- 2017-02-15 06:53:00
- សេដ្ឋកិច្ច
អ្នកលក់ផ្កា៖ អ្នកទិញ ១៤កុម្ភៈឆ្នាំនេះ មិនសូវជាអ៊ូអរដូចឆ្នាំមុនៗ
- 2017-02-15 06:53:00
- ចំនួនមតិ 0 | ចំនួនចែករំលែក 0
អ្នកលក់ផ្កា៖ អ្នកទិញ ១៤កុម្ភៈឆ្នាំនេះ មិនសូវជាអ៊ូអរដូចឆ្នាំមុនៗ
ចន្លោះមិនឃើញ
ថ្ងៃ១៤កុម្ភៈ ទិវានៃក្ដីស្រលាញ់ ជារៀងរាល់ឆ្នាំ វត្ថុអនុស្សាវរីយ៍ជាច្រើន ដូចជា ផ្កាស្រស់ ផ្កាក្រដាស ផ្កាក្រណាត់ តុក្កតា និង ប៉េងប៉ោង ត្រូវបានដាក់លក់ត្រៀបត្រា នៅតាមដងផ្លូវ សម្រាប់អតិថិជន ទិញជូនអ្នកជាទីស្រលាញ់។
សម្រាប់ថ្ងៃ ១៤ កុម្ភៈម្សិលមិញ បើតាម កញ្ញា សូនីកា អ្នកលក់ផ្កា និងវត្ថុអនុស្សាវរីយ៍ម្នាក់ នៅម្ដុំផ្លូវបាស្ទ័រ (៥១) បានប្រាប់ថា កញ្ញាបានមកលក់ ផ្កាស្រស់ ផ្កាក្រណាត់ និងតុក្កតា តាំងពីថ្ងៃ១០កុម្ភៈមកម្ល៉េះ។ ប៉ុន្តែសម្រាប់ឆ្នាំនេះ អ្នកលក់ផ្ការូបនេះ ប្រាប់ពុំសូវមានមនុស្សអ៊ូអរមក រោមទិញ ដូចឆ្នាំមុនៗឡើយ ពោលគឺស្ងាត់ជាងរាល់ឆ្នាំ។
យ៉ាងណាមិញ កញ្ញាលក់ផ្កាខាងលើ ប្រាប់ថា កន្លែងរបស់កញ្ញាលក់ដាច់មួយៗ ហើយរបស់ដែលគេ មកទិញយកភាគច្រើន គឺផ្កាក្រណាត់តម្លៃពី ២០ ទៅ៣០ដុល្លារ និងតុក្កតា៨ដុល្លារ ដល់ជាង១០០ដុល្លារ។
ដោយឡែក អ្នកលក់ផ្កាម្នាក់នៅម្ដុំវត្តលង្កា សុំមិនបញ្ចេញឈ្មោះ ប្រាប់ថា៖ "ឆ្នាំនេះរាងស្ងាត់ជាងឆ្នាំមុនៗបង មនុស្សអត់សូវសម្រុកទិញច្រើនដូចមុន ហើយលក់ដាច់មួយៗ"។
គួររំលឹកដែរ ថ្ងៃ ១៤ កុម្ភៈ ប៉ុន្មានឆ្នាំចុងក្រោយនេះ ពុំមានឃើញការដាក់លក់ផ្កា ឬវត្ថុអនុស្សាវរីយ៍នៅជាប់របងសាលារៀនរដ្ឋ អនុវិទ្យាល័យ និងវិទ្យាល័យនោះទេ។ គេសង្កេតឃើញមានអ្នកដាក់លក់ នៅតាមមុខផ្ទះ នៅក្បែរសួន និងហាងឯកជនមួយចំនួនប៉ុណ្ណោះ។
សម្រាប់ឆ្នាំនេះផងដែរ ស្ថាប័នក្រសួងរដ្ឋ ចំនួនបី គឺក្រសួងអប់រំ ក្រសួងកិច្ចការនារី និងក្រសួង វប្បធម៌ បានផ្សព្វផ្សាយអំពាវនាវ ដាស់តឿនរំលឹកសាធារណជនជាច្រើន កុំឲ្យមានការស្មានច្រឡំអំពីទិវាថ្ងៃនៃក្ដីស្រលាញ់នោះ ហើយបុណ្យនោះផងដែរ គឺពុំមែនជាប្រពៃណីរបស់កម្ពុជានោះទេ។
កន្លងទៅថ្មីៗ ឯកឧត្តម ជាត ជាលី ជាសកលវិទ្យាធិការ នៃសាកលវិទ្យាល័យភូមិន្ទភ្នំពេញ បានឲ្យដឹងថា យុវជនបច្ចុប្បន្នភាគច្រើន មានការយល់ដឹងអំពីថ្ងៃនៃទិវាក្ដីស្រលាញ់ ដោយពួកគេបានយកថ្ងៃនោះ ជាការបង្ហាញក្ដីស្រលាញ់ទៅដល់ ឪពុកម្ដាយ បងប្អូន និងមិត្តភ័ក្ដិ និងទៅដល់អ្នកទន់ខ្សោយជាងខ្លួន តាមរយៈការជូនអំណោយ ជាដើម។ ដោយឡែកមាន យុវជនមួយចំនួនតូចប៉ុណ្ណោះដែលយល់ច្រឡំ អំពី ទិវានៃក្ដីស្រលាញ់នោះ៕
