ខ្លាឃ្មុំផេនដាសម្បុរត្នោតតែមួយគត់លើលោក នៅរក្សាភាពបរិសុទ្ធ ក្រោយការបង្កាត់បរាជ័យ (វីដេអូ)

2018-09-04 03:16:29
ព័ត៌មាន

2018-09-04 03:16:29
ចំនួនមតិ 0 | ចំនួនចែករំលែក 0

ចន្លោះមិនឃើញ

Qizai ដែលជាខ្លាឃ្មុំផេនដាឈ្មោលសម្បុរពណ៌ត្នោតតែមួយគត់លើលោក បានព្យាយាមបង្កាត់ជាមួយខ្លាឃ្មុំផេនដាញី ប៉ុន្តែបែរមិនបានសម្រេច។

ខ្លាឃ្មុំផេនដា Qizai

ខ្លាឃ្មុំដែលមានអាយុ ៩ ឆ្នាំនេះ ត្រូវមេរបស់វាបោះបង់ចោលនៅអាយុ ២ ឆ្នាំ។ បច្ចុប្បន្នវាកំពុងរស់នៅក្នុងតំបន់អភិរក្សធម្មជាតិ Foping Panda Valley នៃខេត្ត Shaanxi ប្រទេសចិន ហើយត្រូវគេរៀបចំឲ្យឆ្លងកាត់ការរួមរក្សលើកដំបូងតាមបែបធម្មជាតិ ជាមួយខ្លាឃ្មុំផេនដាមួយក្បាលទៀត។

គួរបញ្ជាក់ឲ្យដឹងថា មានខ្លាឃ្មុំផេនដាជាច្រើនដែលមានសម្បុរពណ៌ត្នោត ប៉ុន្តែ Qizai គឺខុសប្លែកពីគេ ដោយសារតែវាមានសម្បុរពណ៌ត្នោត និងពណ៌សសុទ្ធ។ ពណ៌សម្បុរខុសគេតែមួយគត់របស់ Qizai ត្រូវគេជឿថា ជាលទ្ធផលនៃភាពមិនប្រក្រតីរបស់ហ្សែន។ លក្ខណៈពិសេសដ៏កម្ររបស់វា បានជំរុញឲ្យក្រុមការងារស្រាវជ្រាវនៅតំបន់អភិរក្សធម្មជាតិខាងលើ រកមេដែលមានលក្ខណៈសមស្រប ដើម្បីឲ្យវាអាចផលិតកូនចៅខ្លះ។

ខ្លាឃ្មុំ Qizai ត្រូវបានដាក់បង្កាត់តាមបែបធម្មជាតិជាមួយនឹង ខ្លាឃ្មុំញីអាយុ ១៨ឆ្នាំ ឈ្មោះ Zhuzhu ដែលធ្លាប់កើតបានកូនមានសុខភាពល្អ ចំនួន ៤ ក្បាលពីមុនមក។ នៅក្នុងក្ដីសង្ឃឹមដើម្បីអាចឲ្យពួកវាមានភាពសុខស្រួលជាមួយគ្នា អ្នកស្រាវជ្រាវបានដាក់វានៅក្នុងទ្រុងជិតគ្នា កាលពីខែមិថុនាកន្លងទៅ។ ថ្វីបើពួកវាបានបង្ហាញការចាប់អារម្មណ៍ចំពោះគ្នាទៅវិញទៅមក ប៉ុន្តែពួកវានៅតែបរាជ័យក្នុងការរួមរក្ស ទោះជាមានការព្យាយាមច្រើនដងក៏ដោយ។

គួរឲ្យដឹងថា ខ្លាឃ្មុំផេនដាញី រកឈ្មោលតែម្ដងគត់ក្នុងមួយឆ្នាំ ដោយមានរយៈពេលចន្លោះពី ១២ ទៅ ២៥ ថ្ងៃប៉ុណ្ណោះ ហើយទទួលយកការរួមរក្សតែរយៈពេល ២៤ ទៅ ៣៦ ម៉ោងប៉ុណ្ណោះក្នុងអំឡុងពេលនោះ។

យ៉ាងណាមិញ ដោយសារតែមានជម្រើសតិចតួចពេក ក្រោយមកអ្នកស្រាវជ្រាវបានសម្រេចចិត្តបញ្ចូលមេជីវិតឈ្មោលរបស់ Qizai ទៅក្នុងខ្លួន Zhuzhu តែម្ដង។

ក្រុមអ្នកវិទ្យាសាស្ត្រកំពុងសង្ឃឹមថា នីតិវិធីនេះនឹងផ្ដល់លទ្ធផលល្អប្រសើរជាងការប៉ុនប៉ងមុនៗ ព្រោះខ្លាឃ្មុំផេនដាញី ចំនួន៤ក្បាលមកហើយ ត្រូវបានបញ្ចូលមេជីវិតឈ្មោលរបស់ Qizai ប៉ុន្តែសុទ្ធតែមិនមានកូន៕

សូមទស្សនាវីដេអូខាងក្រោម៖