ជេត ជាលី៖ កាឡៃថ្ងៃ Valentine ជាទិវាសប្បុរស បង្វែរក្ដីស្រលាញ់ជួយអ្នកទន់ខ្សោយ

2017-02-08 06:50:33
ព័ត៌មាន

2017-02-08 06:50:33
ចំនួនមតិ 0 | ចំនួនចែករំលែក 0

ចន្លោះមិនឃើញ

ឯកឧត្ដមបណ្ឌិត ជេត ជាលី សកលវិទ្យាធិការ នៃសាកលវិទ្យាល័យភូមិន្ទភ្នំពេញ បានប្រាប់មកកាន់ Sabay ថា រៀងរាល់ឆ្នាំ នៃថ្ងៃទិវាក្ដីស្រលាញ់ (Valentine's Day) សាកលវិទ្យាល័យ តែងកាឡៃទៅជាព្រឹត្តិការណ៍ ទិវាសប្បុរសធម៌ ដោយបង្វែរសេចក្ដីស្រលាញ់ដល់អ្នកទន់ខ្សោយជាងខ្លួនតាមរយៈការបរិច្ចាគ លុយជួយដល់ពួកគេ។

ឯកឧត្ដមសកលវិទ្យាធិការ បានឲ្យដឹងថា សម្រាប់ថ្ងៃនៃក្ដីស្រលាញ់ ១៤កុម្ភៈឆ្នាំនេះ មិនចំថ្ងៃចុងសប្ដាហ៍ ដូចនេះ សាកលវិទ្យាល័យបានលើកថ្ងៃ Valentine រៀបចំធ្វើជាព្រឹត្តិការណ៍ សប្បុរសធម៌ កាលពីថ្ងៃ១៣ មករាកន្លងទៅ ដែលចំថ្ងៃខួបកំណើតនៃសាកលវិទ្យាល័យភូមិន្ទភ្នំពេញ។

សម្រាប់ទិវាសប្បុរស ជំនួសថ្ងៃទិវាក្ដីស្រលាញ់នោះ បានទទួលការគាំទ្រពីសិស្សនិស្សិត ជាច្រើន ព្រោះចំថ្ងៃសុក្រ ជិតថ្ងៃចុងសប្ដាហ៍មិនប៉ះពាល់ដល់ការរៀនសូត្រ។ ហើយព្រឹត្តិការណ៍១ថ្ងៃនោះផងដែរ គឺអាចប្រមូលបានប្រាក់មូលនិធិសប្បុរសធម៌ ជិត១ម៉ឺនដុល្លារផងដែរ។

យ៉ាងនេះក្ដី ឯកឧត្ដមសកលវិទ្យាធិការបានបញ្ចេញទស្សនៈថា យុវជនបច្ចុប្បន្ន ភាគច្រើនយល់ដឹង ពុំមានការភ្លើតភ្លើននាំឲ្យកើតជាបញ្ហានោះទេ។ ឯកឧត្ដម ជេត ជាលី បានផ្ដាំផ្ញើដល់និស្សិត និងសាធារណជនថា នាថ្ងៃ១៤ កុម្ភៈ សូមកុំឲ្យធ្វើអ្វីជ្រុលពេក ដោយធ្វើអ្វីគិតពីកិត្តិយសរបស់ខ្លួន គិតពីសុវត្ថិភាពរបស់ខ្លួន គិតអនាគតខ្លួនឯង ថាតើជាប្រយោជន៍ដល់ខ្លួនឯងដែរឬទេ? ៕