ក្រសួងទេសចរណ៍នៃព្រះរាជាណាចក្រកម្ពុជា នៅថ្ងៃទី២៣ ខែកុម្ភៈ ឆ្នាំ២០២២នេះ បានលើកឡើងថា វត្តមានរបស់ Angelina Jolie មក​កាន់​ខេត្តសៀមរាបគួរ​ឲ្យ​ភ្ញាក់​ផ្អើល​ថ្មីៗ​នេះ បង្ហាញថា កម្ពុជាជាគោលដៅទេសចរណ៍សុវត្ថិភាពមួយ។

ក្រសួង​ទេចរណ៍​លើក​ឡើង​បែប​េនះ បន្ទាប់​ពី​ថ្មីៗ​នេះ មាន​ការ​ភ្ញាក់​ផ្អើល​ពី​ដំណើរ​មក​ដល់​របស់​កំពូល​តារាស្រី​ហូលីវូដ Angelina Jolie មក​កាន់​ដែនដី​ខេត្ត​សៀមរាប ពិសេស​តំបន់​រមណីយដ្ឋានអង្គរ ដែលមានប្រាសាទអង្គរវត្តជានិមិត្តរូប និង​មោទកភាពជាតិខ្មែរ។ រូបភាព​ប៉ុន្មាន​សន្លឹក​ត្រូវ​បាន​ចែកចាយ​នៅ​លើ​បណ្ដាញ​សង្គម បង្កើត​ឲ្យ​មាន​មោទកភាព​ជាថ្មី ក្រោយ​ពី​ច្រើន​ឆ្នាំ​មកហើយ ដែល Angelina Jolie ខកខាន​មក​កាន់​ទឹកដី​កំណើត​កូន​ចិញ្ចឹម​របស់​នាង ចាប់​តាំង​ពី​ឆ្នាំ ២០១៧ ដែល​នាង​បាន​ចុះ​មក​ថត​រឿង "មុន​ដំបូង​ខ្មែរ​ក្រហម​សម្លាប់​ប៉ា​ខ្ញុំ" មក។

សកម្មភាព​នេះ បាន​ទទួល​ការ​សាទរ​ពី​គ្រប់​មជ្ឈដ្ឋាន ហើយ​ក្នុង​នោះ ក្រសួង​ទេសចរណ៍ បាន​លើក​ឡើង​ថា វត្តមាន​​កំពូល​តារា​ហូលីវូដ​នៅ​កម្ពុជា​ពេល​នេះ មាន​ផលវិជ្ជមាន​ច្រើន​សម្រាប់​កម្ពុជា ពិសេស​គឺ​បាន​បង្ហាញ​ថា កម្ពុជា គឺ​ជា​គោលដៅទេសចរណ៍សុវត្ថិភាព​មួយ។

ទន្ទឹមនេះដែរថ្មីៗនេះ ក្រោយវត្តមានរបស់លោកស្រី Angelina Jolie តារាភាពយន្តអន្តរជាតិដ៏ល្បី បានទៅទស្សនាប្រាសាទអង្គរវត្ត នឹងតំបន់ផ្សេងក្នុងរមណីយដ្ឋានអង្គរ ដោយការបង្ហាញវត្តមានដ៏សំខាន់របស់តារាហូលីវូដរូបនេះ ក៏បានជួយផ្សព្វផ្សាយតំបន់រមណីយដ្ឋានអង្គរ ទៅកាន់ពិភពលោកថែមមួយកម្រិតទៀត ពិសេសក្នុងអំឡុងពេលវិបត្តិជំងឺកូវីដ១៩ដើម្បីបញ្ជាក់ថា កម្ពុជាជាគោលដៅទេសចរណ៍ប្រកបដោយសុវត្ថិភាព។

"ការបង្ហាញវត្តមានដ៏សំខាន់ក្នុងបេសកកម្មរបស់ខ្លួននៅពេលនេះ តារាហូលីវូដរូបនេះ ក៏បានជួយផ្សព្វផ្សាយតំបន់រមណីយដ្ឋានអង្គរ ទៅកាន់ពិភពលោកថែមមួយកម្រិតទៀត ពិសេសក្នុងអំឡុងពេលវិបត្តិជំងឺកូវីដ១៩ដើម្បីបញ្ជាក់ថា កម្ពុជាជាគោលដៅទេសចរណ៍ប្រកបដោយសុវត្តិភាព។"

លោកស្រី Angelina Jolie បានមកបំពេញបេសកកម្មការងារនៅឧទ្យានជាតិអង្គរ កាលពីថ្ងៃទី២០ដល់ថ្ងៃទី២១ ខែកុម្ភៈ ឆ្នាំ២០២២។ ភ្លាម​ៗ គេ​មិន​ដឹង​ថា ដំណើរ​របស់​អ្នក​ស្រី​មក​កាន់​កម្ពុជា​យ៉ាង​គួរ​ឲ្យ​ភ្ញាក់​ផ្អើល​នេះ មាន​គោលបំណងអ្វី មក​ដើរ​កម្សាន្ត ឬ​ក៏​មាន​កិច្ចការ​ចាំបាច់​អ្វី​ឡើយ។ ប៉ុន្តែ​ក្រោយ​មក តាម​អាជ្ញាធរអប្សរា បាន​ឲ្យ​ដឹង​ថា តារាហូលីវូដ​មាន​សញ្ជាតិ​ខ្មែរ​រូប​នេះ មក​ដើម្បីចូលរួមពិធីសម្ពោធជាផ្លូវការនៃកម្មវិធី ចិញ្ចឹមឃ្មុំសម្រាប់ស្ត្រី (Women for Bees) ក្រោមកិច្ចសហការជាមួយអង្គការយូណេស្កូ និងសម្របសម្រួលដោយអាជ្ញាធរជាតិអប្សរា។

កម្មវិធីចិញ្ចឹមឃ្មុំនេះមានគោលបំណងជួយអភិរក្សប្រភេទឃ្មុំ Apis cerana និង Apis dorsata ដែលមានដើមកំណើតនៅក្នុងឧទ្យានអង្គរ លើកកម្ពស់ការចិញ្ចឹមឃ្មុំប្រកបដោយចីរភាព និងពង្រឹងសមត្ថភាពស្ត្រីក្នុងការរកប្រាក់ចំណូលសម្រាប់ផ្គត់ផ្គង់ក្នុងគ្រួសារ និងសហគមន៍របស់ពួកគេ។ សូមបញ្ជាក់ថា លោកស្រី Angelina Jolie គឺជាស្ថាបនិកនៃគម្រោង UNESCO-GUERLAIN “Women for bees” ដែលឧបត្ថម្ភដោយក្រុមហ៊ុន GUERLAIN ៕