រកឃើញរូងភ្នំ អាយុកាល១៥ ០០០ឆ្នាំ ស្ថិតក្រោមទីក្រុងល្បីមួយ មិនធ្លាប់មានអ្នកឃើញ

2017-12-07 02:59:35
ព័ត៌មាន

2017-12-07 02:59:35
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីពេលថ្មីៗនេះ អ្នករុករកស្ម័គ្រចិត្តជនជាតិកាណាដា ២នាក់ បានរកឃើញរូងភ្នំ អាយុកាល ១៥ ០០០ឆ្នាំ ដែលស្ថិតនៅក្រោមទីក្រុង Montreal ប្រទេសកាណាដា ជម្រៅត្រឹម ៩ម៉ែត្រ។

អ្នករុករកទាំង២ខាងលើ បានប្រើប្រាស់ម៉ាស៊ីនស្វាន និងញញួរ ដើម្បីទម្លុះតាមជញ្ជាំងថ្មកំបោរបុរាណនៅលើរូងភ្នំ ដែលបង្ហាញឲ្យឃើញនូវបណ្ដាញរូងភ្នំជាច្រើន ដែលមនុស្សមិនធ្លាប់បានឃើញពីមុនមក។ នៅពេលដែលអ្នករុករកបានអើតក្បាលរបស់ពួកគេតាមជញ្ជាំង ស្រាប់តែបានឃើញគុហាធំទូលាយប្រវែង ២០០ម៉ែត្រ , ទទឹង៣ម៉ែត្រ , កម្ពស់ប្រហែល ៦ម៉ែត្រ និងបឹងមួយផងដែរ។

អ្នករុករក Daniel Caron និងមិត្តភ័ក្ដិរបស់លោកឈ្មោះ Luc Le Blanc បានប្រាប់កាសែត The Canadian Press ថា «ជាធម្មតា អ្នកត្រូវធ្វើដំណើរទៅឋានព្រះចន្ទ ដើម្បីស្វែងរកវត្ថុបែបនេះ»។ Le Blanc បានបន្ថែមថា «នេះគឺជាការរកឃើញដ៏សំខាន់បំផុតមួយដែលយើងបានធ្វើ។ វាមិនកើតឡើងច្រើនដងក្នុងមួយជីវិតនេះទេ»។

យ៉ាងណាមិញ ទឹកនៅក្នុងរូងភ្នំមានជម្រៅប្រមាណ ៤,៥ម៉ែត្រនៅកន្លែងខ្លះ ដែលបង្ខំឲ្យពួកគេប្រើទូក។ រីឯមធ្យោបាយតែមួយគត់ ដើម្បីទៅដល់រូងភ្នំនោះ គឺ ការវារដោយដៃ ឆ្លងកាត់ដីភក់ និងច្រកផ្លូវតូចចង្អៀត៕