នេះ ក្រសួងទេសចរណ៍បានប្រកាសកែសម្រួលថ្លៃសំបុត្រចូលទស្សនាអង្គរដោយបានដំឡើងថ្លៃសំបុត្រជិតពាក់កណ្ដាល ប៉ុន្តែ ការអនុវត្តផ្លូវការនឹងចាប់ផ្ដើមនៅដើមឆ្នាំ ២០១៧ ខាងមុខ។
ការកែសម្រួលថ្លៃសំបុត្រដែលបានរក្សាតម្លៃអស់រយៈពេល ២២ ឆ្នាំមកនោះ អ្នកវិភាគសេដ្ឋកិច្ចបានសម្ដែងការព្រួយបារម្ភតិចតួចអំពីផលប៉ះពាល់នានាដល់ភ្ញៀវបរទេសមួយចំនួនដែលសាញអំពីតម្លៃ។ ទន្ទឹមនឹងនេះ ក៏មានការទទូចឲ្យមានការបង្កើនផលិតផលខ្មែរសម្រាប់លក់នៅតំបន់ទេសចរសំខាន់ៗ ដើម្បីកាត់បន្ថយផលិតផលបរទេស។
លោក សុង តុងហាប់ អនុប្រធានគ្រឹះស្ថានអង្គរ ដែលជាការិយាល័យលក់សំបុត្រចូលអង្គរ បានប្រាប់ Sabay កាលពីថ្ងៃព្រហស្បតិ៍នេះថា ចាប់តាំងពីឆ្នាំ ១៩៩៤ មក ការលក់សំបុត្រមិនដែលបានកែសម្រួលនោះទេ គឺតម្លៃសំបុត្រ ២០ដុល្លារ ក្នុង១ថ្ងៃ។ ដូច្នេះ ហើយទើបក្រសួងទេសចរណ៍សម្រេចកែសម្រួលដោយឈរលើកត្តាបីយ៉ាង៖
១. អតិផរណា និង ប្រាក់ដុល្លារ៖ បើគិតអំពីអតិផរណា និង ប្រាក់ដុល្លារ កាលពីអំឡុងឆ្នាំ ១៩៩៤ គឺនៅទាបបើប្រៀបធៀបនឹងពេលឥឡូវ។ កាលណោះ ២០ដុល្លារ ស្មើនឹង ៣២ ដុល្លារ ៤០ដុល្លារស្មើនឹង៦៤ដុល្លារ និង ៦០ដុល្លារស្មើនឹង៩៥ដុល្លារ នៅឆ្នាំ ២០១៦នេះ។ ២. តំបន់ទេសចរណ៍ប្រវត្តិសាស្ត្រ៖ ថ្មីៗនេះសៀមរាបត្រូវបានគេជ្រើសរើសជាគោលដៅទេសចរណ៍ល្អបំផុតក្នុងតំបន់អាស៊ី និងប្រាសាទអង្គរវត្តជាទីតាំងទេសចរណ៍សម្គាល់អត្តសញ្ញាណជាតិដ៏ទាក់ទាញជាងគេបំផុតក្នុងតំបន់អាស៊ីផងដែរ ។ ដូច្នេះតម្លៃសំបុត្រដែលកែសម្រួលនេះមិនថ្លៃនោះទេ បើប្រៀបធៀបនឹងប្រទេសដែលមានប្រាសាទល្អបែបនេះ សំបុត្ររបស់គេថ្លៃជាងយើង២-៣ដងឯណោះ។ ៣. ការស្ទង់មតិជាមួយភ្ញៀវបរទេស៖ ភ្ញៀវបរទេសប្រមាណជា៣០០-៤០០នាក់ ដែលក្រសួងបានធ្វើការស្ទង់មតិនៅឯព្រលានយន្តហោះ កាលពីពេលកន្លងមកសុទ្ធតែឯកភាពលើការកែសម្រួលតម្លៃសំបុត្រចូលទស្សនាអង្គរវត្ត។
ផ្អែកតាមសេចក្ដីជូនដំណឹងរបស់ក្រសួងទេសចរណ៍ ដែលបានចុះកាលបរិច្ឆេទកាលពីថ្ងៃទី ១០ ខែសីហា បានឲ្យដឹងថា ចាប់ពីថ្ងៃទី ១ ខែកុម្ភៈ ឆ្នាំ ២០១៧ រាជរដ្ឋាភិបាលនឹងកែសម្រួលតម្លៃបណ្ណសម្រាប់ភ្ញៀវបរទេសចូលទស្សនារមណីយដ្ឋានអង្គរដូចខាងក្រោម៖ -ប្រភេទបណ្ណចូលទស្សនា ១ថ្ងៃ តម្លៃ ៣៧ ដុល្លារ -ប្រភេទបណ្ណចូលទស្សនា ៣ថ្ងៃ តម្លៃ ៦២ ដុល្លារ (សុពលភាព១០ថ្ងៃ) -ប្រភេទបណ្ណចូលទស្សនា ៧ថ្ងៃ តម្លៃ ៧២ ដុល្លារ (សុពលភាព ១ខែ) នៅក្នុងសេចក្ដីជូនដំណឹងនេះដែរ បានបញ្ជាក់ថា នៅក្នុងតម្លៃបណ្ណទាំង ៣ ខាងលើ គឺ ២ ដុល្លារ សម្រាប់ចូលមូលនិធិមន្ទីរពេទ្យគន្ធបុប្ផា ក្នុងការព្យាបាលជំងឺដល់កុមារក្រីក្រកម្ពុជា។
ទាក់ទងនឹងការជំរុញសេដ្ឋកិច្ចជាតិនេះដែរ លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ នៃឧត្ដមក្រុមប្រឹក្សាសេដ្ឋកិច្ចជាតិ បានធ្វើការកត់សម្គាល់ថា ផលិតផលខ្មែរនៅមានបញ្ហាខ្លះ ដើម្បីទាក់ទាញភ្ញៀវបរទេស។ បញ្ហាទាំងនោះរួមមាន កង្វះអ្នកជំនាញឌីហ្សាញផលិតផល ការដើរទីផ្សារ និង តម្លៃ គឺជា ឧបសគ្គមួយ នៃការលក់ផលិតផល ប្រពៃណីរបស់កម្ពុជា ឬផលិតផលជាអនុស្សាវរីយ៍ ទៅឲ្យភ្ញៀវបរទេស។
ការលើកឡើងពីបណ្ឌិត ម៉ី កល្យាណ បែបនេះដោយសង្កេតឃើញថា ភ្ញៀវបរទេសមកទស្សនានៅកម្ពុជាច្រើន ប៉ុន្តែ ផលិតផលខ្មែរដែលលក់សម្រាប់ភ្ញៀវបរទេសនៅមានកម្រិតនៅឡើយ ខណៈភាគច្រើនជាផលិតផលបរទេសដែលកំពុងចរាចរនៅលើទីផ្សារនៃតំបន់ទេសចរណ៍សំខាន់ៗរបស់កម្ពុជា។
សេដ្ឋកិច្ចវិទូកម្ពុជារូបនេះ បានឲ្យដឹងទៀតថា ប្រសិនបើយើងអាចបង្កើនផលិតផលអនុស្សាវរីយ៍ ដោយលក់បានកាន់តែច្រើន គឺមានប្រយោជន៍ច្រើនសម្រាប់សេដ្ឋកិច្ច គឺស្មើនឹងការបង្កើនការងារ បង្កើនចំណូល និង ធ្វើឲ្យភ្ញៀវបរទេសស្គាល់នូវផលិតផលរបស់ខ្មែរ ព្រោះពួកគេបានទិញផលិតផលទាំងនោះទុកជាអនុស្សាវរីយ៍។
សូមចុចអាន៖ សេដ្ឋកិច្ចវិទូកម្ពុជា៖ ផលិតផលខ្មែរនៅមានបញ្ហាខ្លះ ដើម្បីទាក់ទាញភ្ញៀវបរទេស
ទាក់ទងនឹងបញ្ហានេះ លោក សុង តុងហាប់ អនុរដ្ឋលេខាធិការក្រសួងទេសចរណ៍ និងជា អនុប្រធានគ្រឹះស្ថានអង្គរ បានលើកឡើងថា ក្រសួងក៏ដូចជា រាជរដ្ឋាភិបាលបានយកចិត្តទុកដាក់លើបញ្ហានេះ ដោយខិតខំបង្កើនផលិតផលខ្មែរផង រួមទាំងសេវាកម្មគ្រប់ប្រភេទ ដើម្បីទាក់ទាញភ្ញៀវទេសចរណ៍។ "យើងបានបង្កើនផលផលក្នុងស្រុក រួមទាំងសណ្ឋាគារផ្កាយ 4-5 ឲ្យភ្ញៀវស្នាក់នៅ ហេដ្ឋារចនាសម្ព័ន្ធ គិតពីតម្លៃ និង គុណភាព ដើម្បីបម្រើសេវាដល់ភ្ញៀវទេសចរណ៍"។ លោក សុង តុងហាប់ មានប្រសាសន៍។
ទាក់ទងនឹងការកែសម្រួលតម្លៃលើបណ្ណចូលទស្សនារមណីយដ្ឋានអង្គរ ដែលមានទំហំ ៤១០ គីឡូម៉ែត្រការ៉េ អនុប្រធានគ្រឹះស្ថានអង្គរ បានលើកឡើងថា៖ "ភ្ញៀវទេសចរពេលទិញបណ្ណ១សន្លឹកចូលទស្សនាអង្គរមិនមែនមើលតែអង្គរទេ គឺអាចមើលបានប្រាសាទជាច្រើននៅក្នុងបរិវេណរមណីយដ្ឋានមួយនេះ"។
ទន្ទឹមនឹងនេះ លោក តុងហាប់ បានបន្ថែមថា នៅក្នុងតម្លៃថ្មី បណ្ណចូលទស្សនាអង្គរ គឺចំនួន ២ ដុល្លារ ដែលសរសេរបញ្ជាក់នៅលើបណ្ណ គឺចូលរួមនៅក្នុងមូលនិធិមន្ទីរពេទ្យគន្ធបុប្ផា។ "ពួកគាត់មកទស្សនាប្រាសាទដ៏ប្រណិតរបស់ខ្មែរហើយ ភ្ញៀវបរទេសទាំងអស់ក៏បានចូលរួមជួយដល់កុមារក្រីក្រផងដែរ"។
លោកបានឲ្យដឹងដែរថា ការកែសម្រួលតម្លៃខាងលើ នឹងបង្កើនចំណូលសម្រាប់សេដ្ឋកិច្ចជាតិ។
ចំណូលបានពីការលក់សំបុត្រនៅរមណីយដ្ឋានអង្គរ គឺបែងចែកជាពីរ គឺនៅរដូវ Hight Season និង Low Season ។
-Hight season គិតចាប់ពីខែ កញ្ញា រហូតដល់ ខែមីនា គឺលក់សំបុត្របានពី ២០ម៉ឺន-៣០ម៉ឺនដុល្លារក្នុង១ថ្ងៃ។ -Low Season គិតចាប់ពីខែ មេសា រហូតដល់ខែ សីហា គឺលក់សំបុត្របានពី ១០ម៉ឺន-២០ដុល្លារ ក្នុង១ថ្ងៃ។ នេះជាការប្រាប់ឲ្យដឹងពី លោក សុង តុងហាប់៕
អត្ថបទ៖ វិបុត្រ