សហគ្រិនឆ្នើម នារីបញ្ចពិសី ប្រាប់បីចំណុច មុនចាប់បើកអាជីវកម្ម

2016-09-12 20:51:49
ព័ត៌មាន

2016-09-12 20:51:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ដើម្បីជាការចែករំលែកដល់អ្នកដែលមានគំនិតចង់បើកអាជីវកម្ម សហគ្រិនវ័យក្មេងឆ្នើមផ្នែកសង្គមឆ្នាំ២០១៦ អ្នកស្រី នាវ នារីបញ្ចពិសី បានលើកឡើង បីចំណុចសំខាន់ៗ ជាបទពិសោធន៍ផ្ទាល់ខ្លួនក្នុងការគិតគូរមុនឈានដល់ការបង្កើតជំនួញដោយខ្លួនឯង។

អ្នកស្រីនាយិកាក្រុមហ៊ុនទេសចរណ៍ All Dreams (Cambodia) Co. Ltd. បាននិយាយថា ការបើកអាជីវកម្មមួយ អ្វីដែលសំខាន់ជាងគេនោះគឺការស្រលាញ់ចូលចិត្ត។ នៅពេលដែលមានក្ដីស្រលាញ់ពេញចិត្តធ្វើវា នោះអ្នកធ្វើអាជីវកម្មនឹងមានចិត្តចង់រីកចម្រើនទៅមុខ ដោយមិនធុញទ្រាន់។

១. ការស្រលាញ់ ៖ “សម្រាប់អាជីវកម្មទាំងអស់ បងនៅតែប្រើពាក្យ១ម៉ាត់ថា បើអត់ស្រលាញ់កុំធ្វើ...ធំបំផុតទាល់តែយើងស្រលាញ់។" នេះបើតាមសម្ដីរបស់សហគ្រិនវ័យក្មេងឆ្នើមផ្នែកសង្គម ឆ្នាំ២០១៦។

អ្នកស្រី បញ្ចពិសី បានលើកឡើងពីឧទាហរណ៍ជាក់ស្ដែង ពីក្រុមហ៊ុនរបស់ខ្លួនដែលជោគជ័យមកទល់សព្វថ្ងៃក៏ដោយសារតែ ដៃគូសហការចេះស្រលាញ់ការងារដូចៗគ្នា។ សហគ្រិនរូបនេះនិយាយថា៖ " អ៊ីចឹងបងគិតថា Business កាលណាយើងស្រលាញ់ទើបយើងលូកដៃបានកប់ ហើយទៅធ្វើការជាមួយហ្នឹងវា អត់ចេះធុញទ្រាន់"។

អ្នកស្រី បញ្ចពិសីក៏បានបន្ថែមទៀតថា នៅពេលមានទឹកចិត្តស្រលាញ់ គឺមិនធុញទ្រាន់នឹងការងារជំនួញនោះឡើយទោះធ្វើការច្រើនឆ្នាំក៏ដោយ ថែមទាំងរីករាយនឹងការងារនោះទៀតផង។

២. គោលដៅ ៖ លោកស្រីនាយិកាក្រុមហ៊ុនទេសចរណ៍ All Dreams (Cambodia) បាននិយាយថា បន្ទាប់ពីមានក្ដីស្រលាញ់ហើយ ត្រូវមានគោលដៅ ហើយគោលដៅនោះត្រូវតែច្បាស់លាស់ ទើបអាចសិក្សាដឹងថា ត្រូវឆ្លងកាត់អ្វីខ្លះដើម្បីឲ្យដល់គោលដៅដែលចង់បាននោះ។

សហគ្រិនដែលមានស្រុកកំណើតនៅភ្នំពេញរូបនេះ បានលើកឧទាហរណ៍ថា នៅពេលបើកក្រុមហ៊ុនមួយ អ្នកបើកត្រូវគិតច្បាស់ថា គោលដៅរបស់ក្រុមហ៊ុនចង់បានអ្វី? អតិថិជនរបស់ខ្លួនជានរណា?

៣. ក្រុមការងារ ៖ ក្រោយពីរៀបចំគោលដៅច្បាស់លាស់ហើយ សហគ្រិនជោគជ័យខាងលើបានឲ្យតម្លៃទៅលើក្រុមការងារ ដោយអ្នកស្រីបានឲ្យដឹងថា បើគ្មានការគាំទ្រពីក្រុមការងារផ្ទាល់ ទាំងដៃគូ កិច្ចការអាជីវកម្មនោះមិនអាចដំណើរការបានឡើយ ព្រោះត្រូវការសហការជាក្រុមជួយគ្នាទៅវិញទៅមក។

គួររំលឹកផងដែរថា អ្នកស្រី នាវ នារីបញ្ចពិសី មុនឈានទៅដល់ភាពជោគជ័យនោះ អ្នកស្រីធ្លាប់ឆ្លងកាត់ការរៀនសូត្រពីបទពិសោធន៍ការងារជាច្រើន។

អ្នកស្រី បញ្ចពិសី បានចាប់ផ្ដើមដំណើរការអាជីវកម្មរបស់ខ្លួន នៅក្នុងឆ្នាំ២០១៣ ក្រោយលាឈប់ពីការងារនៅក្នុងក្រុមហ៊ុនចាស់។ មកទល់ពេលនេះអ្នកស្រីមានក្រុមហ៊ុនបី គឺក្រុមហ៊ុនទេសចរណ៍ All Dreams (Cambodia) Co. Ltd. សណ្ឋាគារ និង ក្រុមហ៊ុនទទួលរៀបចំកម្មវិធីផ្សេងៗ ហើយបន្តបើកនូវមុខជំនួញដទៃទៀត ដូចជាប្រតិបត្តិករ ឥណទាន (ថវិកាហ្វាយនិន) និងជំនួញបន្ទាប់បន្សំមួយចំនួនទៀត ហើយក៏គ្រោងបើកបន្ថែមនៅពេលខាងមុខផងដែរ៕